حضرت عمرو بن مرہ فرماتے ہیں کہ حضرت مجاہد نے ارشاد فرمایا: حامل قرآن سے کہا جائے گا: قرآن پڑھتا جا اور جنت کے درجات پر چڑھتا جا، راوی فرماتے ہیں: پس ہر آیت کے بدلے ایک درجہ بلند کیا جائے گا: اور ہر آیت کے ساتھ مزید ایک نیکی بڑھائی جائے گی۔ [مصنف ابن ابي شيبه/كتاب فضائل القرآن/حدیث: 32053]

حضرت ابو الضحی فرماتے ہیں کہ حضرت ضحاک بن قیس فرمایا کرتے تھے، اے لوگو! اپنے بچوں اور گھر والوں کو قرآن سکھاؤ۔ پس جس مسلمان کے لیے لکھ دیا جاتا ہے کہ اللہ اس کو جنت میں داخل کرے گا، دو فرشتے اس کے پاس آئیں گے پس اس کو دونوں طرف سے گھیر لیں گے، وہ دونوں اس سے کہیں گے: قرآن پڑھتا جا اور جنت کے درجوں میں چڑھتا جا۔ یہاں تک کہ وہ دونوں اس کو اتاریں گے اس جگہ جہاں اس کا قرآن کا علم مکمل ہوجائے گا۔ [مصنف ابن ابي شيبه/كتاب فضائل القرآن/حدیث: 32054]

حضرت قتادہ فرماتے ہیں کہ حضرت انس نے ارشاد فرمایا: حضرت معاذ اور حضرت ابی ّ اور حضرت سعد اور حضرت ابو زید نے قرآن پڑھا، قتادہ فرماتے ہیں! میں نے پوچھا! ابو زید کون تھے؟ آپ نے فرمایا: نبی کریم صلی اللہ علیہ وآلہ وسلم کے زمانے میں میرے چچاؤں میں سے ایک تھے۔ [مصنف ابن ابي شيبه/كتاب فضائل القرآن/حدیث: 32055]

اسماعیل فرماتے ہیں کہ امام شعبی نے ارشاد فرمایا: ان حضرات نے نبی صلی اللہ علیہ وآلہ وسلم کے زمانے میں قرآن پڑھا حضرت ابی ّ، حضرت معاذ، حضرت زید، حضرت ابو زید، حضرت ابو الدرداء، اور حضرت سعید بن عبید، اور نبی صلی اللہ علیہ وآلہ وسلم کے خلفاء میں سے کسی نے بھی قرآن نہیں پڑھا سوائے حضرت عثمان کے۔ اور حضرت مجمع بن جاریہ نے بھی قرآن پڑھا سوائے ایک یا دو سورتوں کے۔ [مصنف ابن ابي شيبه/كتاب فضائل القرآن/حدیث: 32056]

حضرت عبد اللہ بن مسعود رضی اللہ عنہ فرماتے ہیں کہ حضرت معاذ نبی صلی اللہ علیہ وآلہ وسلم کے پاس حاضر ہوئے اور فرمایا: اے اللہ کے رسول (صلی اللہ علیہ وآلہ وسلم)! مجھے قرآن پڑھا دیجیے۔ پس رسول اللہ صلی اللہ علیہ وآلہ وسلم نے فرمایا: اے عبد اللہ! اس کو قرآن پڑھا دو۔ پس جو مجھے یاد تھا میں نے ان کو پڑھا دیا، پھر میں اور وہ رسول اللہ صلی اللہ علیہ وآلہ وسلم کے پاس گئے، تو حضرت معاذ نے آپ صلی اللہ علیہ وآلہ وسلم کے سامنے قرآن پڑھا۔ اور حضرت معاذ رسول اللہ صلی اللہ علیہ وآلہ وسلم کے زمانے میں قرآن سکھانے والے معلمین میں سے ایک معلم تھے۔ [مصنف ابن ابي شيبه/كتاب فضائل القرآن/حدیث: 32057]

حضرت خمیر بن مالک فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: میں نے رسول اللہ صلی اللہ علیہ وآلہ وسلم کے منہ مبارک سے ستر سورتیں سیکھی ہیں۔ اور اس وقت زید بن ثابت مکتب میں تھے اور ان کے سر پر دو لٹیں تھیں۔ [مصنف ابن ابي شيبه/كتاب فضائل القرآن/حدیث: 32058]

حضرت سعید بن جبیر فرماتے ہیں کہ حضرت ابن عباس رضی اللہ عنہما نے ارشاد فرمایا: میں نے رسول اللہ صلی اللہ علیہ وآلہ وسلم کے زمانے میں محکم جمع کیا تھا۔ یعنی مفصل سورتیں۔ [مصنف ابن ابي شيبه/كتاب فضائل القرآن/حدیث: 32059]

حضرت ہشام فرماتے ہیں کہ حضرت محمد نے ارشاد فرمایا: ہمارے ساتھی اس بات میں اختلاف نہیں کرتے تھے کہ بیشک رسول اللہ صلی اللہ علیہ وآلہ وسلم وصال فرما گئے اس حال میں کہ آپ صلی اللہ علیہ وآلہ وسلم کے اصحاب میں سے صرف چار نے قرآن پڑھا تھا۔ اور وہ سب انصار میں سے تھے۔ حضرت معاذ بن جبل، حضرت ابی ّ بن کعب، حضرت زید اور حضرت ابو زید۔ [مصنف ابن ابي شيبه/كتاب فضائل القرآن/حدیث: 32060]

حضرت عطیہ فرماتے ہیں کہ حضرت ابو سعید نے اللہ کے قول (کہو یہ اللہ کے فضل سے اور اس کی رحمت سے ہے سو ا س پر ان کو خوش ہونا چاہیے) کے بارے میں ارشاد فرمایا: اللہ کے فضل سے مراد قرآن ہے، اور اس کی رحمت سے مراد: یہ کہ تمہیں قرآن کا اھل بنادیا جائے۔ [مصنف ابن ابي شيبه/كتاب فضائل القرآن/حدیث: 32061]

حضرت منصور فرماتے ہیں کہ اللہ کے اس قول (کہو یہ اللہ کے فضل سے اور اس کی رحمت سے ہے سو اس پر ان کو خوش ہونا چاہیے۔ یہ بہتر ہے ان سب چیزوں سے جو وہ جمع کر رہے ہیں)۔ حضرت ھلال بن یساف نے ارشاد فرمایا: کتا باللہ اور اسلام بہتر ہیں ان چیزوں سے جو وہ جمع کر رہے ہیں۔ [مصنف ابن ابي شيبه/كتاب فضائل القرآن/حدیث: 32062]