حضرت معمر فرماتے ہیں کہ حضرت زھری سے اس شخص کے بارے میں مروی ہے جو جانور سے جماع کرے آپ نے فرمایا: اس پر دو حدوں میں سے کم تر حد جاری ہوگی: شادی شدہ ہو یا شادی شدہ نہ ہو۔ [مصنف ابن ابي شيبه/كتاب الحدود/حدیث: 30420]

حضرت ابن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: جانور سے بدفعلی کرنے والے کو اور اس جانور کو قتل کردو۔ [مصنف ابن ابي شيبه/كتاب الحدود/حدیث: 30421]

حضرت عمیر بن نمیر فرماتے ہیں کہ حضرت ابن عمر رضی اللہ عنہما سے ایک باندی کے متعلق سوال کیا گیا جو دو آدمیوں کے درمیان مشترک تھی پس ان میں سے ایک نے اس سے وطی کرلی تو اس کا کیا حکم ہے؟ آپ نے فرمایا: اس پر حد جاری نہیں ہوگی وہ خائن شمار ہوگا اس پر قیمت لازم ہوجائے گی اور وہ اس باندی کو لے لے گا۔ [مصنف ابن ابي شيبه/كتاب الحدود/حدیث: 30422]

حضرت داود فرماتے ہیں کہ حضرت سعید بن مسیب سے اس باندی کے بارے میں مروی ہے جو دو آدمیوں کے درمیان مشترک ہو پس ان میں سے ایک نے اس سے وطی کرلی آپ نے فرمایا: اس کو ننانوے کوڑے مارے جائیں گے۔ [مصنف ابن ابي شيبه/كتاب الحدود/حدیث: 30423]

حضرت عبدہ فرماتے ہیں کہ حضرت شریح نے اس سے سزا کو زائل کردیا اور اس کو ضامن بنایا۔ [مصنف ابن ابي شيبه/كتاب الحدود/حدیث: 30424]

حضرت معمر فرماتے ہیں کہ حضرت زھری سے اس باندی کے بارے میں مروی ہے جو چند شریکوں کے درمیان مشترک تھی پس ان میں سے ایک نے اس باندی سے وطی کرلی آپ نے فرمایا: اسے سو کوڑے مارے جائیں گے۔ [مصنف ابن ابي شيبه/كتاب الحدود/حدیث: 30425]

حضرت اوزاعی فرماتے ہیں کہ حضرت مکحول سے ایک باندی کے بارے میں مروی ہے جو تین آدمیوں کے درمیان مشترک تھی پس ان میں سے ایک نے اس سے وطی کرلی۔ آپ نے فرمایا: اس پر دو حدوں میں سے کم تر حد یعنی سو کوڑے جاری ہوں گے اور اس شخص پر اس کی قیمت کا دو تہائی حصہ لازم ہوگا اور شبہ میں وطی کرنے کی وجہ سے اس کے مہر کا دوتہائی حصہ لازم ہوگا اور اگر بچہ ہو تو اس کی قیمت کا بھی دو تہائی حصہ لازم ہوگا۔ [مصنف ابن ابي شيبه/كتاب الحدود/حدیث: 30426]

حضرت ہشام فرماتے ہیں کہ حضرت حسن بصری نے ارشاد فرمایا: اس کو تعزیزاً سزا دی جائے گئی اور اس پر اس باندی کی قیمت لازم کردی جائے گی۔ [مصنف ابن ابي شيبه/كتاب الحدود/حدیث: 30427]

حضرت جعفر بن برقان فرماتے ہیں کہ ہمیں خبر پہنچی ہے کہ حضرت عمر بن عبدالعزیز کے پاس ایک باندی لائی گئی جو دو آدمیوں کے درمیان مشترک تھی پس ان میں سے ایک نے اس سے وطی کرلی تو آپ نے اس بارے میں حضرت سعید بن مسیب، حضرت سعید بن جبیر اور حضرت عروہ بن زبیر سے مشورہ مانگا ان سب نے فرمایا: ہماری رائے یہ ہے کہ اس کو حد کی مقدار مقررہ سے کم کوڑے مارے جائیں اور اس باندی کی قیمت لگائی جائے، پھر وہ شخص اپنے شریک کو اس کی آدھی قیمت ادا کرے۔ [مصنف ابن ابي شيبه/كتاب الحدود/حدیث: 30428]

حضرت عبدالاعلی رحمہ اللہ فرماتے ہیں کہ یونس سے ایک آدمی کے بارے میں مروی ہے جس نے ایک باندی سے وطی کرلی جو اس کے اور اس کے شر یک کے درمیان مشترک تھی۔ آپ نے فرمایا: اس پر اس باندی کی قیمت لازم ہوگی۔ [مصنف ابن ابي شيبه/كتاب الحدود/حدیث: 30429]