حضرت ابن عمر رضی اللہ عنہما سے اسی طرح مروی ہے۔ [مصنف ابن ابي شيبه/كتاب السير/حدیث: 35880]

حضرت انس بن مالک رضی اللہ عنہ فرماتے ہیں کہ وہ ایک سفر میں رسول اکرم صلی اللہ علیہ وسلم کے ساتھ تھے، جب مدینہ کے باہر یا حرہ کے مقام پر پہنچے تو آنحضرت صلی اللہ علیہ وسلم نے یہ دعا پڑھی آیِبُونَ تَائِبُونَ عَابِدُونَ، إِنْ شَائَ اللّٰہُ لِرَبِّنَا حَامِدُونَ۔”ہم واپس آنے والے، توبہ کرنے والے، عبادت کرنے والے اور ان شاء اللہ اپنے رب کی تعریف کرنے والے ہیں“ [مصنف ابن ابي شيبه/كتاب السير/حدیث: 35881]

ابراہیم تیمی رحمہ اللہ فرماتے ہیں کہ وہ حضرات جب سفر سے لوٹتے تو یہ دعا پر ھتے آیِبُونَ تَائِبُونَ، لِرَبِّنَا حَامِدُونَ۔”ہم واپس آنے والے، توبہ کرنے والے اور اپنے رب کی تعریف کرنے والے ہیں“ [مصنف ابن ابي شيبه/كتاب السير/حدیث: 35882]

حضرت البراء رضی اللہ عنہ سے مروی ہے کہ آنحضرت صلی اللہ علیہ وسلم جب سفر سے واپس آتے تو یہ دعا پڑھتے آیِبُونَ تَائِبُونَ، لِرَبِّنَا حَامِدُونَ۔ ”ہم واپس آنے والے، توبہ کرنے والے اور اپنے رب کی تعریف کرنے والے ہیں“ [مصنف ابن ابي شيبه/كتاب السير/حدیث: 35883]

حضرت عطاء رحمہ اللہ سے مروی ہے کہ نبی کریم صلی اللہ علیہ وسلم نے تنہا سفر کرنے سے منع فرمایا ہے۔ [مصنف ابن ابي شيبه/كتاب السير/حدیث: 35884]

حضرت عطاء رحمہ اللہ فرماتے ہیں کہ حضرت عمر رضی اللہ عنہ نے دو آدمیوں کے سفر پر جانے سے منع فرمایا۔ [مصنف ابن ابي شيبه/كتاب السير/حدیث: 35885]

حضرت حسن رحمہ اللہ اکیلے آدمی اور دو آدمیوں کے سفر کرنے کو ناپسند کرتے تھے۔ ہاں مگر جب تین یا زائد ہوں تو پھر اجازت ہے۔ [مصنف ابن ابي شيبه/كتاب السير/حدیث: 35886]

حضرت مجاہد رحمہ اللہ سے مروی ہے کہ آنحضرت صلی اللہ علیہ وسلم سے دریافت کیا گیا تنہا آدمی کا سفر کرنا کیسا ہے؟ آپ نے فرمایا شیطان ہے، پوچھا گیا کہ اگر دو ہوں؟ فرمایا دو شیطان ہیں، پوچھا گیا اگر تین ہوں؟ فرمایا ساتھی (قافلہ) ہیں۔ [مصنف ابن ابي شيبه/كتاب السير/حدیث: 35887]

حضرت مجاہد رحمہ اللہ فرماتے ہیں کہ تنہا سوار ہو کر سفر کرنے والا شیطان ہے اور دو سوار دو شیطان ہیں اور تین ساتھی (قافلہ) ہیں۔ [مصنف ابن ابي شيبه/كتاب السير/حدیث: 35888]

حضرت عکرمہ رحمہ اللہ فرماتے ہیں کہ آنحضرت صلی اللہ علیہ وسلم نے ویران جگہ میں تنہا سفر کرنے سے منع فرمایا ہے۔ [مصنف ابن ابي شيبه/كتاب السير/حدیث: 35889]