حسن رحمہ اللہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت میں سے ایک آدمی کی شفاعت کی وجہ سے قبیلہ ربیعہ اور قبیلہ مضر کے جتنے افراد جنت میں داخل ہوں گے۔ [مصنف ابن ابي شيبه/كتاب الفضائل/حدیث: 34518]

حضرت حوشب رحمہ اللہ فرماتے ہیں کہ ہم نے حسن رحمہ اللہ سے پوچھا: کیا تمہیں اس شخص کا نام بتلایا گیا تھا؟ انہوں نے فرمایا: جی ہاں! اویس قرنی۔ [مصنف ابن ابي شيبه/كتاب الفضائل/حدیث: 34519]

حضرت عمر فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: عنقریب تمہارے پاس ایک شخص آئے گا جس کا نام اویس ہوگا۔ اس پر سفیدی تھی۔ پس اس نے اللہ سے دعا کی تو اللہ نے اس کو ختم فرما دیا۔ تم میں سے جو شخص بھی اس سے ملے تو وہ اس کو اپنے لیے استغفار کرنے کا حکم دے۔ راوی کہتے ہیں: حضرت عمر رضی اللہ عنہان سے ملے اور فرمایا: میرے لیے استغفار کرو۔ تو انہوں نے ان کے لیے استغفار فرمایا۔ [مصنف ابن ابي شيبه/كتاب الفضائل/حدیث: 34520]

حضرت یحییٰ بن سعید رحمہ اللہ فرماتے ہیں کہ حضرت معاذ بن رفاعہ رحمہ اللہ نے فرمایا: بیشک ایک فرشتہ رسول اللہ صلی اللہ علیہ وسلم کی خدمت میں حاضر ہوا اور پوچھا: تمہارے میں اصحاب بدر کی کیا شان ہے؟ اس پر آپ صلی اللہ علیہ وسلم نے فرمایا: لوگوں میں سب سے افضل ہیں۔ تو فرشتہ نے عرض کیا: اسی طریقہ سے ہم میں بھی وہ فرشتے سب سے افضل ہیں جو غزوہ بدر میں حاضر ہوئے تھے۔ [مصنف ابن ابي شيبه/كتاب الفضائل/حدیث: 34521]

حضرت علی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تمہیں کیا معلوم شاید اللہ تعالیٰ بدر میں شرکت کرنے والوں کی طرف متوجہ ہوئے اور فرمایا: تم جو چاہے عمل کرو تحقیق میں نے تمہاری مغفرت فرما دی ہے۔ [مصنف ابن ابي شيبه/كتاب الفضائل/حدیث: 34522]

حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: یقینا اللہ تبارک و تعالیٰ بدر والوں کی طرف متوجہ ہوا اور ارشاد فرمایا: تم جو چاہے عمل کرو۔ تحقیق میں نے تمہاری مغفرت کردی۔ [مصنف ابن ابي شيبه/كتاب الفضائل/حدیث: 34523]

حضرت جابر رضی اللہ عنہ فرماتے ہیں کہ حضرت حاطب بن ابی بلتعہ رضی اللہ عنہ کا غلام رسول اللہ صلی اللہ علیہ وسلم کی خدمت میں آیا تاکہ وہ حضرت حاطب رضی اللہ عنہ کی شکایت کرے اور کہنے لگا: اے اللہ کے رسول صلی اللہ علیہ وسلم ! حاطب ضرور بالضرور جہنم میں داخل ہوں گے۔ اس پر رسول اللہ صلی اللہ علیہ وسلم نے ارشاد فرمایا: تو نے جھوٹ کہا وہ جہنم میں نہیں داخل ہوں گے، اس لیے کہ وہ غزوہ بدر اور حدیبیہ میں حاضر ہوئے تھے۔ [مصنف ابن ابي شيبه/كتاب الفضائل/حدیث: 34524]

حضرت سعید بن جبیر رحمہ اللہ فرماتے ہیں کہ حضرت ابن عباس رضی اللہ عنہما نے قرآن کی اس آیت (تم بہترین امت ہو لوگوں کی نفع رسانی کے لیے نکالے گئے) کے بارے میں ارشاد فرمایا: وہ لوگ مراد ہیں جنہوں نے محمد صلی اللہ علیہ وسلم کے ساتھ مدینہ کی طرف ہجرت کی۔ [مصنف ابن ابي شيبه/كتاب الفضائل/حدیث: 34525]

حضرت انس رضی اللہ عنہ فرماتے ہیں کہ رسول اللہ صلی اللہ علیہ وسلم نے انصار کی عورتوں اور بچوں کو کسی شادی کی تقریب سے آتا دیکھ کر ارشاد فرمایا: اے اللہ! تم لوگ مجھے لوگوں میں سب سے زیادہ محبوب لوگوں میں سے ہو۔ [مصنف ابن ابي شيبه/كتاب الفضائل/حدیث: 34526]

حضرت قیس بن سعد بن عبادہ رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: اے اللہ! تو انصار پر رحمت فرما، اور انصار کے بچوں پر بھی اور انصار کے بچوں کے بچوں پر بھی۔ [مصنف ابن ابي شيبه/كتاب الفضائل/حدیث: 34527]