حضرت مکحول فرماتے ہیں کہ ھجین گھوڑے کے لیے بھی غنیمت میں ایک حصہ ہے۔ [مصنف ابن ابي شيبه/كتاب السير/حدیث: 35411]

حضرت سفیان فرماتے ہیں کہ عربی اور غیر عربی (ترکی النسل) گھوڑے برابر ہیں۔ [مصنف ابن ابي شيبه/كتاب السير/حدیث: 35412]

حضرت اوزاعی رحمہ اللہ فرماتے ہیں کہ ہمارے علماء میں سے کوئی بھی ترکی النسل کو حصہ نہیں دیتا تھا۔ [مصنف ابن ابي شيبه/كتاب السير/حدیث: 35413]

حضرت مجاہد رحمہ اللہ سے مروی ہے کہ نبی کریم صلی اللہ علیہ وسلم نے خچر کے لیے ایک حصہ اور پیادہ کے لیے ایک حصہ مقرر فرمایا۔ [مصنف ابن ابي شيبه/كتاب السير/حدیث: 35414]

حضرت حسن رحمہ اللہ فرماتے ہیں خچر سوار پیادہ کے مثل ہے۔ [مصنف ابن ابي شيبه/كتاب السير/حدیث: 35415]

حضرت مکحول رحمہ اللہ فرماتے ہیں کہ فقہاء کرام خچر اور ترکی النسل اور گدھے کیلئے حصہ مقرر نہ فرماتے تھے۔ [مصنف ابن ابي شيبه/كتاب السير/حدیث: 35416]

حضرت حسن رحمہ اللہ فرماتے ہیں کہ اگر کوئی شخص کئی گھوڑوں کے ساتھ جہاد میں حاضر ہو تو تقسیم غنیمت کے وقت صرف دو گھوڑوں کو حصہ دیا جائے گا۔ [مصنف ابن ابي شيبه/كتاب السير/حدیث: 35417]

حضرت مکحول رحمہ اللہ فرماتے ہیں کہ اگر ایک شخص کے پاس کئی گھوڑے ہوں تو دو گھوڑوں سے زیادہ کو حصہ نہیں دیا جائے گا، ان دو کے علاوہ جو ہیں وہ تو صرف تھکاوٹ کے بعد اس پر سوار ہونے کے لیے احتیاطا رکھے گئے ہیں۔ [مصنف ابن ابي شيبه/كتاب السير/حدیث: 35418]

حضرت ابو اسحاق رحمہ اللہ فرماتے ہیں کہ ہم لوگ حضرت سعید بن عثمان کے ساتھ جہاد میں شریک ہوئے، ہمارے ساتھ ھانی بن ھانی تھے، میرے پاس دو گھوڑے اور حضرت ھانی کے پاس بھی دو گھوڑے تھے، میرے اور میرے گھوڑوں کے لیے پانچ حصے دیئے گئے، اور حضرت ھانی کو گھوڑے اور ان کے لیے پانچ حصے دیئے گئے۔ [مصنف ابن ابي شيبه/كتاب السير/حدیث: 35419]

حضرت حسن رحمہ اللہ فرماتے ہیں کہ دو گھوڑوں سے زیادہ کے لیے حصہ نہیں ہے، اگر کسی کے پاس دو گھوڑے ہوں تو اس کو پانچ حصے دیئے جائیں گئے، چار حصے ا س کے گھوڑوں کے لیے اور ایک حصہ اس کے لیے۔ [مصنف ابن ابي شيبه/كتاب السير/حدیث: 35420]