حضرت ابو عیبدہ بن جراح رضی اللہ عنہ فرماتے ہیں کہ سب سے آخری کلام جو رسول اللہ صلی اللہ علیہ وسلم نے ارشاد فرمایا: وہ یہ تھا کہ یہودیوں کو حجا ز کے علاقہ سے اور نجران کے عیسائیوں کو جزیرہ عرب سے نکال دو۔ [مصنف ابن ابي شيبه/كتاب السير/حدیث: 35201]

حضرت ابن عمر رضی اللہ عنہما فرماتے ہیں کہ حضرت عمر رضی اللہ عنہ نے ارشاد فرمایا: یہود و نصاریٰ کو مدینہ میں تین دن سے زیادہ مت چھوڑو پس اتنی دیر کہ وہ اپنا سامان فروخت کردیں اور فرمایا: کہ جزیرہ عرب میں دو دین اکٹھے نہیں ہوسکتے۔ [مصنف ابن ابي شيبه/كتاب السير/حدیث: 35202]

حضرت طاؤس رحمہ اللہ فرماتے ہیں کہ حضرت ابن عباس رضی اللہ عنہما نے ارشاد فرمایا: تم لوگ یہود و نصاریٰ کے ساتھ اکٹھے مت رہو مگر یہ کہ وہ اسلام لے آئیں۔ [مصنف ابن ابي شيبه/كتاب السير/حدیث: 35203]

حضرت ابن ابی ذئب رحمہ اللہ فرماتے ہیں کہ وہ حضرت عمر بن عبد العزیز رحمہ اللہ کے زمانہ خلافت میں ان کے پاس حاضر تھے تو آپ رحمہ اللہ نے ذمیوں کو مدینہ منورہ سے نکال دیا۔ اور ان کے غلاموں کو مسلمانوں کے ہاتھ فروخت کردیا۔ [مصنف ابن ابي شيبه/كتاب السير/حدیث: 35204]

حضرت جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر میں زندہ رہا تو میں ضرور مشرکین کو جزیرۂ عرب سے نکال دوں گا۔ جب حضرت عمر رضی اللہ عنہ کو خلافت ملی تو آپ رضی اللہ عنہ نے ان کو جزیرۂ عرب سے نکال دیا۔ [مصنف ابن ابي شيبه/كتاب السير/حدیث: 35205]

حضرت ابو الزبیر رحمہ اللہ فرماتے ہیں کہ ہم نے جابر بن عبد اللہ رضی اللہ عنہ سے پوچھا: کیا آتش پرست حرم کی حدود میں داخل ہوسکتا ہے؟ آپ رضی اللہ عنہ نے فرمایا: ہاں جو ہمارے اہل ذمہ ہیں وہ ہوسکتے ہیں۔ [مصنف ابن ابي شيبه/كتاب السير/حدیث: 35206]

حضرت قیس رحمہ اللہ فرماتے ہیں کہ نبی کریم صلی اللہ علیہ وآلہ وسلم نے ایک لشکر بھیجا پھر ارشاد فرمایا: خبردار میں ہر اس مسلمان سے بری ہوں جو مشرک کے ساتھ ہے۔ یہ دونوں اکٹھے نہیں رہ سکتے۔ [مصنف ابن ابي شيبه/كتاب السير/حدیث: 35207]

حضرت اسلم رحمہ اللہ جو کہ حضرت عمر رضی اللہ عنہ کے آزاد کردہ غلام ہیں فرماتے ہیں کہ حضر ت عمر رضی اللہ عنہ ذمیوں کی گردن میں مہر لگاتے تھے۔ [مصنف ابن ابي شيبه/كتاب السير/حدیث: 35208]

حضرت میمون بن مہران رحمہ اللہ فرماتے ہیں کہ حضرت عمر رضی اللہ عنہ نے حضرت حذیفہ بن یمان رضی اللہ عنہ اور حضرت ابن حُنیف رضی اللہ عنہ ان دونوں کو بھیجا۔ پس ان دونوں نے اہل سواد پر جزیہ مقرر کیا۔ اور دونوں نے فرمایا: اہل سواد میں سے جس شخص نے آکر اپنی گردن میں مہر نہ لگوائی تو اس سے ذمہ بری ہے۔ [مصنف ابن ابي شيبه/كتاب السير/حدیث: 35209]

حضرت ابو المنبہ رحمہ اللہ فرماتے ہیں کہ اہل یمامہ میں سے ایک آدمی نے اللہ کے راستہ میں گھوڑے کی وصیت کی۔ پس میرا چچا زاد آگیا تو میں نے اس شخص سے کہا اس پر میرے بھائی کو سوار کردو۔ اس لیے کہ میرا بھائی نیک آدمی ہے۔ اس نے کہا: میں حسن بصری رحمہ اللہ سے پوچھ لوں۔ اس نے حسن بصری رحمہ اللہ سے پوچھا؟ انہوں نے فرمایا: اس پر کسی آدمی کو سوار کردو اور اس بارے میں کسی کی طرفداری مت کرنا۔ راوی کہتے ہیں: میں نے حسن بصری رحمہ اللہ سے پوچھا: اگر وہ اس کا ضرورت مند ہو؟ آپ رحمہ اللہ نے فرمایا: کہ وہ اس کو لشکر میں سے کسی کے ہاتھ فروخت کردے۔ اور اس کو ان موالی میں سے کسی کو مت دو۔ ان میں سے کوئی اسے اپنے گھر والوں کے خرچ کے لیے چھوڑ دے گا۔ [مصنف ابن ابي شيبه/كتاب السير/حدیث: 35210]