حضرت عبد اللہ بن بریدہ رحمہ اللہ فرماتے ہیں کہ حضرت عمر رضی اللہ عنہ نے حضرت ابوبکر رضی اللہ عنہ سے فرمایا جب حضرت عمرو بن عاص رضی اللہ عنہ نے لوگوں کو آگ جلانے سے منع فرمایا کہ کیا آپ اس شخص کو دیکھتے ہیں جس نے لوگوں کو ان کے فائدے سے روکا حضرت ابوبکر رضی اللہ عنہ نے فرمایا چھوڑ دو، ان کی جنگی چالوں میں مہارت کی وجہ سے رسول اکرم صلی اللہ علیہ وسلم نے انہیں ہمارا امیر بنایا۔ [مصنف ابن ابي شيبه/كتاب السير/حدیث: 35920]

حضرت شعبی رحمہ اللہ فرماتے ہیں کہ رسول اکرم صلی اللہ علیہ وسلم نے جنگ احد کے دن مشرکین کے ساتھ خفیہ چال چلی، یہ پہلا موقع اور دن تھا جس میں ان کے ساتھ چال چلی گئی تھی۔ [مصنف ابن ابي شيبه/كتاب السير/حدیث: 35921]

حضرت عبدالملک بن ابجر رحمہ اللہ سے مروی ہے کہ صبیح نامی ایک شخص نے کہا: ہم فطح کے لوگ حضرت علی رضی اللہ عنہ کے ساتھ تھے، فرماتے ہیں کہ حضرت علی رضی اللہ عنہ تجربہ کار انسان تھے، فرماتے تھے کہ جنگ خفیہ چال چلنے کا نام ہے، فرماتے ہیں کہ وہ چٹان تک پہنچتے اور فرماتے: اللہ اکبر، اللہ اور اس کے رسول صلی اللہ علیہ وسلم نے سچ فرمایا، چٹان ہے۔ راوی فرماتے ہیں کہ ہم سمجھتے کہ یہ کوئی بات ہے جو انہیں بتائی گئی ہے، پھر وہ دجلہ تک پہنچتے اور فرماتے: دجلہ، اللہ اکبر، اللہ اور اس کے رسول صلی اللہ علیہ وسلم نے سچ فرمایا، اور ہم سمجھتے کہ یہ کوئی بات ہے جو انہیں بتائی گئی ہے۔ [مصنف ابن ابي شيبه/كتاب السير/حدیث: 35922]

حضرت عامر رحمہ اللہ فرماتے ہیں کہ جنگ خفیہ چال چلنے کا نام ہے۔ [مصنف ابن ابي شيبه/كتاب السير/حدیث: 35923]

حضرت یحییٰ بن عباد بن عبد اللہ بن زبیر رحمہ اللہ اپنے والد اور دادا سے روایت کرتے ہیں کہ مجھے میرے والد نے بتایا جنہوں نے مجھے بنو مرہ میں دودھ پلایا فرمایا گویا کہ میں جنگ موتہ کے دن حضرت جعفر رضی اللہ عنہ کو دیکھ رہا ہوں اپنے گھوڑے سے اترے جو سرخی مائل تھا، پھر اس کی کونچیں کاٹ دیں اور جنگ میں شریک ہوگئے اور لڑتے رہے یہاں تک کہ آپ شہید ہوگئے۔ [مصنف ابن ابي شيبه/كتاب السير/حدیث: 35924]

حضرت قیس رحمہ اللہ یا کسی اور سے مروی ہے کہ حضرت ابوبکر رضی اللہ عنہ نے ملک شام کی طرف لشکر بھیجا اور فرمایا: جس جانور کو تم نے تھکا دیا ہو اس کی کونچیں مت کاٹو۔ [مصنف ابن ابي شيبه/كتاب السير/حدیث: 35925]

حضرت عمر بن عبدالعزیز رحمہ اللہ فرماتے ہیں کہ وہ جانور جو تھک جائیں ان کی کونچیں نہیں کاٹی جائیں گی۔ [مصنف ابن ابي شيبه/كتاب السير/حدیث: 35926]

حضرت زھری رحمہ اللہ فرماتے ہیں کہ جب سرایا بھیجے جاتے تو ان کو کہا جاتا کہ تھک جانے والے جانور کی کونچیں مت کاٹنا۔ [مصنف ابن ابي شيبه/كتاب السير/حدیث: 35927]

حضرت ابوبکر رضی اللہ عنہ فرماتے ہیں کہ جانور کی کونچیں مت کاٹو اگرچہ وہ تھک جائے۔ [مصنف ابن ابي شيبه/كتاب السير/حدیث: 35928]

حضرت شعبی رحمہ اللہ سے مروی ہے کہ نبی کریم صلی اللہ علیہ وسلم نے ارشاد فرمایا: جو شخص کسی جانور کو ہلاکت والی جگہ پر پائے تو جو اس کو پکڑ کر زندہ کر دے (اس کو پال لے) وہ اسی کا ہے۔ [مصنف ابن ابي شيبه/كتاب السير/حدیث: 35929]