حضرت عمرو بن میمون سے مروی ہے کہ حضرت جعونہ بن حارث رحمہ اللہ جو ملطیہ کی سرحد کے نگران تھے، انہوں نے حضرت عمر بن عبدالعزیز رحمہ اللہ کو خط لکھا کہ کچھ لوگ کمزور گھوڑوں پر جہاد کرتے ہیں، کوئی جذع پر کوئی ثنی پر ہوتا ہے، ان سے مسلمانوں کا کوئی دفاع نہیں ہوتا، اور کوئی طاقتور برذون گھوڑے پر جہاد کرتا ہے جو عربی گھوڑے سے کم نہیں ہوتا، سوائے اس کے کہ اس کو برذون کہا جاتا ہے، اے امیر المومنین آپ کی اس میں کیا رائے ہے؟ حضرت عمر بن عبدالعزیز رحمہ اللہ نے جواب تحریر فرمایا: ان کمزور گھوڑوں میں سے جن سے مسلمانوں کا کوئی دفاع نہیں ہوتا، ان کے مالکوں کو بتادو کہ تم ان کے لیے حصہ مقرر نہیں کرو گے، خواہ وہ ان کو ساتھ لے جائیں یا چھوڑ دیں، اور ترکی النسل گھوڑوں میں سے جو دوڑ اور دیکھنے میں عمدہ ہوں ان کو وہی حصہ دو جو عربی النسل گھوڑوں کے لیے ہے۔ [مصنف ابن ابي شيبه/كتاب السير/حدیث: 35401]

حضرت حسن رحمہ اللہ فرماتے ہیں کہ ترکی النسل گھوڑا بھی حکم میں عام گھوڑوں کی طرح ہے۔ [مصنف ابن ابي شيبه/كتاب السير/حدیث: 35402]

حضرت حسن رحمہ اللہ فرماتے ہیں کہ ترکی النسل گھوڑے کے مالک کے لیے غنیمت میں ایک حصہ ہے۔ [مصنف ابن ابي شيبه/كتاب السير/حدیث: 35403]

حضرت خالد بن معدان سے مروی ہے کہ آنحضرت صلی اللہ علیہ وسلم نے عربی النسل گھوڑے کے لیے دو حصے اور غیر عربی گھوڑے کو ایک حصہ دیا۔ [مصنف ابن ابي شيبه/كتاب السير/حدیث: 35404]

حضرت ابو موسیٰ رضی اللہ عنہ نے حضرت عمر رضی اللہ عنہ کو خط لکھا کہ جب ہم نے مقام تستر فتح کیا تو ہمیں غنیمت میں کچھ براذین گھوڑے ملے ہیں حضرت عمر رضی اللہ عنہ نے تحریر فرمایا براذین گھوڑوں میں جو عمدہ ہیں تو ان کو حصہ دو، اور جو ان کے علاوہ ہیں وہ بےکار ہیں، ان کے لیے حصہ نہیں [مصنف ابن ابي شيبه/كتاب السير/حدیث: 35405]

حضرت ابن الاقمر سے مروی ہے کہ گھڑ سواروں نے شام میں دھاوا بولا، عربی گھوڑے اسی دن (دشمن تک) پہنچ گئے، اور ترکی النسل گھوڑے اگلے دن چاشت کے وقت پہنچے، حضرت ابن ابی خمیصہ نے فرمایا: جو پہنچ گیا میں اس کو اس کے برابر نہ ٹھہراؤں گا جو نہیں پہنچا، حضرت عمر رضی اللہ عنہ کو خط لکھا گیا، حضرت عمر رضی اللہ عنہ نے ارشاد فرمایا وادعی کی ماں اس کو گم پائے، اس نے کیسا مرد جنا ہے! جو کچھ اس نے کہا ہے اس پر چلو۔ [مصنف ابن ابي شيبه/كتاب السير/حدیث: 35406]

حضرت شعبی رحمہ اللہ فرماتے ہیں کہ حضرت منذر بن دھر بن خمیصہ دشمن کے تعاقب میں نکلے، عمدہ عربی النسل گھوڑے (دشمن تک) پہنچ گئے، اور ترکی النسل گھوڑے پیچھے رہ گئے، پس عربی گھوڑوں کے لیے دو حصے اور ترکی النسل کے لیے ایک حصہ مقرر کیا، پھر حضرت عمر رضی اللہ عنہ کو اس کے متعلق لکھا، آپ نے یہ پسند کیا اور اس کے بعد گھوڑوں کے لیے یہ طریقہ جاری ہوگیا۔ [مصنف ابن ابي شيبه/كتاب السير/حدیث: 35407]

حضرت کلثوم بن الاقمر سے بھی اسی طرح مروی ہے صرف اس میں اتنا اضافہ ہے کہ ترکی النسل گھوڑوں کے لیے حصہ مقرر نہ فرمایا۔ ان میں سے ایک کی روایت میں ہے کہ حضرت عمر رضی اللہ عنہ نے فرمایا: وادعی کی ماں اس کو گم پائے، اس نے کیسا مرد جنا ہے! [مصنف ابن ابي شيبه/كتاب السير/حدیث: 35408]

حضرت حسن رحمہ اللہ فرماتے ہیں کہ مقرف گھوڑے کے لیے ایک حصہ ہے (ایسا گھوڑا جو دو نسلی ہو) اور اس کے سوار کے لیے ایک حصہ ہے۔ [مصنف ابن ابي شيبه/كتاب السير/حدیث: 35409]

حضرت زیبر بن عدی سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35410]