أشعت سے روایت ہے کہ حضرت حسن نے فرمایا کہ اس آیت کو میراث کی آیت نے منسوخ کردیا ہے، اور قریبی رشتہ داروں میں سے ان کو چھوڑ دیا ہے جو وارث نہیں ہوتے۔ [مصنف ابن ابي شيبه/كتاب الوصايا/حدیث: 32998]

ابن جریج روایت کرتے ہیں کہ حضرت عطاء نے فرمایا کہ وصیت کا ضمان نہیں ہے یہ تو آدمی کے مال میں قرضے کی طرح ایک چیز ہے۔ [مصنف ابن ابي شيبه/كتاب الوصايا/حدیث: 32999]

ابراہیم بن میسرہ روایت کرتے ہیں کہ حضرت طاؤس وصیت کو ذمہ داری میں داخل کیا کرتے تھے۔ [مصنف ابن ابي شيبه/كتاب الوصايا/حدیث: 33000]

ہشام سے روایت ہے کہ حضرت حسن نے فرمایا: جب کوئی آدمی کسی غیر حاضر آدمی کو وصیت کرے، اور وہ آدمی آ کر وصیت کا اقرار کرے اور اس کے بعد انکار کرنا چاہے تو اس کو اس کا اختیار نہیں ہے۔ [مصنف ابن ابي شيبه/كتاب الوصايا/حدیث: 33001]

مجاہد سے روایت ہے کہ حضرت عمر رضی اللہ عنہ نے فرمایا: جب دو لشکروں میں لڑائی چھڑ جائے اور جب عورت کو دردِ زہ شروع ہوجائے تو ان کو اپنے مال کے ایک تہائی سے زیادہ میں تصرف کرنے کا حق نہیں۔ [مصنف ابن ابي شيبه/كتاب الوصايا/حدیث: 33002]

ہشام سے روایت ہے کہ حضرت حسن نے اس آدمی کے بارے میں فرمایا جو جنگ کے دوران کسی کو کچھ دے دے یا سمندر کے سفر کے دوران یا طاعون کے زمانے میں، یا حاملہ عورت کسی کو کچھ دے دے، کہ جو کچھ انہوں نے دیا اس کا دینا درست ہے، اور وہ ایک تہائی مال میں شمار نہیں کیا جائے گا۔ [مصنف ابن ابي شيبه/كتاب الوصايا/حدیث: 33003]

اشعث سے روایت ہے کہ حضرت حسن نے فرمایا کہ حاملہ اپنے حمل کے مہینے میں مال کے اندر جو تصرف کرے وہ ایک تہائی میں سے شمار کیا جائے گا۔ [مصنف ابن ابي شيبه/كتاب الوصايا/حدیث: 33004]

عبد الملک روایت کرتے ہیں کہ حضرت عطاء نے اس آدمی کے بارے میں فرمایا جس کو تپ دق یا بخار کا مرض ہو اور وہ چلتا پھرتا ہو، کہ وہ اپنے مال میں جو تصرف کرے وہ پورے مال میں سے شمار ہوگا، ہاں مگر اس صورت میں جبکہ وہ بستر پر پڑا ہوا ہو (چلنے پھرنے کی طاقت نہ رکھتا ہو)۔ [مصنف ابن ابي شيبه/كتاب الوصايا/حدیث: 33005]

ابن جریج روایت کرتے ہیں کہ حضرت عطاء نے فرمایا کہ حاملہ مال میں جو تصرف کرے وہ وصیت سمجھی جائے گی۔ [مصنف ابن ابي شيبه/كتاب الوصايا/حدیث: 33006]

دوسری سند سے بھی حضرت عطاء سے یہی ارشاد منقول ہے۔ [مصنف ابن ابي شيبه/كتاب الوصايا/حدیث: 33007]