حضرت طلحہ فرماتے ہیں کہ میں نے ابن ابی اوفیٰ رضی اللہ عنہ سے پوچھا: کیا رسول اللہ صلی اللہ علیہ وسلم نے وصیت کی تھی؟ فرمایا کہ نہیں! میں نے پوچھا کہ پھر لوگوں کو وصیت کا حکم کیسے دیا گیا؟ فرمانے لگے: آپ نے کتاب اللہ پر عمل کرنے کی وصیت کی تھی۔ [مصنف ابن ابي شيبه/كتاب الوصايا/حدیث: 32988]

مسروق سے روایت ہے کہ حضرت عائشہ رضی اللہ عنہا نے فرمایا کہ نبی کریم صلی اللہ علیہ وآلہ وسلم نے کوئی دینار چھوڑا نہ درہم، اور نہ ہی کسی چیز کی وصیت فرمائی۔ [مصنف ابن ابي شيبه/كتاب الوصايا/حدیث: 32989]

أرقم بن شرحبیل سے روایت ہے کہ حضرت ابن عباس رضی اللہ عنہما نے فرمایا: نبی کریم صلی اللہ علیہ وآلہ وسلم اس حال میں فوت ہوئے کہ آپ نے کوئی وصیت نہیں کی تھی۔ [مصنف ابن ابي شيبه/كتاب الوصايا/حدیث: 32990]

أسود فرماتے ہیں کہ حضرت عائشہ رضی اللہ عنہا کے سامنے یہ بات ذکر کی گئی کہ حضرت علی رضی اللہ عنہ نبی کریم صلی اللہ علیہ وآلہ وسلم کے وصی تھے، آپ نے فرمایا کہ نبی کریم صلی اللہ علیہ وآلہ وسلم نے ان کو کب وصیت کی تھی؟ میں نے تو نبی کریم صلی اللہ علیہ وآلہ وسلم کو اپنی گود میں ٹیک دے رکھی تھی کہ آپ کا جسم مبارک ڈھیلا پڑگیا اور آپ وفات پا گئے، تو پھر ان کو وصیت کب فرمائی؟ [مصنف ابن ابي شيبه/كتاب الوصايا/حدیث: 32991]

طاؤس سے روایت ہے کہ حضرت ابن عباس رضی اللہ عنہما نے فرمایا: جب مرنے والا سات سو درہم چھوڑ کر جا رہا ہو تو وصیت نہ کرے۔ [مصنف ابن ابي شيبه/كتاب الوصايا/حدیث: 32992]

ھمام سے روایت ہے کہ حضرت قتادہ نے فرمان باری تعالیٰ {إنْ تَرَکَ خَیْرًا الْوَصِیَّۃُ } کی تشریح میں فرمایا: اس وقت لوگوں میں یہ بات معروف تھی کہ بہتر مال ایک ہزار درہم یا اس سے زیادہ ہے۔ [مصنف ابن ابي شيبه/كتاب الوصايا/حدیث: 32993]

عروہ سے روایت ہے کہ حضرت علی رضی اللہ عنہ بنو ہاشم کے ایک آدمی کے پاس اس کی تیمارداری کے لئے آئے، وہ وصیت کرنے لگا تو آپ نے اس کو منع فرمایا اور فرمایا کہ اللہ تعالیٰ نے یہ فرمایا ہے کہ ”اگر (مرنے والا) مال چھوڑے“ اور تم تو کوئی مال چھوڑ کر نہیں مر رہے، اس لئے جو ہے وہ اپنے بچوں کے لئے چھوڑ دو!۔ [مصنف ابن ابي شيبه/كتاب الوصايا/حدیث: 32994]

ابن ابی ملیکہ فرماتے ہیں کہ ایک آدمی نے حضرت عائشہ رضی اللہ عنہا سے عرض کیا کہ میں وصیت کرنا چاہتا ہوں، انہوں نے پوچھا تیرے پا س کتنا مال ہے؟ عرض کیا: تین ہزار، آپ نے پوچھا تیرے اہل و عیال کتنے افراد ہیں؟ کہنے لگا، چار، آپ نے فرمایا: اللہ تعالیٰ نے یہ شرط ذکر فرمائی ہے ”اگر مال چھوڑے“ اور تیرے پاس تو بہت معمولی سا مال ہے اس کو اپنے بچوں کے لئے چھوڑ دو، یہی افضل ہے۔ [مصنف ابن ابي شيبه/كتاب الوصايا/حدیث: 32995]

حبیب سے روایت ہے کہ حضرت ابراہیم فرماتے ہیں کہ اللہ تعالیٰ کا فرمان: { وَصِیَّۃً لأَزْوَاجِہِمْ } منسوخ ہے۔ [مصنف ابن ابي شيبه/كتاب الوصايا/حدیث: 32996]

عبد اللہ بن بدر سے روایت ہے کہ حضرت ابن عمر رضی اللہ عنہما نے فرمایا کہ {إنْ تَرَکَ خَیْرًا الْوَصِیَّۃُ } کو میراث کی آیت نے منسوخ کردیا ہے۔ [مصنف ابن ابي شيبه/كتاب الوصايا/حدیث: 32997]