ابراہیم رحمہ اللہ فرماتے ہیں کہ غزوہ ذات السلاسل میں نبی کریم صلی اللہ علیہ وسلم نے حضرت عمرو بن عاص رضی اللہ عنہ کو جھنڈا باندھ کردیا۔ [مصنف ابن ابي شيبه/كتاب السير/حدیث: 35860]

حضرت عمرہ رحمہا اللہ فرماتی ہیں کہ نبی کریم صلی اللہ علیہ وسلم کا جھنڈا سفید تھا۔ [مصنف ابن ابي شيبه/كتاب السير/حدیث: 35861]

حضرت ابو نضرہ رحمہ اللہ فرماتے ہیں کہ ایک دن نبی کریم صلی اللہ علیہ وسلم کا دشمن سے آمنا سامنا ہوا آنحضرت صلی اللہ علیہ وسلم نے اپنے صحابہ رضی اللہ عنہم سے فرمایا: جو تم میں سے دشمن کا سر کاٹ کر لائے اس کو اللہ وہ چیز عطا کرے گا جس کی وہ تمنا کرے۔ [مصنف ابن ابي شيبه/كتاب السير/حدیث: 35862]

حضرت براء بن عازب رضی اللہ عنہ فرماتے ہیں کہ آنحضرت صلی اللہ علیہ وسلم نے ایک شخص کی طرف سپاہی بھیجے جس نے اپنے والد کی بیوی کے ساتھ نکاح کرلیا تھا اور حکم دیا اس کا سرکاٹ کر لاؤ۔ [مصنف ابن ابي شيبه/كتاب السير/حدیث: 35863]

حضرت عبد اللہ رضی اللہ عنہ فرماتے ہیں کہ غزوہ بدر میں میں، حضرت سعد اور حضرت عمار شریک تھے، حضرت سعد دو دشمنوں کا سرکاٹ کر لائے۔ [مصنف ابن ابي شيبه/كتاب السير/حدیث: 35864]

حضرت ھنیدہ بن خالد الخزاعی رضی اللہ عنہ فرماتے ہیں کہ اسلام میں پہلا سر جو کاٹ کر کسی طرف بھیجا گیا وہ ابن الحمیق کا سر تھا جو حضرت معاویہ کی طرف بھیجا گیا۔ [مصنف ابن ابي شيبه/كتاب السير/حدیث: 35865]

حضرت ابوبکر صدیق رضی اللہ عنہ یا حضرت عمر رضی اللہ عنہ (اوزاعی کو شک ہے) نے عقبہ بن عامر اور مسلمہ بن مخلد رضی اللہ عنہ ما کو مصر کی طرف جہاد کیلئے بھیجا، انہوں نے مصر فتح کرلیا اور یناق البطریق کا سر ان کو بھیج دیا، جب انہوں نے سر کو دیکھا تو ناپسند کیا، ان حضرات نے فرمایا یہ لوگ بھی ہمارے ساتھ اسی طرح کرتے ہیں، حضرت ابوبکر یا حضرت عمر رضی اللہ عنہ ما نے فرمایا: کیا فارس اور روم کے طریقے کی پیروی کی جا رہی ہے؟ کٹے ہوئے سر ہماری طرف نہ بھیجے جائیں۔ ہمارے لیے یہی کافی ہے کہ جیتنے کی خبر یا خط بھیج دیا کریں۔ [مصنف ابن ابي شيبه/كتاب السير/حدیث: 35866]

حضرت کعب رضی اللہ عنہ سے مروی ہے کہ نبی کریم صلی اللہ علیہ وسلم جمعرات کے علاوہ بہت کم ہی سفر فرمایا کرتے تھے۔ [مصنف ابن ابي شيبه/كتاب السير/حدیث: 35867]

حضرت واصل رحمہ اللہ سے مروی ہے کہ آنحضرت صلی اللہ علیہ وسلم جمعرات کے دن سفر فرمایا کرتے تھے۔ [مصنف ابن ابي شيبه/كتاب السير/حدیث: 35868]

حضرت صخر الغامدی رضی اللہ عنہ سے مروی ہے کہ نبی کریم صلی اللہ علیہ وسلم نے دعا فرمائی کہ: اے اللہ! میری امت کے صبح کے اوقات میں برکت عطا فرما، آنحضرت صلی اللہ علیہ وسلم جب کوئی لشکر یا سریہ بھیجتے تو صبح کے وقت بھیجتے۔ حضرت صخر رضی اللہ عنہ ایک تاجر تھے جو تجارت کیلئے صبح کے وقت قافلہ (مال) بھیجا کرتے تھے ان کے مال میں (منافع) میں بہت اضافہ ہوگیا تھا۔ [مصنف ابن ابي شيبه/كتاب السير/حدیث: 35869]