حضرت خیثمہ رحمہ اللہ فرماتے ہیں کہ رسول اللہ صلی اللہ علیہ وسلم سے پوچھا گیا: بہترین لوگ کون سے ہیں؟ تو آپ صلی اللہ علیہ وسلم نے ارشاد فرمایا: یمن کے لوگ۔ [مصنف ابن ابي شيبه/كتاب الفضائل/حدیث: 34617]

حضرت قیس بن ابی حازم رحمہ اللہ فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: ایمان تو یمنی ہے۔ [مصنف ابن ابي شيبه/كتاب الفضائل/حدیث: 34618]

حضرت عبد اللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم حضرت عائشہ رضی اللہ عنہا ام المؤمنین کے گھر سے نکلے اور ارشاد فرمایا: کفر کی بنیاد تو یہاں سے ہے جہاں شیطان کے سینگ طلوع ہوتے ہیں، یعنی مشرق میں سے۔ [مصنف ابن ابي شيبه/كتاب الفضائل/حدیث: 34619]

حضرت جندب ازدی رحمہ اللہ فرماتے ہیں کہ ہم لوگ حضرت سلمان رضی اللہ عنہ کے ساتھ حیرہ مقام کی طرف نکلے۔ پھر آپ رضی اللہ عنہ کوفہ کی طرف متوجہ ہوئے اور ارشاد فرمایا: اسلام کا خیمہ ہے۔ کسی جھونپڑی کا ایسا دفاع نہیں کیا جاتا جیسا ان جھونپڑیوں کا دفاع کیا جاتا ہے سوائے ان جھونپڑیوں کے جن میں محمد صلی اللہ علیہ وسلم تھے، اور دنیا ختم نہیں ہوگی یہاں تک کہ ہر مؤمن اس میں جمع ہوگا یا وہ آدمی جس کی خواہش اس کی طرف ہوگی۔ [مصنف ابن ابي شيبه/كتاب الفضائل/حدیث: 34620]

حضرت جندب رحمہ اللہ فرماتے ہیں کہ ہم لوگ حضرت سلمان رضی اللہ عنہ کے ساتھ تھے، اور ہم حیرہ مقام سے آئے تھے، آپ رضی اللہ عنہ نے دو مرتبہ فرمایا: کوفہ اسلام کا خیمہ ہے۔ [مصنف ابن ابي شيبه/كتاب الفضائل/حدیث: 34621]

حضرت سالم رحمہ اللہ فرماتے ہیں کہ حضرت حذیفہ رضی اللہ عنہ نے ارشاد فرمایا: کسی خیمے کا ایسا دفاع نہیں کیا جاتا جیسا ان خیموں کا دفاع کیا جاتا ہے جو کوفہ میں تھے، سوائے ان خیموں کے جو محمد صلی اللہ علیہ وسلم کے ساتھ تھے۔ [مصنف ابن ابي شيبه/كتاب الفضائل/حدیث: 34622]

حضرت ربیع بن عمیلہ رحمہ اللہ فرماتے ہیں کہ کوفہ کے ایک آدمی اور شام کے ایک آدمی کے درمیان جھگڑا ہوگیا۔ یہ دونوں آپس میں فخر کرنے لگے۔ کوفی نے کہا: ہم تو جنگ قادسیہ کے دن والے لوگ ہیں اور فلاں فلاں دن والے لوگ ہیں۔ اور شامی کہنے لگا: ہم تو جنگ یرموک والے ہیں اور فلاں فلاں دن والے لوگ ہیں۔ اس پر حضرت حذیفہ رضی اللہ عنہ نے ارشاد فرمایا: اللہ نے عاد اور ثمود کی ہلاکت میں ان دونوں کو گواہ نہیں بنایا تھا اور نہ ہی ان دونوں سے اس بارے میں مشورہ کیا تھا اور کوئی بستی بھی اس سے زیادہ اس لائق نہیں کہ اس سے کوئی بڑی مصیبت دور کی جائے، یعنی کوفہ سے زیادہ۔ [مصنف ابن ابي شيبه/كتاب الفضائل/حدیث: 34623]

حضرت حبہ العرنی رحمہ اللہ فرماتے ہیں کہ حضرت عمر بن خطاب رضی اللہ عنہ نے ارشاد فرمایا: اے کوفہ والو! تم عرب کی بنیاد اور ان کا معزز قبیلہ ہو، اور میرا تیر ہو جس کو میں چلاتا ہوں اگر کوئی چیز میرے پاس ادھر ادھر سے آجائے، اور بیشک میں نے تمہاری طرف حضرت عبد اللہ بن مسعود رضی اللہ عنہ کو بھیجا ہے اور میں نے ان کو تمہارے لیے چنا۔ اور ان کے معاملہ میں تم لوگوں کو اپنے آپ پر ترجیح دی۔ [مصنف ابن ابي شيبه/كتاب الفضائل/حدیث: 34624]

حضرت نافع بن جبیر رحمہ اللہ فرماتے ہیں کہ حضرت عمر بن خطاب رضی اللہ عنہ نے کوفہ والوں کی طرف خط لکھا: تو ان کو اس لقب سے نوازا۔ معزز لوگوں کی طرف۔ [مصنف ابن ابي شيبه/كتاب الفضائل/حدیث: 34625]

امام شعبی رحمہ اللہ فرماتے ہیں کہ حضرت عمر بن خطاب رضی اللہ عنہ نے کوفہ والوں کی طرف خط لکھا: تو انہیں اس لقب سے نوازا۔ عرب کی بنیاد کی طرف۔ [مصنف ابن ابي شيبه/كتاب الفضائل/حدیث: 34626]