حضرت علی رضی اللہ عنہ کا ارشاد ہے کہ زبان میں دیت ہے۔ [مصنف ابن ابي شيبه/كتاب الديات/حدیث: 28651]

حضرت عبداللہ سے مروی ہے کہ زبان جب جڑ سے اکھاڑ لی جائے تو دیت پانچ حصوں میں ہوگی، اور جو اس سے کم ہو (یعنی جڑ سے نہ اکھڑی ہو) تو اس میں اس کے حساب سے دیت ہوگی۔ [مصنف ابن ابي شيبه/كتاب الديات/حدیث: 28652]

حضرت عمر بن عبدالعزیز نے فرمایا ہے کہ زبان میں دیت کا ملہ ہے اور جب زبان کا زخم اتنا بڑھ جائے کہ بات نہ ہوسکے تو اس میں بھی کامل دیت ہوگی۔ [مصنف ابن ابي شيبه/كتاب الديات/حدیث: 28653]

حضرت ابراہیم کا ارشاد ہے کہ زبان کی جڑ میں (دیت کاملہ ہے) [مصنف ابن ابي شيبه/كتاب الديات/حدیث: 28654]

حضرت حسن سے بھی اسی طرح مروی ہے۔ [مصنف ابن ابي شيبه/كتاب الديات/حدیث: 28655]

حضرت زید بن ثابت نے فرمایا ہے کہ زبان جب چر جائے پھر اس کا زخم بھر جائے تو بیس اونٹ ہیں۔ [مصنف ابن ابي شيبه/كتاب الديات/حدیث: 28656]

حضرت ابن جریج کا ارشاد ہے کہ میں نے عطاء سے سوال کیا کہ زبان ساری کاٹی جائے تو؟ تو انہوں نے جواب دیا کہ دیت ہوگی۔ [مصنف ابن ابي شيبه/كتاب الديات/حدیث: 28657]

حضرت عمرو بن شعیب کا ارشاد ہے کہ حضرت ابوبکر نے زبان جب جڑ سے کٹ جائے تو دیت کاملہ کا اور اگر اس کی نوک کٹ جائے اور صاحب لسان بات کرسکے تو آدھی دیت کا فیصلہ فرمایا۔ [مصنف ابن ابي شيبه/كتاب الديات/حدیث: 28658]

حضرت ابن جریج نے فرمایا کہ سلیمان بن موسیٰ کا ارشاد ہے کہ عمر بن عبدالعزیز کی کتاب میں ہے کہ جو زبان اتنی کٹ جائے کہ بات کرنے سے عاجز ہو تو اس میں پوری دیت ہے اور جو اس سے کم کٹی ہو تو اس کے حساب سے دیت ہے۔ [مصنف ابن ابي شيبه/كتاب الديات/حدیث: 28659]

حضرت ابن جریج کا ارشاد ہے کہ مجھ کو عبدالعزیز بن عمر نے یہ بات بتائی کہ عمر بن عبدالعزیز کی کتاب میں لکھا ہے کہ عمر سے مروی ہے کہ زبان جب جڑ سے نکل جائے تو اس میں پوری دیت ہے اور زبان کا جو زخم بڑھ جائے کہ بات کرنے سے مانع ہو تو اس میں بھی کامل دیت ہے اور عورت کی زبان میں بھی دیت کاملہ ہے اور عورت کی زبان کا جو زخم بڑھ جائے اور بات کرنے سے مانع ہو تو اس میں بھی دیت کاملہ ہے اور زخم اس سے کم درجہ کا ہو تو اس میں اس کے حساب سے دیت ہوگی۔ [مصنف ابن ابي شيبه/كتاب الديات/حدیث: 28660]