حضرت جدلی فرماتے ہیں کہ حضرت ابن عمر رضی اللہ عنہما نے ارشاد فرمایا: جو شخص رات میں دس آیات کی تلاوت کرے تو وہ غافلین میں شمار نہیں ہوگا۔ [مصنف ابن ابي شيبه/كتاب فضائل القرآن/حدیث: 32083]

حضرت منصور فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: اگر ایک آدمی رات گزارے اللہ کے راستہ میں لوگوں کو عمدہ گھوڑوں پر سوار کرتے ہوئے اور ایک آدمی رات گزارتا ہے کتاب اللہ کی تلاوت کرتے ہوئے تو ان دونوں میں سے افضل اللہ کا ذکر کرنے والا ہوگا۔ [مصنف ابن ابي شيبه/كتاب فضائل القرآن/حدیث: 32084]

راوی کہتے ہیں: حضرت عبد اللہ بن عمرو رضی اللہ عنہ نے بھی فرمایا: اگر کوئی شخص رات گزارے اس حال میں کہ وہ ایک ایک دینار اور ایک ایک درھم خرچ کرے، اور اللہ کے راستہ میں لوگوں کو عمدہ گھوڑوں پر سوار کرے یہاں تک کہ صبح کرے اس حال میں کہ اس کا یہ عمل قبول کرلیا گیا ہو۔ اور میں رات گزاروں کتاب اللہ کی تلاوت کرتے ہوئے یہاں تک کہ صبح کروں اس حال میں کہ میرے اس عمل کو قبول کرلیا گیا ہو۔ میں پسند نہیں کرتا کہ مجھے اپنے عمل کے بدلے اس کے عمل کا ثواب مل جائے۔ [مصنف ابن ابي شيبه/كتاب فضائل القرآن/حدیث: 32085]

حضرت ابو عثمان فرماتے ہیں کہ حضرت سلمان نے ارشاد فرمایا: اگر ایک شخص رات گزارے اس حال میں کہ وہ غلام اور باندیاں عطا کرتا ہو: اور دوسرا رات گزارے اس حال میں کہ وہ قرآن پڑھتا ہو اور اللہ کا ذکر کرتا ہو میرے خیال میں اللہ کا ذکر کرنے والاسب سے افضل ہوگا۔ [مصنف ابن ابي شيبه/كتاب فضائل القرآن/حدیث: 32086]

حضرت شقیق فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: قرآن کا پڑھنا میرے لیے روزہ رکھنے سے زیادہ پسندیدہ ہے۔ [مصنف ابن ابي شيبه/كتاب فضائل القرآن/حدیث: 32087]

حضرت ابو رزین فرماتے ہیں کہ ایک آدمی نے حضرت حبہ بن سلمہ سے کہا جو حضرت عبد اللہ بن مسعود رضی اللہ عنہ کے اصحاب میں سے ہیں۔ میں نے سارا قرآن پڑھ لیا: آپ نے فرمایا: تو نے قرآن میں کیا سمجھا؟! [مصنف ابن ابي شيبه/كتاب فضائل القرآن/حدیث: 32088]

حضرت نافع فرماتے ہیں کہ حضرت ابن عمر رضی اللہ عنہما یوں کہنا ناپسند کرتے تھے: کہ میں نے سارا قرآن پڑھ لیا۔ [مصنف ابن ابي شيبه/كتاب فضائل القرآن/حدیث: 32089]

حضرت عبد اللہ بن سلمہ فرماتے ہیں کہ حضرت حذیفہ رضی اللہ عنہ نے ارشاد فرمایا: تم نے اس کا چوتھائی حصہ بھی نہیں پڑھا۔ یعنی سورۃ براءت کا۔ [مصنف ابن ابي شيبه/كتاب فضائل القرآن/حدیث: 32090]

حضرت نافع فرماتے ہیں کہ حضرت ابن عمر رضی اللہ عنہما ناپسند کرتے تھے: قرآن کی سورتوں کو مفصل کہنا: اور فرماتے تھے: قرآن مجید سارا مفصل و واضح ہے۔ لیکن تم یوں کہا کرو قرآن کی چھوٹی سورتیں۔ [مصنف ابن ابي شيبه/كتاب فضائل القرآن/حدیث: 32091]

حضرت سالم فرماتے ہیں کہ حضرت ابن عمر رضی اللہ عنہما نے ارشاد فرمایا: مجھ سے حضرت عمر نے پوچھا: تمہیں کتنا قرآن یاد ہے؟ میں نے کہا: دس سورتیں، پھر انہوں نے عبید اللہ بن عمر سے پوچھا: تمہیں کتنا قرآن یاد ہے؟ انہوں نے کہا: ایک سورت، حضرت عبد اللہ فرماتے ہیں: پھر نہ انہوں نے ہمیں کسی کا م کا حکم دیا اور نہ ہی کسی کام سے منع کیا سوائے اس بات کے کہ انہوں نے کہا: پس اگر تم قرآن میں سے کچھ سیکھو تو تم پر یہ مفصل سورتیں لازم ہیں۔ اس لیے کہ یہ زیادہ محفوظ رہتی ہیں۔ [مصنف ابن ابي شيبه/كتاب فضائل القرآن/حدیث: 32092]