حضرت ابن عباس رضی اللہ عنہما نے اھل کتاب میں سے ایک شخص کو خط لکھا تو السلام علیک لکھا۔ [مصنف ابن ابي شيبه/كتاب السير/حدیث: 35790]

حضرت منصور رحمہ اللہ فرماتے ہیں کہ میں نے حضرت ابراہیم رحمہ اللہ اور حضرت مجاہد رحمہ اللہ سے دریافت کیا کہ ذمیوں کو خط کیسے لکھا جائے گا؟ حضرت مجاہد نے فرمایا: ان کو السَّلاَمُ عَلَی مَنِ اتَّبَعَ الْہُدَی لکھا جائے گا (سلامتی ہو اس پر جو ہدایت کی پیروی کرے) اور حضرت ابراہیم نے فرمایا سلام علیک لکھے۔ [مصنف ابن ابي شيبه/كتاب السير/حدیث: 35791]

اور ابراہیم رحمہ اللہ نے فرمایا: سلام علیک لکھے۔ [مصنف ابن ابي شيبه/كتاب السير/حدیث: 35792]

حضرت ابو بردہ رحمہ اللہ فرماتے ہیں کہ آنحضرت صلی اللہ علیہ وسلم نے اھل کتاب میں سے ایک شخص کو خط لکھا تو أَسْلِم أَنْتَ لکھا ابھی آنحضرت صلی اللہ علیہ وسلم خط لکھ کر فارغ نہ ہوئے تھے کہ اسی شخص کا خط آگیا وہ پڑھ کر سنایا گیا تو اس میں سلام لکھا ہوا تھا تو آنحضرت صلی اللہ علیہ وسلم نے بھی اس کے خط کے آخر میں سلام کا جواب دے دیا۔ [مصنف ابن ابي شيبه/كتاب السير/حدیث: 35793]

حضرت عامر رحمہ اللہ سے مروی ہے کہ حضرت خالد بن ولید رضی اللہ عنہ نے مقام حیرہ سے فارس کے مرازبۃ کو خط یوں لکھا: بسم اللہ الر حمن الرحیم خالد بن ولید کی طرف سے مرازبہ فارس کی طرف سلامتی ہو اس پر جو ہدایت کی پیروی کرے۔ [مصنف ابن ابي شيبه/كتاب السير/حدیث: 35794]

حضرت عیاض اشعری رضی اللہ عنہ فرماتے ہیں کہ میں جنگ یرموک میں حاضر تھا، حضرت ابو عبیدہ بن جراح رضی اللہ عنہ نے فرمایا کون مجھ سے گھوڑے کی ریس لگائے گا؟ ایک نوجوان نے کہا کہ میں لگانے کو تیار ہوں اگر آپ غصہ نہ کریں تو، راوی فرماتے ہیں کہ پس وہ ان سے آگے نکل گیا، میں حضرت ابو عبیدہ رضی اللہ عنہ کی دونوں مینڈھیوں کو دیکھ رہا تھا کہ وہ اچھل رہی تھیں اور وہ اس نوجوان کے پیچھے عربی گھوڑے پر سوار تھے۔ [مصنف ابن ابي شيبه/كتاب السير/حدیث: 35795]

حضرت زھری فرماتے ہیں کہ رسول اللہ صلی اللہ علیہ وسلم کے زمانے میں صحابہ ریس لگایا کرتے تھے۔ [مصنف ابن ابي شيبه/كتاب السير/حدیث: 35796]

حضرت زھری رحمہ اللہ فرماتے ہیں کہ سب سے پہلے حضرت عمر بن خطاب رضی اللہ عنہ نے اس پر انعام عطا فرمایا۔ [مصنف ابن ابي شيبه/كتاب السير/حدیث: 35797]

حضرت ابراہیم رحمہ اللہ فرماتے ہیں کہ حضرت علقمہ رحمہ اللہ کے پاس ایک غیر عربی گھوڑا تھا جس پر وہ ریس لگایا کرتے تھے۔ [مصنف ابن ابي شيبه/كتاب السير/حدیث: 35798]

ابراہیم رحمہ اللہ فرماتے ہیں کہ حضرت علقمہ نے ایک آدمی سے ریس لگائی تو وہ اس شخص سے آ گے نکل گئے تو انہوں نے اس کی لگام کھینچ کر اتار لی۔ [مصنف ابن ابي شيبه/كتاب السير/حدیث: 35799]