حضرت احنف بن قیس نبی صلی اللہ علیہ وسلم سے روایت کرتے ہیں کہ حضرت داؤد علیہ السلام نے فرمایا کہ اے رب! بنی اسرائیل آپ سے حضرت ابراہیم، اسحاق اور یعقوب۔ کے واسطے سے دعائیں کرتے ہیں، اے اللہ! مجھے ان میں سے چوتھا بنادیجئے، چناچہ اللہ تعالیٰ نے ان کی طرف وحی فرمائی کہ ”ابراہیم کو میری وجہ سے آگ میں ڈالا گیا اور انہوں نے صبر کیا اور تمہیں ایسی آزمائش نہیں آئی، اور اسحاق نے میرے لیے اپنی جان قربان کی، اور صبر کیا، اور یہ آزمائش بھی تم پر نہیں آئی، اور میں نے یعقوب کے محبوب کو لے لیا یہاں تک کہ ان کی آنکھیں سفید ہوگئیں، انہوں نے بھی صبر کیا، اور یہ آزمائش بھی تم پر نہیں آئی۔ [مصنف ابن ابي شيبه/كتاب الفضائل/حدیث: 34059]

خلیفہ حضرت ابن عباس رضی اللہ عنہما سے روایت کرتے ہیں، فرمایا کہ حضرت داؤد علیہ السلام کے دل میں یہ بات آئی کہ اگر وہ آزمائش میں ڈالے جائیں گے تو محفوظ رہیں گے، ان سے کہا گیا کہ تم عنقریب آزمائش میں ڈالے جاؤ گے، اور تمہیں اس دن کا علم ہوجائے گا جس میں تمہیں آزمائش میں ڈالا جائے گا، اس لیے احتیاط رکھو، چناچہ ان سے کہا گیا کہ آج تمہیں آزمایا جائے گا، چناچہ آپ نے زبور پکڑی اور اپنی بغل میں لی اور محراب کا دروازہ بند کردیا اور دروازے پر خادم کو بٹھایا اور فرمایا کہ آج کسی کو مت آنے دینا۔ (2) چناچہ آپ زبور پڑھ رہے تھے کہ ایک سنہرا خوبصورت پرندہ آیا جس میں مختلف رنگ تھے، اور وہ آپ کے پاس آنے لگا، اور قریب ہوگیا، اور آپ کو اسے اٹھانے کی قدرت ہوگئی، آپ نے اس کو ہاتھ میں لینے کا ارادہ کیا تو وہ کود کر آپ کے پیچھے چلا گیا، چناچہ آپ نے زبور بند کی اور اس کو پکڑنے کے لیے اٹھے، لیکن وہ اڑ کر محراب کے روشن دان پر بیٹھ گیا، آپ اس کے قریب ہوئے تو وہ ایک جھونپڑی پر بیٹھ گیا، آپ نے اس کو جھانکا تاکہ اس کو دیکھیں کہ کہاں گیا ہے اچانک آپ کی نظر ایک عورت پر پڑی جو اپنے حوض کے پاس حیض کا غسل کر رہی تھی، جب اس نے آپ کا سایہ دیکھا تو اپنے سر کو حرکت دی اور اپنے جسم کو اپنے بالوں سے چھپالیا حضرت داؤد علیہ السلام نے خادم سے کہا کہ جاؤ اور فلاں عورت سے کہو کہ میرے پاس آئے، اس نے جا کر اس عورت سے کہا کہ اللہ کے نبی تمہیں بلا رہے ہیں، وہ کہنے لگی کہ اللہ کے نبی سے مجھ کو کیا کام؟ اگر انہیں کوئی ضرورت ہے تو میرے پاس آجائیں، میں تو ان کے پاس نہیں جاتی، خادم آپ کے پاس آیا اور آپ کو اس کی بات بتائی، آپ اس کے پاس گئے تو اس نے دروازہ بند کرلیا اور کہنے لگی داؤد علیہ السلام تمہیں کیا ہوگیا ہے؟ کیا تم نہیں جانتے کہ جو ایسا کرتا ہے تم اس کو سنگسار کرتے ہو؟ اور اس نے آپ کو نصیحت کی تو آپ واپس لوٹ گئے۔ (3) اور اس عورت کا شوہر اللہ کے راستے میں مجاہد تھا، چناچہ حضرت داؤد علیہ السلام نے جہاد کے امیر کو حکم دیا کہ اوریا کو ”حملۃ التابوت“ میں شامل کردو، اور ”حملۃ التابوت“ وہ فوج تھی جن کو یا فتح حاصل ہوتی یا و ہ قتل ہوجاتے تھے، چناچہ اس نے اس کو ”حملۃ التابوت“ میں شامل کر کے آگے بھیج دیا، اور وہ قتل ہوگیا، جب اس عورت کی عدت ختم ہوئی تو آپ نے اس کو پیغام دیا، اس نے شرط لگائی کہ اگر اس کا لڑکا ہوا تو اس کو اپنے بعد خلیفہ بنائیں گے، اور اس پر بنی اسرائیل کے پچاس لوگوں کو گواہ بنایا، اور اس پر ایک تحریر لکھی، چناچہ آپ کو اپنی آزمائش کا احساس ہی نہ ہوا، یہاں تک کہ اس نے حضرت سلیمان علیہ السلام کو جنا اور وہ جوان ہوگئے، پھر دو فرشتے ان کے پاس محراب پھلانگ کر آئے اور ان کا قصہ اللہ نے قرآن میں بیان فرمایا ہے، اور داؤد علیہ السلام سجدے میں گرگئے، چناچہ اللہ نے ان کی مغفرت فرما دی اور ان کی توبہ قبول فرما لی۔ (4) چناچہ انہوں نے اس کو طلاق دے دی اور سلیمان علیہ السلام کو دور کردیا، چناچہ اس دوران ایک مرتبہ آپ ایک میدان سے گزر رہے تھے کہ اپنے لڑکوں کے پاس پہنچے جو کھیل رہے تھے اور کہہ رہے تھے، اے لادین! اے لادین! حضرت داؤد علیہ السلام ٹھہر گئے اور پوچھا کہ اس کا نام ”لادین“ کیوں رکھا گیا ہے؟ سلیمان علیہ السلام جو ایک کونے میں تھے کہنے لگے کہ اگر مجھ سے پوچھیں تو میں ان کو بتادوں گا، داؤد علیہ السلام سے کہا گیا کہ سلیمان اس طرح کہہ رہے ہیں، آپ نے ان کو بلایا اور کہا کہ اس لڑکے کا نام ”لادین“ کیوں رکھا گیا ہے؟ انہوں نے کہا کہ میں آپ کو اس کے بارے میں بتاتا ہوں، حضرت سلیمان نے اس سے اس کے والد کے قصّے کے بارے میں پوچھا، تو ان کو بتایا گیا کہ اس کے والد اپنے ساتھیوں کے ساتھ ایک سفر پر گئے تھے، اور وہ بہت مالدار تھے، لوگوں نے ان کو قتل کرنے کا ارادہ کیا تو انہوں نے ان کو وصیت کی کہ میں نے اپنی بیوی کو حاملہ چھوڑا ہے، اگر وہ لڑکا جنے گا تو اس سے کہنا کہ اس کا نام ”لادین“ رکھے، چناچہ حضرت سلیمان نے اس کے ساتھیوں کو بلایا، وہ آئے تو انہوں نے ان میں سے ایک کے ساتھ خلوت کی، اور اس سے بات کرتے رہے یہاں تک کہ اس نے اقرار کرلیا، اور دوسروں کے ساتھ خلوت کی تو ان سے باتیں کرتے رہے یہاں تک کہ سب نے اقرار کرلیا، چناچہ انہوں نے ان کو حضرت داؤد علیہ السلام کے پاس بھیج دیا اور انہوں نے ان کو قتل کردیا، چناچہ آپ اس کے بعد ان پر کچھ مہربان ہوگئے۔ (5) اور بنی اسرائیل میں ایک عابدہ عورت تھی اور وہ رہبانیت اختیار کیے ہوئے تھی، اس کی دو خوبصورت باندیاں تھیں، اور وہ عورت مردوں سے کوئی تعلق نہ رکھتی تھی، چناچہ ان میں سے ایک باندی نے دوسری سے کہا کہ ہم پر یہ مصیبت لمبی ہوگئی ہے، یہ تو مردوں کو چاہتی نہیں، اور ہم جب تک اس کے پاس رہیں گی بری حالت میں رہیں گی، کیا اچھا ہو اگر ہم اس کو رسوا کردیں اور اس کو سنگسار کردیا جائے اور ہم مردوں کے پاس پہنچ جائیں، چناچہ انہوں نے انڈے کا پانی لیا اور اس کے پاس آئیں اس وقت وہ سجدے میں تھی، ان دونوں نے اس کا کپڑا ہٹایا اور اس کی پچھلی جانب انڈے کا پانی چھڑک دیا، اور چیخ کر کہنے لگیں کہ اس نے بدکاری کی ہے، اور ان میں جو زنا کرتا اس کی حد سنگساری تھی، چناچہ اس عورت کو حضرت داؤد علیہ السلام کے پاس لایا گیا اور انڈے کا پانی اس کے کپڑوں پر تھا، آپ نے اس کو سنگسار کرنے کا ارادہ کیا، حضرت سلیمان علیہ السلام نے کہا کہ اگر مجھ سے پوچھیں تو میں ان کو بتادوں گا، داؤد علیہ السلام سے کہا گیا کہ سلیمان اس طرح کہہ رہے ہیں، آپ نے ان کو بلایا اور فرمایا کہ اس عورت کا کیا معاملہ ہے؟ اس کا کیا قصہ ہے؟ انہوں نے کہا کہ میرے پاس آگ لاؤ، اگر یہ مرد کا پانی ہوا تو بکھر جائے گا، اور اگر انڈے کا پانی ہوا تو اکٹھا ہوجائے گا، چناچہ آگ لائی گئی اور انہوں نے اس کو اس پر رکھا تو وہ اکٹھا ہوگیا، چناچہ آپ نے اس عورت سے سنگساری کی سزا ہٹا دی، اور آپ ان پر کچھ مہربان ہوگئے اور ان سے محبت کرنے لگے۔ پھر اس کے بعد کھیت والوں اور بکریوں والوں کا معاملہ پیش آیا، حضرت داؤد علیہ السلام نے کھیت والوں کے حق میں بکریوں کا فیصلہ فرمایا، چناچہ وہ نکلے اور ان کے ساتھ چرواہے بھی نکلے جن کے ساتھ کتے تھے، حضرت سلیمان علیہ السلام نے پوچھا کہ تمہارے درمیان کیسے فیصلہ ہوا؟ انہوں نے آپ کو بتایا، آپ نے فرمایا کہ اگر ان کا معاملہ میرے سپرد ہوتا تو میں ان کے درمیان اس کے علاوہ کوئی اور فیصلہ کرتا، داؤد علیہ السلام سے کہا گیا کہ سلیمان اس طرح کہہ رہے ہیں، آپ نے ان کو بلایا اور پوچھا کہ تم کیسے فیصلہ کرتے؟ انہوں نے کہا کہ اس سال بکریاں کھیت والوں کو دے دیں، اس سال ان کے بچے، ان کا گھی، ان کا دودھ اور ان کے فائدے کھیت والوں کے ہوں گے، اور یہ بکریوں والے ان کے کھیت جیسا کھیت بوئیں، جب کھیت اس حالت کو پہنچ جائے جس پر وہ پہلے تھا تو یہ اپنا کھیت لے لیں اور وہ ان کو بکریاں واپس کردیں، راوی کہتے ہیں کہ اس پر آپ ان پر مہربان ہوگئے۔ [مصنف ابن ابي شيبه/كتاب الفضائل/حدیث: 34060]

