عامر بن عبد اللہ بن زبیر سے روایت ہے کہ حضرت ابن مسعود رضی اللہ عنہ نے وصیت کی اور اپنی وصیت میں لکھا: ”بِسْمِ اللہِ الرَّحْمَن الرَّحِیمِ یہ وصیت ہے ابن مسعود کی اگر اس کو اس بیماری میں موت آجائے۔“ [مصنف ابن ابي شيبه/كتاب الوصايا/حدیث: 32858]

ہشام روایت کرتے ہیں کہ محمد نے فرمایا: لوگ جب وصیت کیا کرتے تھے تو اپنی وصیت میں لکھ دیا کرتے تھے کہ: ”اگر مجھے اپنی وصیت میں تبدیلی کرنے سے پہلے موت آجائے۔“ [مصنف ابن ابي شيبه/كتاب الوصايا/حدیث: 32859]

ابو خلدہ سے روایت ہے کہ ابو العالیہ نے فرمایا: میں دس سے زائد مرتبہ وصیت کرچکا ہوں، میں وصیت کا ایک وقت مقرر کردیتا ہوں، جب وہ وقت آتا ہے تو مجھے اختیار حاصل ہوجاتا ہے (اس وصیت کو باقی رکھوں یا بدل دوں)۔ [مصنف ابن ابي شيبه/كتاب الوصايا/حدیث: 32860]

نافع سے روایت ہے کہ حضرت ابن عمر رضی اللہ عنہما نے اپنی وصیت میں یہ شرط لگائی تھی ”اگر مجھے اس تحریر میں تبدیلی کرنے سے پہلے موت آجائے۔“ [مصنف ابن ابي شيبه/كتاب الوصايا/حدیث: 32861]

ابن طاؤس سے روایت ہے کہ یمن کے ایک باشندے نے وصیت کی اور یوں کہا: فلاں غلام آزاد ہے، اور فلاں غلام آزاد ہے، (ان کے نام نہیں لیے) ”اگر میں اس بیماری میں مر جاؤں“ چناچہ وہ آدمی صحت یاب ہوگیا، اس کے غلاموں نے جَنَد کے قاضی کے پاس دعویٰ دائر کیا، انہوں نے حضرت طاؤس سے مشورہ کیا تو طاؤس نے فرمایا: وہ غلام ہیں کیونکہ اس آدمی کی نیت ہی میں یہ بات تھی کہ: ”اگر مجھے موت آجائے۔“ [مصنف ابن ابي شيبه/كتاب الوصايا/حدیث: 32862]

عاصم سے روایت ہے کہ شعبی سے اس آدمی کے بارے میں سوال کیا گیا جس نے اپنے بھتیجے کے لئے اپنی باندی کی وصیت کی پھر اس کے ساتھ وطی کرلی، آپ نے فرمایا اس آدمی نے اپنی وصیت کو فاسد کردیا۔ [مصنف ابن ابي شيبه/كتاب الوصايا/حدیث: 32863]

حماد سے روایت ہے کہ حضرت ابراہیم نے فرمایا جب کوئی آدمی حج اور زکوٰۃ دونوں کی ادائیگی کی وصیت کر دے تو ان کی ادائیگی ایک تہائی مال سے کی جائے گی۔ [مصنف ابن ابي شيبه/كتاب الوصايا/حدیث: 32864]

مغیرہ ابراہیم کا فرمان نقل کرتے ہیں کہ جب کوئی شخص اپنے حج کی وصیت کرے جو اس نے ادا نہیں کیا تھا تو اس کی ادائیگی ایک تہائی مال سے کی جائے گی۔ [مصنف ابن ابي شيبه/كتاب الوصايا/حدیث: 32865]

ہشام روایت کرتے ہیں کہ محمد بن سیرین نے بھی فرمایا ہے کہ ایک تہائی مال سے ادائیگی ہوگی۔ [مصنف ابن ابي شيبه/كتاب الوصايا/حدیث: 32866]

یونس اور منصور سے روایت ہے کہ حضرت حسن رحمہ اللہ نے فرمایا کہ ان کی ادائیگی پورے مال سے کی جائے گی۔ [مصنف ابن ابي شيبه/كتاب الوصايا/حدیث: 32867]