حضرت نافع فرماتے ہیں کہ حضرت عبد اللہ بن رواحۃ کی ایک باندی تھی۔ آپ اس سے جماع کرنے کو اپنی بیوی سے چھپاتے تھے۔ ایک دن آپ نے اس اسے جماع کیا اور جب اپنی بیوی کے پاس آئے تو اس نے آپ پر الزام لگایا کہ آپ نے اس باندی سے جماع کیا ہے؟ آپ نے اس کا انکار کیا تو آپ کی بیوی نے آپ سے کہا: اگر ایسی بات ہے تو قرآن پڑھو: آپ نے یہ اشعار پڑھ دیئے۔: میں اللہ کے حکم سے گواہی دیتا ہوں کہ محمد اس اللہ کے رسول ہیں جو آسمانوں کے اوپر ہے۔ یحییٰ اور ان کے والد دونوں کا عمل اس دین میں قابل قبول ہے۔ اس نے کہا: تمہارے لیے خرابی ہو۔ [مصنف ابن ابي شيبه/ كتاب الأدب/حدیث: 27704]

حضرت خیثمہ فرماتے ہیں کہ حضرت عمر کے پاس ایک شاعر آیا اور کہنے لگا: کیا آپ کو شعر سناؤں؟ آپ نے شعر سنانے کا کہا: تو وہ شعر سنا رہا تھا کہ اس نے محمد (صلی اللہ علیہ وآلہ وسلم) کا ذکر کیا اور کہا: اللہ تعالیٰ محمد (صلی اللہ علیہ وآلہ وسلم) کی مغفرت فرمائے اس صبر کے سبب جو آپ نے کیا۔ حضرت عمر نے فرمایا: تحقیق اللہ نے ایسا کر دیا۔ پھر اس نے حضرت ابوبکر اور حضرت عمر دونوں کا ذکر کیا تو آپ نے فرمایا: جو اللہ نے چاہا۔ [مصنف ابن ابي شيبه/ كتاب الأدب/حدیث: 27705]

حضرت انس رضی اللہ عنہ فرماتے ہیں کہ حضرت براء ایک شعر گنگنا رہے تھے، میں نے ان سے کہا کہ آپ شعر گنگنا رہے ہیں، اگر آپ کو اس حالت میں موت آگئی تو کیا ہوگا۔ انہوں نے جواب دیا کہ میں اپنے بستر پر نہیں مروں گا۔ میں نے ننانوے مشرکوں اور منافقوں کو قتل کیا ہے۔ [مصنف ابن ابي شيبه/ كتاب الأدب/حدیث: 27706]

حضرت اعمش فرماتے ہیں کہ حضرت ابو خالد والبی نے ارشاد فرمایا: میں رسول اللہ صلی اللہ علیہ وآلہ وسلم کے صحابہ کے ساتھ بیٹھا کرتا تھا۔ بعض اوقات وہ اپی مجالس میں صرف اشعار کا ہی تذکرہ کیا کرتے تھے یہاں تک کہ منتشر ہوجاتے۔ [مصنف ابن ابي شيبه/ كتاب الأدب/حدیث: 27707]

امام شعبی نے ارشاد فرمایا: حضرت ابوبکر شاعر تھے، حضرت عمر شاعر تھے اور حضرت علی رضی اللہ عنہ بھی شاعر تھے۔ [مصنف ابن ابي شيبه/ كتاب الأدب/حدیث: 27708]

حضرت عامر فرماتے ہیں کہ حضرت ربعی بن حراش نے ارشاد فرمایا: میں غطفان کی ایک جماعت میں حضرت عمر کے پاس آیا تو وہ لوگ شعروں کا تذکرہ کر رہے تھے۔ حضرت عمر نے فرمایا: تمہارے شعراء میں سب سے بڑا شاعر کون سا ہے؟ ان لوگوں نے جواب دیا: امیر المؤمنین! آپ زیادہ جانتے ہیں۔ اس پر حضرت عمر نے فرمایا: یہ شعر کس نے کہا؟: میں تیرے پاس اس حال میں آیا کہ میں ننگے پاؤں تھا اور میرے کپڑے پرانے تھے۔ بہت سے اندیشوں نے مجھے گھیرا ہوا تھا۔ میں اپنی امانت کو اس حال میں پایا کہ تو نے اس میں خیانت نہ کی تھی۔ حضرت نوح بھی خیانت نہ کیا کرتے تھے۔ ہم لوگوں نے جواب دیا: نابغہ نے، آپ پھر ایسے ہی فرمایا اور پوچھا: یہ شعر کس نے کہا؟: میں نے قسم کھائی اور اپنے دل میں کوئی شک باقی نہ چھوڑا۔ اور اللہ کے سوا آدمی کے لیے جانے کی کوئی جگہ نہیں ہے۔ پھر آپ نے فرمایا: یہ شعر کس نے کہا؟: سوائے سلیمان کہ جب اللہ تعالیٰ نے ان سے کہا لوگوں میں کھڑے ہوجاؤ اور انہیں غلط کاری سے روکو۔ ہم نے جواب دیا: نابغہ نے۔ آپ نے فرمایا: یہ تمہارے شعراء میں سب سے بڑا شاعر ہے۔ [مصنف ابن ابي شيبه/ كتاب الأدب/حدیث: 27709]

حضرت ابوضحی فرماتے ہیں کہ حضرت ابوبکر نے معدی کرب سے شعر سنانے کا مطالبہ کیا تو اس نے انہیں شعر سنائے، اور آپ نے فرمایا: میں نے اسلام لانے کے بعد تجھ سے پہلے کسی سے بھی شعر سنانے کا مطالبہ نہیں کیا۔ [مصنف ابن ابي شيبه/ كتاب الأدب/حدیث: 27710]

حضرت عبد اللہ بن عبید بن عمیر فرماتے ہیں کہ حضرت ابوبکر نے ارشاد فرمایا: کبھی کبھار شاعر پر حکمت بات کہہ دیتا ہے۔ [مصنف ابن ابي شيبه/ كتاب الأدب/حدیث: 27711]

حضرت ھانی فرماتے ہیں کہ میں نے حضرت علی رضی اللہ عنہ کو یہ شعر پڑھتے ہوئے سُنا:: تو اپنے سینہ کو موت کے لیے تیار کر لے…اس لیے کہ موت تجھ سے ملاقات کرنے والی ہے اور تو ہرگز موت سے نہ ڈر…جب موت تیری وادی میں اتر آئے۔ [مصنف ابن ابي شيبه/ كتاب الأدب/حدیث: 27712]

حضرت ابن سیرین فرماتے ہیں کہ حضرت علی رضی اللہ عنہ بن ابی طالب نے عبد الرحمن بن ملجم مرادی سے یوں کہا:: میں ا س کی زندگی کا ارادہ کرتا ہوں اور وہ میرے قتل کرنے کا ارادہ رکھتا ہے۔ تم قبیلہ مراد میں سے کسی ایسے دوست کو لاؤ جو تمہارا عذر تسلیم کرے۔ [مصنف ابن ابي شيبه/ كتاب الأدب/حدیث: 27713]