حضرت حماد فرماتے ہیں کہ میں نے حضرت ثابت کو یہ فرماتے ہوئے سنا کہ وہ اوریا ہیں۔ [مصنف ابن ابي شيبه/كتاب الفضائل/حدیث: 34061]

عبد اللہ بن حارث حضرت ابن عباس رضی اللہ عنہما سے روایت کرتے ہیں فرمایا کہ اللہ تعالیٰ نے حضرت داؤد علیہ السلام کو وحی کی کہ ظالموں سے کہو کہ میرا ذکر نہ کیا کریں، کیونکہ ذکر کرنے والے کا مجھ پر حق یہ ہے کہ میں اس کا ذکر کرتا ہوں، اور ظالموں کے لئے میرا ذکر یہ ہے کہ میں ان پر لعنت کرتا ہوں۔ [مصنف ابن ابي شيبه/كتاب الفضائل/حدیث: 34062]

سعید بن جبیر حضرت ابن عباس رضی اللہ عنہما سے روایت کرتے ہیں فرمایا کہ حضرت داؤد علیہ السلام اچانک ہفتے کے دن فوت ہوگئے، اور آپ ہفتے کو عبادت کیا کرتے تھے، چناچہ پرندوں نے آپ پر سایہ کیا۔ [مصنف ابن ابي شيبه/كتاب الفضائل/حدیث: 34063]

سعید بن جبیر بھی حضرت ابن عباس رضی اللہ عنہما سے روایت کرتے ہیں کہ { یَا جِبَالُ أَوِّبِی مَعَہُ } کا مطلب ہے اے پہاڑو! تسبیح کرو۔ [مصنف ابن ابي شيبه/كتاب الفضائل/حدیث: 34064]

ابو حصین حضرت ابو عبد الرحمن سے روایت کرتے ہیں کہ { یَا جِبَالُ أَوِّبِی مَعَہُ } کا مطلب ہے اے پہاڑو! تسبیح کرو۔ [مصنف ابن ابي شيبه/كتاب الفضائل/حدیث: 34065]

مجاہد فرماتے ہیں کہ آپ اپنی غلطی پر اتنا روئے کہ آنسوؤں سے آپ کے ارد گرد کی گھاس زرد ہوگئی۔ [مصنف ابن ابي شيبه/كتاب الفضائل/حدیث: 34066]

ابو میسرہ فرماتے ہیں کہ { أَوِّبِی } کا معنی ہے تسبیح کرو۔ [مصنف ابن ابي شيبه/كتاب الفضائل/حدیث: 34067]

عکرمہ حضرت ابن عباس رضی اللہ عنہما سے روایت کرتے ہیں فرمایا { لَمْ نَجْعَلْ لَہُ مِنْ قَبْلُ سَمِیًّا } کی تفسیر یہ ہے کہ آپ سے پہلے کسی کا نام یحییٰ نہیں رکھا۔ [مصنف ابن ابي شيبه/كتاب الفضائل/حدیث: 34068]