حضرت قاسم فرماتے ہیں کہ حضرت ابو ذر نے ارشاد فرمایا: دونوں بوڑھے شادی شدہ مرد اور عورت کو کوڑے مارے جائیں گے اور دونوں کو سنگسار کردیا جائے گا اور دونوں غیر شادی شدہ مرد اور عورت کو کوڑے مارے جائیں گے اور دونوں کو جلا وطن کردیا جائے گا۔ [مصنف ابن ابي شيبه/كتاب الحدود/حدیث: 30710]

حضرت ابن طاؤس فرماتے ہیں کہ ان کے والد حضرت طاؤس نے ارشاد فرمایا: شادی شدہ جب زنا کرے تو اس پر رجم کی سزا جاری ہوگی اور غیر شادی شدہ پر کوڑوں اور جلا وطنی کی سزا جاری ہوگی۔ [مصنف ابن ابي شيبه/كتاب الحدود/حدیث: 30711]

حضرت محمد بن سالم فرماتے ہیں کہ حضرت عامر سے غیر شادی شدہ کے بارے میں مروی ہے کہ جب وہ زنا کرلے تو اس کو ایک سال کے لیے جلا وطن کردیا جائے۔ [مصنف ابن ابي شيبه/كتاب الحدود/حدیث: 30712]

حضرت عبدالرحمن فرماتے ہیں کہ حضرت علی رضی اللہ عنہ نے کوڑے مارے اور سنگسار کیا۔ آپ نے جمعرات کے دن کوڑے مارے اور جمعہ کے دن سنگسار کیا۔ [مصنف ابن ابي شيبه/كتاب الحدود/حدیث: 30713]

حضرت جابر بن سمرہ فرماتے ہیں کہ نبی کریم صلی اللہ علیہ وآلہ وسلم نے ماعز بن مالک کو سنگسار کیا اور راوی نے کوڑوں کا ذکر نہیں کیا۔ [مصنف ابن ابي شيبه/كتاب الحدود/حدیث: 30714]

حضرت صفیہ بنت ابی عبید فرماتی ہیں کہ حضرت ابوبکر نے ایک آدمی کو کوڑے مارے جس نے کسی باکرہ باندی سے وطی کر کے اسے حاملہ کردیا تھا اور اس نے اعتراف بھی کیا تھا اور وہ شادی شدہ نہیں تھا تو حضرت ابوبکر کے حکم سے اسے کوڑے مارے گئے پھر اسے جلا وطن کردیا گیا۔ [مصنف ابن ابي شيبه/كتاب الحدود/حدیث: 30715]

حضرت اسلم فرماتے ہیں کہ حضرت عمر نے فدک کی طرف جلا وطن کردیا۔ [مصنف ابن ابي شيبه/كتاب الحدود/حدیث: 30716]

حضرت ابن یسار جو کہ حضرت عثمان کے آزاد کردہ غلام ہیں وہ فرماتے ہیں: حضرت عثمان نے ایک عورت کو زنا میں کوڑے مارے پھر آپ نے اس کو اپنے آزاد کردہ غلام جس کا نام مھری تھا کے ساتھ خیبر بھیج دیا آپ نے اس کو وہاں جلا وطن کیا تھا۔ [مصنف ابن ابي شيبه/كتاب الحدود/حدیث: 30717]

حضرت ابو اسحاق قبیلے کے لوگوں سے نقل کرتے ہیں کہ حضرت علی رضی اللہ عنہ نے بصرہ کی طرف جلا وطن کردیا۔ [مصنف ابن ابي شيبه/كتاب الحدود/حدیث: 30718]

حضرت ابو اسحاق فرماتے ہیں کہ حضرت علی رضی اللہ عنہ کے پاس ھمدان کی ایک باندی لائی گئی۔ آپ نے اسے کوڑے مارے اور آپ نے اسے ایک سال کے لیے بصرہ کی طرف جلا وطن کرکے روانہ کردیا۔ [مصنف ابن ابي شيبه/كتاب الحدود/حدیث: 30719]