حضرت مالک بن حارث رحمہ اللہ یا کسی اور نے فرمایا کہ قادسیہ کے دن تم جب بھی سننا چاہتے کہ میں نخعی غلام (جوان) ہوں تو تم یہ سن لیتے۔ [مصنف ابن ابي شيبه/كتاب السير/حدیث: 35830]

حضرت قیس بن ابو حازم رحمہ اللہ فرماتے ہیں کہ جنگ قادسیہ کے دن ہم لوگ صفوں میں تھے ہمارے پاس سے حضرت عمرو بن معدی کرب رضی اللہ عنہ گزرے اور فرمایا: اے عرب کے جوانو! سخت جان شیر بن جاؤ، بیشک شیر تو وہ ہوتا ہے جو غنی کر دے، اور فارسی لوگ بکرے کی طرح ہیں بعد اس کے کہ وہ اپنا چھوٹا نیزہ پھینک دیں۔ [مصنف ابن ابي شيبه/كتاب السير/حدیث: 35831]

حضرت براء رضی اللہ عنہ سے مروی ہے کہ نبی اکرم صلی اللہ علیہ وسلم نے غزوہ حنین کے دن فرمایا: میں نبی ہوں اس میں کوئی جھوٹ نہیں اور میں عبدالمطلب کا بیٹا ہوں۔ [مصنف ابن ابي شيبه/كتاب السير/حدیث: 35832]

حضرت انس رضی اللہ عنہ سے مروی ہے کہ نبی کریم صلی اللہ علیہ وسلم کی عضباء نامی ایک اونٹنی تھی، جو کبھی ریس نہیں ہاری تھی ایک اعرابی اپنے جوان اونٹ پر آیا اور اس سے سبقت لے گیا، مسلمانوں پر یہ بہت گراں گزرا جب آنحضرت صلی اللہ علیہ وسلم نے مسلمانوں کے چہروں پر ناگواری کے اثرات دیکھے تو لوگوں نے کہا اے اللہ کے رسول صلی اللہ علیہ وسلم ! عضباء ہار گئی، آنحضرت صلی اللہ علیہ وسلم نے ارشاد فرمایا: اللہ کیلئے یہ بات ثابت ہے کہ دنیا میں کسی چیز کو بلند نہیں کرتے مگر پھر اس کو پست فرما دیتے ہیں۔ [مصنف ابن ابي شيبه/كتاب السير/حدیث: 35833]

حضرت انس رضی اللہ عنہ سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35834]

حضرت جعفر رحمہ اللہ اپنے والد سے روایت کرتے ہیں کہ رسول اللہ صلی اللہ علیہ وسلم نے اونٹ کی ریس جاری فرمائی، اور (راوی نے) انعام کا ذکر نہیں کیا۔ [مصنف ابن ابي شيبه/كتاب السير/حدیث: 35835]

حضرت علی بن حسین رحمہ اللہ سے مروی ہے کہ رسول اکرم صلی اللہ علیہ وسلم غزوہ تبوک میں تھے، انصار نے کہا مقابلہ ومسابقہ ہوجائے، آنحضرت صلی اللہ علیہ وسلم نے ارشاد فرمایا اگر تم چاہو تو مقابلہ کرلو۔ [مصنف ابن ابي شيبه/كتاب السير/حدیث: 35836]

حضرت عائشہ رضی اللہ عنہا فرماتی ہیں کہ ہم لوگ رسول اکرم صلی اللہ علیہ وسلم کے ساتھ ایک سفر میں تھے ہم نے ایک جگہ پڑاؤ ڈالا نبی کریم صلی اللہ علیہ وسلم نے مجھ سے فرمایا آؤ دوڑ لگاتے ہیں، ہم نے مسابقہ کیا اور میں سبقت لے گئی، پھر آپ کے ساتھ ایک اور سفر میں تھے اور ہم نے ایک جگہ پڑاؤ ڈالا تو آنحضرت صلی اللہ علیہ وسلم نے مجھ سے فرمایا: آؤ دوڑ لگاتے ہیں، حضرت عائشہ رضی اللہ عنہا فرماتی ہیں کہ آنحضرت صلی اللہ علیہ وسلم مجھ سے سبقت لے گئے اور پھر میرے کندھے کے درمیان ہاتھ مار کر فرمایا یہ اس مقابلہ کا بدلہ ہے۔ [مصنف ابن ابي شيبه/كتاب السير/حدیث: 35837]

حضرت عبدالرحمن رحمہ اللہ فرماتے ہیں کہ میں اپنے والد کے ساتھ مقام جبان کی طرف گیا تو والد صاحب نے مجھ سے فرمایا اے بیٹے آؤ دوڑنے کا مقابلہ کرتے ہیں فرماتے ہیں کہ پھر ہم نے مقابلہ کیا اور وہ مجھ سے سبقت لے گئے۔ [مصنف ابن ابي شيبه/كتاب السير/حدیث: 35838]

حضرت عائشہ رضی اللہ عنہا ارشاد فرماتی ہیں کہ رسول اکرم صلی اللہ علیہ وسلم نے مجھ سے دوڑنے کا مقابلہ کیا تو میں آپ سے آگے بڑھ گئی۔ حماد فرماتے ہیں کہ اس سے مراد پیدل دوڑ ہے۔ [مصنف ابن ابي شيبه/كتاب السير/حدیث: 35839]