حضرت یعلی عامری رضی اللہ عنہ فرماتے ہیں کہ وہ رسول اللہ صلی اللہ علیہ وسلم کے ساتھ کھانے کی دعوت میں جانے کے لیے نکلے، تو راستہ میں حضرت حسین رضی اللہ عنہ بچوں کے ساتھ کھیل رہے تھے۔ تو آپ صلی اللہ علیہ وسلم لوگوں کے آگے کھڑے ہوگئے پھر آپ صلی اللہ علیہ وسلم نے اپنا ہاتھ بڑھایا تو بچہ نے ادھر ادھر بھاگنا شروع کردیا۔ اور رسول اللہ صلی اللہ علیہ وسلم ان کے ساتھ ہنسی مذاق کرتے رہے۔ پھر یہاں تک کہ آپ صلی اللہ علیہ وسلم نے اس کو پکڑا اور اپنا ایک ہاتھ ان کی تھوڑی کے نیچے رکھا اور اپنا دوسرا ہاتھ ان کی گدی کے نیچے رکھا پھر رسول اللہ صلی اللہ علیہ وسلم نے اپنا سر نیچے جھکا کر اپنے منہ کو ان کے منہ پر رکھ کر ان کا بوسہ لیا اور ارشاد فرمایا: حسین مجھ سے ہے اور میں حسین رضی اللہ عنہ سے ہوں۔ اللہ اس سے محبت کرے جو حسین رضی اللہ عنہ سے محبت کرے۔ حسین رضی اللہ عنہ نواسوں (اسباط) میں سے ایک نواسے ہیں۔ [مصنف ابن ابي شيبه/كتاب الفضائل/حدیث: 34369]

حضرت عامر رحمہ اللہ فرماتے ہیں کہ مجھے خبر دی گئی کہ نبی کریم صلی اللہ علیہ وآلہ وسلم نے حضرت جعفر رضی اللہ عنہ کی بیوی کی طرف قاصد بھیجا کہ وہ حضرت جعفر رضی اللہ عنہ کے بیٹوں کو نبی کریم صلی اللہ علیہ وآلہ وسلم کے پاس بھیج دیں۔ پس ان بچوں کو آپ صلی اللہ علیہ وسلم کے پاس لایا گیا۔ تو آپ صلی اللہ علیہ وسلم نے یوں دعا فرمائی۔ اے اللہ! یقینا جعفر تیرے پاس آگیا اچھے ثواب کی طرف۔ پس تو اس کی اولاد میں اس کی ایسی بہترین جانشینی فرما جو تو نے اپنے نیک بندوں میں سے کسی بندے کی فرمائی ہو۔ [مصنف ابن ابي شيبه/كتاب الفضائل/حدیث: 34370]

حضرت عامر رحمہ اللہ فرماتے ہیں کہ جب حضرت جعفر رضی اللہ عنہ حبشہ سے آئے تو حضرت عمر بن خطاب رضی اللہ عنہ حضرت اسماء بنت عمیس رضی اللہ عنہا سے ملے اور ان سے فرمایا: ہم لوگ ہجرت میں تم سے سبقت لے گئے اور ہم تم سے افضل ہیں۔ تو وہ کہنے لگیں۔ میں واپس نہیں لوٹوں گی یہاں تک کہ میں رسول اللہ صلی اللہ علیہ وسلم کے پاس آؤں۔ پھر وہ آپ صلی اللہ علیہ وسلم پر داخل ہوئیں اور عرض کیا: اے اللہ کے رسول صلی اللہ علیہ وسلم ! میں عمر رضی اللہ عنہ سے ملی تو انہوں نے کہا: کہ یقینا وہ ہم سے افضل ہیں۔ اور بیشک وہ ہم سے ہجرت میں سبقت لے گئے ہیں! اس پر نبی کریم صلی اللہ علیہ وآلہ وسلم نے ارشاد فرمایا: نہیں بلکہ تم لوگوں نے دو مرتبہ ہجرت کی۔ [مصنف ابن ابي شيبه/كتاب الفضائل/حدیث: 34371]

اسماعیل رحمہ اللہ فرماتے ہیں کہ مجھے حضرت سعید بن ابی بردہ رحمہ اللہ نے بیان فرمایا: اس دن حضرت اسماء رضی اللہ عنہا نے حضرت عمر رضی اللہ عنہ سے یوں فرمایا: ایسی بات نہیں۔ ہم لوگ تو نفرت کرنے والے اور دور کے لوگوں کی زمین میں دھتکارے ہوئے تھے۔ اور تم لوگ رسول اللہ صلی اللہ علیہ وسلم کے پاس تھے۔ جو تمہارے جاہلوں کو نصیحت فرماتے اور تم میں سے بھوکوں کو کھانا کھلاتے تھے۔ [مصنف ابن ابي شيبه/كتاب الفضائل/حدیث: 34372]

حضرت ابو میسرہ رحمہ اللہ فرماتے ہیں کہ جب نبی کریم صلی اللہ علیہ وآلہ وسلم کو حضرت جعفر رضی اللہ عنہ، حضرت زید اور حضرت عبد اللہ بن رواحہ رضی اللہ عنہ کے شہید ہونے کی خبر ملی تو آپ صلی اللہ علیہ وسلم نے ان کا ذکر فرمایا: پھر یوں دعا فرمائی۔ اے اللہ! زید کی مغفرت فرما۔ تین مرتبہ فرمایا: اے اللہ! جعفر کی مغفرت فرما اور عبد اللہ بن رواحہ کی بھی۔ [مصنف ابن ابي شيبه/كتاب الفضائل/حدیث: 34373]

حضرت سالم بن ابی الجعد رحمہ اللہ فرماتے ہیں کہ نبی کریم صلی اللہ علیہ وآلہ وسلم کو یہ تینوں خواب میں دکھلائے گئے۔ پس آپ صلی اللہ علیہ وسلم نے حضرت جعفر کو دو پروں والے فرشتہ کی صورت میں دیکھا جو خون میں لت پت تھے۔ اور زید ان کے سامنے تخت پر تھے اور ابن رواحہ رضی اللہ عنہ بھی ان کے ساتھ بیٹھے ہوئے تھے۔ گویا کہ وہ ان سے اعراض کرنے والے تھے۔ [مصنف ابن ابي شيبه/كتاب الفضائل/حدیث: 34374]

حضرت علی رضی اللہ عنہ فرماتے ہیں کہ رسول اللہ صلی اللہ علیہ وسلم نے حضرت جعفر رضی اللہ عنہ سے ارشاد فرمایا: تم تخلیق اور اخلاق میں میرے مشابہہ ہو۔ [مصنف ابن ابي شيبه/كتاب الفضائل/حدیث: 34375]

حضرت ابن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نے حضرت جعفر رضی اللہ عنہ سے ارشاد فرمایا: تم تخلیق اور اخلاق میں میرے مشابہہ ہو۔ [مصنف ابن ابي شيبه/كتاب الفضائل/حدیث: 34376]

حضرت براء بن عازب رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے حضرت جعفر رضی اللہ عنہ سے ارشاد فرمایا: تم تخلیق اور اخلاق میں میرے مشابہہ ہو۔ [مصنف ابن ابي شيبه/كتاب الفضائل/حدیث: 34377]

حضرت عبد الرحمن بن ابی لیلیٰ رحمہ اللہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: تم اے جعفر! تخلیق اور اخلاق میں میرے مشابہہ ہو۔ [مصنف ابن ابي شيبه/كتاب الفضائل/حدیث: 34378]