حضرت ابو وائل فرماتے ہیں کہ حضرت عبداللہ بن مسعود نے ارشاد فرمایا: قتل اور کوڑے کو مسلمانوں سے اپنی طاقت کے بقدر زائل کرو۔ [مصنف ابن ابي شيبه/كتاب الحدود/حدیث: 30400]

حضرت اعمش فرماتے ہیں کہ حضرت ابراہیم نے ارشاد فرمایا: اعتراف کرنے والوں سے سزاؤں کو دور کرو۔ [مصنف ابن ابي شيبه/كتاب الحدود/حدیث: 30401]

حضرت کلیب فرماتے ہیں کہ حضرت ابو موسیٰ اشعری نے ارشاد فرمایا: میں یمن میں تھا کہ میرے پاس ایک حاملہ عورت لائی گئی میں نے اس سے اس بارے میں سوال کیا؟ تو اس نے کہا: کیا آپ ایسی حاملہ عورت کے متعلق پوچھ رہے ہیں جو ثیبہ ہے اور بغیر خاوند کے حاملہ ہے؟ اللہ کی قسم! جب سے میں اسلام لائی ہوں نہ میں نے کسی کو دوست بنایا اور نہ ہی کسی کو ہمنشین بنایا ہے لیکن ایک دن میں اپنے گھر کے صحن میں سوئی ہوئی تھی۔ اللہ کی قسم! مجھے بیدار نہیں کیا گیا مگر ایک آدمی نے اس نے مجھے پاؤں سے ٹھوکر ماری اور اس نے میرے پیٹ میں ستارے جیسی چیز ڈال دی پھر میں نے اسے پیٹھ پھیر کر جاتے ہوئے دیکھا میں نہیں جانتی کہ وہ اللہ کی مخلوق میں سے کون تھا؟ آپ فرماتے ہیں: میں نے اس بارے میں حضرت عمر کو خط لکھا: تو حضرت عمر نے جواب لکھا: اس عورت کو اور اس کی قوم کے چند لوگوں کو میرے پاس لے کر آؤ آپ فرماتے ہیں: ہم لوگ موسم حج میں ان کے پاس آئے حضرت عمر نے غصہ کی سی حالت میں فرمایا: شاید کہ تم اس عورت کے معاملہ میں مجھ پر کچھ سبقت لے گئے ہو؟ میں نے کہا: نہیں، وہ عورت اور اس کی قوم کے چند لوگ میرے ساتھ ہیں۔ پھر آپ نے اس عورت سے سوال کیا، تو اس نے آپ کو بھی ویسے ہی بات بتلائی جیسے اس نے مجھے بتلائی تھی۔ پھر آپ نے اس کی قوم سے اس کے متعلق پوچھا: تو ان لوگوں نے اس کی تعریف بیان کی اس پر حضرت عمر نے فرمایا: تِھَامیۃ کی جوان عورت بہت سونے والی ہے کبھی کبھار ایسا ہوجاتا ہے پس آپ نے اسے خوراک دی اور اسے کپڑے پہنائے اور اس کی قوم کو اس کے ساتھ اچھے برتاؤ کی وصیت کی۔ [مصنف ابن ابي شيبه/كتاب الحدود/حدیث: 30402]

حضرت نزال بن سبرہ فرماتے ہیں کہ اس درمیان کہ ہم منی میں حضرت عمر کے ساتھ تھے ایک بھاری بھر کم عورت گدھے پر رو رہی تھی۔ قریب تھا کہ لوگ رش سے اس کو مار دیتے۔ وہ کہہ رہے تھے: تو نے زنا کیا ہے۔ پس جب وہ حضرت عمر کے پاس پہنچی آپ نے پوچھا: کس بات نے تجھے رلایا؟ بیشک کبھی کبھار عورت کو بدکاری پر مجبور بھی کردیا جاتا ہے! اس عورت نے کہا: میں بہت زیادہ سونے والی عورت ہوں اور اللہ رب العزت مجھے رات کی نماز کی توفیق عطا فرماتے تھے پس میں نے ایک رات نماز پڑھی پھر میں سو گئی اللہ کی قسم! مجھے بیدار نہیں کیا مگر اس آدمی نے تحقیق جو مجھ پر سوار ہوچکا تھا۔ میں نے اسے پیٹھ پھیر کر جاتے ہوئے دیکھا میں نہیں جانتی کہ وہ اللہ کی مخلوق میں سے کون تھا؟ اس پر حضرت عمر نے ارشاد فرمایا: اگر میں اس کو قتل کردوں تو مجھے دونوں پہاڑوں (اخشبین) پر آگ کا خوف ہے پھر آپ نے شہروں میں خط لکھ دیا: کہ آپ سے پوچھے بغیر کسی جان کو قتل نہ کیا جائے۔ [مصنف ابن ابي شيبه/كتاب الحدود/حدیث: 30403]

حضرت عروہ فرماتے ہیں کہ حضرت عائشہ رضی اللہ عنہا نے ارشاد فرمایا: سزاؤں کو مسلمانوں سے اپنی طاقت کے بقدر دور کرو پس جب تم مسلمانوں کے لیے نکلنے کا کوئی راستہ پاؤ تو ان کو چھوڑ دو اس لیے کہ حاکم کا معافی میں غلطی کرنا سزا میں غلطی کرنے سے بہتر ہے۔ [مصنف ابن ابي شيبه/كتاب الحدود/حدیث: 30404]

حضرت ابو رزین فرماتے ہیں کہ حضرت ابن عباس رضی اللہ عنہما نے ارشاد فرمایا: جس نے جانور سے صحبت کی تو اس پر حد جاری نہیں ہوگی۔ [مصنف ابن ابي شيبه/كتاب الحدود/حدیث: 30405]

حضرت منصور فرماتے ہیں کہ حضرت حکم سے اس شخص کے بارے میں مروی ہے جو جانور سے جماع کرے آپ نے فرمایا: اسے کوڑے مارے جائیں گے اور کوڑوں کو حد کی مقدار تک نہیں پہنچایا جائے گا۔ [مصنف ابن ابي شيبه/كتاب الحدود/حدیث: 30406]

حضرت حجاج فرماتے ہیں کہ حضرت عطاء سے اس شخص کے بارے میں مروی ہے کہ جو جانور سے جماع کرے آپ نے فرمایا: اسے تعزیزاً سزا دی جائے۔ [مصنف ابن ابي شيبه/كتاب الحدود/حدیث: 30407]

حضرت جابر فرماتے ہیں کہ حضرت عامر نے ارشاد فرمایا: اس شخص پر حد نہیں ہوگی جو جانور سے جماع کرلے اور نہ اس شخص پر جو کسی پر اس بات کا الزام لگائے۔ [مصنف ابن ابي شيبه/كتاب الحدود/حدیث: 30408]

حضرت ابراہیم فرماتے ہیں کہ حضرت عمر نے ارشاد فرمایا: اس شخص پر حد نہیں ہوگی جو جانور سے جماع کرے۔ [مصنف ابن ابي شيبه/كتاب الحدود/حدیث: 30409]