حضرت عروہ رحمہ اللہ فرماتے ہیں کہ مسیلمہ کے خلاف جنگ میں مسلمانوں کا نعرہ تھا، اے سورة البقرہ والو۔ [مصنف ابن ابي شيبه/كتاب السير/حدیث: 35820]

حضرت طلحہ بن مصرف رحمہ اللہ فرماتے ہیں کہ جنگ حنین میں جب مسلمان پسپا ہوئے تو انہیں اے سورة البقرہ والو کہہ کر پکارا گیا جب وہ واپس پلٹے تو وہ رو رہے تھے۔ [مصنف ابن ابي شيبه/كتاب السير/حدیث: 35821]

حضرت زبیر بن صراخ رحمہ اللہ فرماتے ہیں کہ حضرت مصعب بن زبیر رحمہ اللہ نے ہم سے فرمایا جبکہ ہم مختار کے مقابلے میں صف بستہ تھے: تمہارا نعرہ حم لا ینصرون ہونا چاہیے کیوں کہ نبی کریم صلی اللہ علیہ وآلہ وسلم کا بھی یہی شعار تھا۔ [مصنف ابن ابي شيبه/كتاب السير/حدیث: 35822]

حضرت عبد اللہ رضی اللہ عنہ بن عمرو فرماتے ہیں انصار کا نعرہ عبد اللہ اور مہاجرین کا نعرہ عبدالرحمن تھا۔ [مصنف ابن ابي شيبه/كتاب السير/حدیث: 35823]

حضرت البراء رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: کل تمہاری دشمن سے ملاقات ہوگی اور تمہارا نعرہ حم لا ینصرون ہوگا۔ [مصنف ابن ابي شيبه/كتاب السير/حدیث: 35824]

حضرت ابو اسحاق رحمہ اللہ سے مروی ہے کہ نبی کریم صلی اللہ علیہ وسلم نے حضرت طلحہ رضی اللہ عنہ کو ایک سریہ میں بھیجا جس میں دس افراد تھے تو آپ صلی اللہ علیہ وسلم نے فرمایا تمہارا نعرہ یا عشر ہے۔ [مصنف ابن ابي شيبه/كتاب السير/حدیث: 35825]

حضرت مغیرہ بن شعبہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: قیامت کے دن پل صراط پر مسلمانوں کا نعرہ اللھم سلم، سلم ہوگا۔ [مصنف ابن ابي شيبه/كتاب السير/حدیث: 35826]

حضرت سمرہ بن جندب رضی اللہ عنہ فرماتے ہیں کہ مہاجرین کا نعرہ عبد اللہ اور حضرات انصار کا نعرہ عبدالرحمن تھا۔ [مصنف ابن ابي شيبه/كتاب السير/حدیث: 35827]

حضرت ابو عقبہ رضی اللہ عنہ فرماتے ہیں کہ میں رسول اکرم صلی اللہ علیہ وسلم کے ساتھ غزوہ احد میں شریک تھا میں نے ایک مشرک کو یہ کہہ کر تلوار ماری کہ یہ لو میں فارسی غلام ہوں، آنحضرت صلی اللہ علیہ وسلم کو اس کی خبر ہوئی تو آپ صلی اللہ علیہ وسلم نے فرمایا آپ نے یوں کیوں نہ کہا کہ میری طرف سے یہ وار سہو میں انصاری غلام ہوں۔ [مصنف ابن ابي شيبه/كتاب السير/حدیث: 35828]

حضرت قیس بن بشر رحمہ اللہ فرماتے ہیں کہ میرے والد دمشق میں حضرت ابو الدرداء رضی اللہ عنہ کی مجلس میں بیٹھا کرتے تھے، دمشق میں ایک ابن الحنظلیہ نامی انصاری صحابی تھے، ایک دن جب میں حضرت ابو الدرداء رضی اللہ عنہ کے پاس تھا تو وہ ہمارے پاس سے گزرے حضرت ابو الدرداء رضی اللہ عنہ نے فرمایا: کوئی بات سنائیے جو ہمیں تو فائدہ دے لیکن آپ کو نقصان نہ دے انہوں نے فرمایا کہ آنحضرت صلی اللہ علیہ وسلم نے ایک سریہ جہاد کیلئے بھیجا جب وہ واپس آیا تو ان میں سے ایک شخص رسول اکرم صلی اللہ علیہ وسلم کی مجلس میں آ کر بیٹھ گیا اور کچھ دیر بعد اپنے ساتھ والے شخص سے کہا: اگر آپ وہ منظر دیکھ لیتے جب ہماری دشمن سے ملاقات ہوئی فلاں شخص نے یہ کہہ کر دشمن کو نیزہ مارا کہ یہ لو میں غفاری غلام ہوں، دوسرے شخص نے کہا کہ میرا خیال ہے کہ اس نے اپنا اجر ضائع کردیا ہے، اور پہلے والے شخص نے کہا کہ میرے خیال میں تو اس میں کوئی حرج نہیں ہے، ان کا اس معاملہ میں تنازعہ ہوگیا اور اختلاف ہوگیا تو آنحضرت صلی اللہ علیہ وسلم تک بھی بات پہنچ گئی، آنحضرت صلی اللہ علیہ وسلم نے ارشاد فرمایا: سبحان اللہ (بطور تعجب) کوئی حرج نہیں ہے کہ ان کو اجر دیا جائے گا اور اس کی تعریف کی جائے گی راوی کہتے ہیں کہ میں نے حضرت ابو الدرداء رضی اللہ عنہ کو دیکھا کہ آپ اس کو سن کر بہت خوش ہوئے یہاں تک کہ آپ اوپر اٹھے اور قریب تھا کہ اپنے گھٹنوں کے بل بیٹھ جاتے اور دریافت کیا کہ کیا آپ رضی اللہ عنہ نے خود رسول اکرم صلی اللہ علیہ وسلم سے یہ سنا ہے؟ انہوں نے فرمایا ہاں میں نے خود سنا ہے۔ [مصنف ابن ابي شيبه/كتاب السير/حدیث: 35829]