حضرت اوزاعی فرماتے ہیں کہ حضرت زھری سے اس شخص کے بارے میں مروی ہے جو عرب کے آدمی کو یوں کہہ دے: بیشک تو مولیٰ (آزاد کردہ غلام) ہے، آپ نے فرمایا: اس پر حد لگائی جائے گی۔ [مصنف ابن ابي شيبه/كتاب الحدود/حدیث: 30910]

حضرت سفیان بن حسین فرماتے ہیں کہ حضرت حسن بصری نے ارشاد فرمایا: جب آدمی چھوٹی بچی سے زنا کرے تو اسے کوڑے مارے جائیں گے اور اسے سنگسار نہیں کیا جائے گا اور اس بچی پر کچھ لازم نہیں ہوگا اور جب کوئی بچہ کسی عورت سے زنا کرے تو اس عورت کو کوڑے مارے جائیں گے اور اس عورت کو سنگسار نہیں کیا جائے گا اور اس بچہ پر شرعی حد سے کم سزا ہوگی۔ [مصنف ابن ابي شيبه/كتاب الحدود/حدیث: 30911]

حضرت مغیرہ فرماتے ہیں کہ حضرت ابراہیم سے ایک آدمی کے بارے میں مروی ہے جس نے کسی بچی کا پردہ بکارت زائل کردیا ہو آپ نے فرمایا: اس پر اس بچی کے لیے وطی بالشبہ کا مہر لازم ہوگا۔ [مصنف ابن ابي شيبه/كتاب الحدود/حدیث: 30912]

حضرت ابن محیریز فرماتے ہیں کہ حضرت فضالہ بن عبید سے میں نے چور کا ہاتھ اس کی گردن میں لٹکا دینے کے متعلق سوال کیا؟ آپ نے فرمایا: سنت ہے۔ رسول اللہ صلی اللہ علیہ وآلہ وسلم نے ایک آدمی کا ہاتھ کاٹا پھر آپ صلی اللہ علیہ وآلہ وسلم نے اسے اس کی گردن میں لٹکا دیا۔ [مصنف ابن ابي شيبه/كتاب الحدود/حدیث: 30913]

حضرت عبدالرحمن فرماتے ہیں کہ حضرت علی رضی اللہ عنہ نے ایک چور کا ہاتھ کاٹا، پس میں نے اسے لٹکا ہوا دیکھا یعنی اس کی گردن میں۔ [مصنف ابن ابي شيبه/كتاب الحدود/حدیث: 30914]

حضرت عبدالرحمن فرماتے ہیں کہ حضرت علی رضی اللہ عنہ نے ایک چور کا ہاتھ کاٹا پھر آپ نے اسے اس کی گردن میں لٹکا دیا۔ [مصنف ابن ابي شيبه/كتاب الحدود/حدیث: 30915]

حضرت اشعث فرماتے ہیں کہ حسن بصری نے ارشاد فرمایا: جادوگروں کو قتل کردیا جائے گا اور ان سے توبہ طلب نہیں کی جائے گی۔ [مصنف ابن ابي شيبه/كتاب الحدود/حدیث: 30916]

حضرت حارثہ بن مضرب فرماتے ہیں کہ حضرت جندب نے ایک جادوگر کو قتل کردیا یا آپ نے اس کو قتل کرنے کا ارادہ کیا۔ [مصنف ابن ابي شيبه/كتاب الحدود/حدیث: 30917]

حضرت سالم فرماتے ہیں کہ حضرت قیس بن عباد نے ایک جادوگر کو قتل کیا۔ [مصنف ابن ابي شيبه/كتاب الحدود/حدیث: 30918]

حضرت ھمام بن یحییٰ فرماتے ہیں کہ عمان کے گورنر نے حضرت عمر بن عبدالعزیز کو ایک جادوگرنی کے بارے میں خط لکھا جس کو اس نے پکڑا تھا۔ پس حضرت عمر نے اس کی طرف جواب لکھا: اگر وہ عورت اعتراف کرلے یا اس پر بینہ قائم ہوجائے تو اس کو قتل کردو۔ [مصنف ابن ابي شيبه/كتاب الحدود/حدیث: 30919]