حضرت ابن جریج نے فرمایا کہ مجھ کو عبدالعزیز بن عمر نے یہ خبر دی ہے کہامرائے اجناد نے عمر بن عبدالعزیز کے لیے اتفاق کیا ہے اس بات میں کہ جب ٹیڑھا پن ایسا ہو کہ آدمی دوسری جانب جس طرف سے چہرہ مڑ چکا ہے توجہ نہ کرسکے تو پچاس دینار ہیں۔ [مصنف ابن ابي شيبه/كتاب الديات/حدیث: 28631]

حضرت سعیدبن مسیب سے مروی ہے کہ ایک آدمی نے دوسرے کی آنکھ کو زخمی کردیا، اس کی بینائی کا کچھ حصہ ختم ہوگیا۔ یہ مقدمہ حضرت علی رضی اللہ عنہ کے پاس لایا گیا آپ نے اس کی صحیح آنکھ کو باندھنے کا حکم دیا اور ایک آدمی کو انڈا لے کر چلنے کا حکم دیا اور آدمی دیکھتا رہا یہاں تک کہ اس کی نظر ختم ہوگئی پھر اس جگہ ایک نشان گاڑ دیا سعید بن مسیب کا ارشاد ہے کہ پھر انہوں نے اس میں غور کیا تو اس کو برابر پایا تو علی رضی اللہ عنہ نے کہا کہ اس کو دوسرے کے مال سے نظر میں نقصان کے بقدر حصہ دے دو۔ [مصنف ابن ابي شيبه/كتاب الديات/حدیث: 28632]

حسن سے ایسے شخص کے بارے میں کہ جس نے دوسرے کی آنکھ کو پھوڑ دیا ہو جبکہ وہ اس سے دیکھتا ہو ارشاد منقول ہے کہ جتنا نظر میں نقصان ہوا ہے اس کے بقدر تاوان لازم کیا جائے گا۔ [مصنف ابن ابي شيبه/كتاب الديات/حدیث: 28633]

حضرت ابن جریج کا ارشاد ہے کہ عطاء نے فرمایا کہ آنکھ میں پچاس اونٹ ہیں اور فرمایا کہ کچھ نظر چلی جائے اور کچھ باقی ہو تو جتنی چلی گئی اس کے حساب سے دیت ہوگی پھر فرمایا کہ صحیح آنکھ کو باندھ کر دوسری سے دیکھے گا پھر دوسری کو باندھ کر صحیح سے دیکھے گا اور جس قدر نظر کم ہوچکی ہے اس کے حساب سے دیت ہوگی میں نے پوچھا کہ اگر آنکھ بڑھاپے کی وجہ سے کمزور ہوچکی ہو اور اس کو کوئی زخم آجائے؟ تو جواب دیا کہ اس کی دیت کامل ہوگی۔ [مصنف ابن ابي شيبه/كتاب الديات/حدیث: 28634]

حضرت شعبی کا ارشاد ہے کہ جس شخص کی آنکھ زخمی ہوگئی تھی اس کے بارے میں علی رضی اللہ عنہ کا قول ذکر کیا گیا کہ انہوں نے اس کو انڈہ دکھایا، تو شعبی نے فرمایا کہ وہ چاہے تو اپنی بینائی والی آنکھ کے بارے میں زیادتی کر دے اور کہے کہ وہ اس سے جتنا دیکھتا ہے اس سے زیادہ دیکھتا ہے، اور چاہے تو زخم خوردہ آنکھ کے بارے میں کمی کر دے اور کہے کہ وہ اس سے نہیں دیکھتا حالانکہ وہ اس سے دیکھتا ہے، لیکن اس سے بہتر یہ ہے کہ طبیب دیکھے کہ وہ کیا دیکھ سکتا ہے پھر نقصان کو دیکھ لیا جائے گا (اندازہ لگا لیا جائے گا) [مصنف ابن ابي شيبه/كتاب الديات/حدیث: 28635]

حضرت زید سے مروی ہے کہ نچلے ہونٹ میں دو تہائی دیت ہے کیونکہ وہ کھانے اور پانی کو روک کر رکھتا ہے، اور اوپر والے ہونٹ میں تہائی دیت ہے۔ [مصنف ابن ابي شيبه/كتاب الديات/حدیث: 28636]

حضرت سعید بن مسیب سے روایت ہے کہ نچلے ہونٹ میں دو تہائی اور اوپر والے میں ایک تہائی دیت ہے۔ [مصنف ابن ابي شيبه/كتاب الديات/حدیث: 28637]

حضرت محمد بن اسحق کا ارشاد ہے کہ دونوں ہونٹوں میں دیت ہے نچلے میں دو تہائی اور اوپر والے میں ایک تہائی۔ [مصنف ابن ابي شيبه/كتاب الديات/حدیث: 28638]

حضرت حسن فرماتے ہیں کہ دونوں ہونٹوں میں دیت ہے اور ان میں سے ایک میں آدھی دیت ہے۔ [مصنف ابن ابي شيبه/كتاب الديات/حدیث: 28639]

حضرت شریح سے روایت ہے کہ دونوں ہونٹوں میں پوری دیت ہے۔ [مصنف ابن ابي شيبه/كتاب الديات/حدیث: 28640]