حضرت مکحول کا ارشاد ہے کہ جب منہ پھٹ جائے تو لوگ ا س میں دیت مقرر کرتے تھے۔ [مصنف ابن ابي شيبه/كتاب الديات/حدیث: 28611]

حضرت زید بن ثابت نے فرمایا ہے کہ جب آدمی کو اتنا مارا جائے اس کی شنوائی ختم ہوجائے تو اس میں دیت ہے۔ [مصنف ابن ابي شيبه/كتاب الديات/حدیث: 28612]

حضرت حسن سے روایت ہے انہوں نے فرمایا کہ جس کو مارا گیا اور اس کی شنوائی، گویائی اور بینائی چلی گئی تو اس میں تین دیتیں ہوں گی۔ [مصنف ابن ابي شيبه/كتاب الديات/حدیث: 28613]

حضرت عوف کا ارشاد ہے کہ میں نے ایک بوڑھے سے سنا ہے ابن الاشعث کے فتنہ سے قبل، انہوں نے اس کا حلیہ بیان کیا تو لوگوں نے کہا کہ وہ ابو المہلب ہیں جو ابو قلابہ کے چچا ہیں، انہوں نے کہا کہ کسی آدمی کو پتھر لگا اس کے سر میں جس سے اس کی عقل، قوت مردانگی، شنوائی اور گویائی ختم ہوگئی اور وہ عورتوں کے قابل نہ رہا تو عمر نے اس کے بارے میں چار دیتوں کا فیصلہ فرمایا۔ [مصنف ابن ابي شيبه/كتاب الديات/حدیث: 28614]

حضرت سعید بن مسیب نے فرمایا ہے کہ سماعت میں دیت ہے۔ [مصنف ابن ابي شيبه/كتاب الديات/حدیث: 28615]

حضرت مجاہد کا ارشاد ہے کہ سماعت کے ختم ہوجانے پر پچاس اونٹ دیت ہے۔ [مصنف ابن ابي شيبه/كتاب الديات/حدیث: 28616]

حضرت ابن جریج کا ارشاد ہے کہ میں نے عطاء سے ایسے آدمی کے متعلق سوال کیا کہ جس کے اطراف و جوانب میں ایسے زخم آئے ہوں کہ ان کی مقدار اس کی دیت سے بھی زیادہ ہو؟ تو انہوں نے جواب دیا کہ میں نے اس بارے میں کچھ نہیں سنا، اور میرا خیال ہے کہ اس کے تمام اطراف کے زخموں کا بدلہ دیا جائے اگرچہ اس کی دیت سے بڑھ جائے۔ [مصنف ابن ابي شيبه/كتاب الديات/حدیث: 28617]

حضرت ابن جریج کا ارشاد ہے کہ ابن شہاب نے فرمایا ہے ایسے شخص کے بارے میں کہ جس نے اپنے صاحب کی آنکھ کو پھوڑا اور اس کے ناک اور کان کاٹ دیے کہ اس تمام کے تمام کا حساب لگایا جائے گا۔ [مصنف ابن ابي شيبه/كتاب الديات/حدیث: 28618]

حضرت قتادہ سے مروی ہے کہ حسن سے ایسے شخص کے بارے سوال کیا گیا کہ جس کو پتھر مارا گیا یا اس کے سر کو مارا گیا پھر اس کی قوت گویائی ختم ہوگئی اور اس کی نظر اور شنوائی بھی چلی گئی؟ تو حسن نے فرمایا کہ اس میں کئی دیتیں لازم ہوں گی ایک اس کی سماعت کی ایک اس کی بینائی کی، اور ایک اس کی زبان کی تو حسن سے کہا گیا کہ ”پھر تو وہ اچھا رہا“ تو آپ نے جواب دیا کہ اللہ کی قسم نہ وہ اچھا رہا ہے اور نہ اس نے فلاح پائی ہے۔ [مصنف ابن ابي شيبه/كتاب الديات/حدیث: 28619]

حضرت ابن جریج نے فرمایا ہے کہ مجھ کو یہ خبر ملی ہے کہ عمر بن عبدالعزیز کے پاس ایک آدمی نے آ کر کہا کہ مجھے فلاں شخص نے مارا ہے یہاں تک کہ میرا ایک کان بہرا ہوگیا ہے تو حضرت عمر نے فرمایا ہمیں کیسے پتہ چلے گا تو اس نے جواب دیا کہ اطباء کو بلا لیجیے تو انہوں نے اطباء کو بلایا پھر انہوں نے سونگھ کر کہا کہ یہ بہرہ ہے۔ [مصنف ابن ابي شيبه/كتاب الديات/حدیث: 28620]