حضرت سلیمان بن موسیٰ رحمہ اللہ سے مروی ہے کہ اگر کوئی شخص کئی گھوڑے لے کر دشمن کے علاقے میں داخل ہو تو اس کے ہر ہر گھوڑے کے لیے حصہ ہے۔ [مصنف ابن ابي شيبه/كتاب السير/حدیث: 35421]

حضرت عمیر رضی اللہ عنہ فرماتے ہیں کہ جب میں جنگ خیبر میں شریک ہوا تو میں غلام تھا، جب خیبر فتح ہوا تو آنحضرت صلی اللہ علیہ وسلم نے مجھے ایک تلوار عطا فرمائی اور فرمایا اس کو لٹکا لو، اور مجھے کچھ گھر کے لیے سامان مرحمت فرمایا اور میرے لئے غنیمت میں حصہ مقرر نہ فرمایا۔ [مصنف ابن ابي شيبه/كتاب السير/حدیث: 35422]

حضرت عمیر رضی اللہ عنہ فرماتے ہیں کہ میں اور میرے آقا جنگ خیبر میں شریک ہوئے اور میں غلام تھا، میرے لئے غنیمت میں حصہ مقرر نہ کیا گیا، اور گھر کے سامان سے ایک تلوار دی گئی، جب میں اس کو لٹکاتا تو اسے گھسیٹتا تھا۔ [مصنف ابن ابي شيبه/كتاب السير/حدیث: 35423]

حضرت عمر رضی اللہ عنہ فرماتے ہیں غلام کے لیے غنیمت میں حصہ نہیں ہے۔ [مصنف ابن ابي شيبه/كتاب السير/حدیث: 35424]

حضرت عمر رضی اللہ عنہ فرماتے ہیں کہ غلام کے لیے غنیمت میں کچھ نہیں ہے۔ [مصنف ابن ابي شيبه/كتاب السير/حدیث: 35425]

حضرت ابن عباس رضی اللہ عنہما فرماتے ہیں غنیمت میں غلام کیلئے حصہ نہیں ہے۔ [مصنف ابن ابي شيبه/كتاب السير/حدیث: 35426]

حضرت حکم، حضرت حسن رحمہ اللہ اور حضرت ابن سیرین فرماتے ہیں کہ جو بھی جہاد میں شریک ہو، آزاد، غلام یا مزدور میں سے اس کیلئے غنیمت میں سے حصہ ہے۔ [مصنف ابن ابي شيبه/كتاب السير/حدیث: 35427]

حضرت حسن اور حضرت ابن سیرین اور حضرت حکم فرماتے ہیں غلام اور مزدور اگر جہاد میں شریک ہوں تو ان کو غنیمت میں سے حصہ دیا جائے گا۔ [مصنف ابن ابي شيبه/كتاب السير/حدیث: 35428]

ابراہیم رحمہ اللہ فرماتے ہیں کہ اگر تاجر اور غلام جہاد میں شریک ہو تو ان کیلئے غنیمت میں حصہ نکالا جائے گا۔ [مصنف ابن ابي شيبه/كتاب السير/حدیث: 35429]

حضرت عمرو بن شعیب فرماتے ہیں کہ غلام کو حصہ دیا جائے گا۔ [مصنف ابن ابي شيبه/كتاب السير/حدیث: 35430]