حضرت ابو نضرہ فرماتے ہیں کہ حضرت عمر نے حضرت ہرم بن حیان کو ایک لشکر کی قیادت دے کر روانہ فرمایا۔ پھر ہرم ایک آدمی پر غضب ناک ہوئے اور حکم دیا تو اس کی گردن پر ضرب لگائی گئی۔ پھر وہ اپنے ساتھیوں کی طرف متوجہ ہوئے اور ان سے فرمایا کہ اللہ تمہیں خیر سے محروم رکھے، جب میں نے یہ بات کی تو تم نے مجھے نصیحت کیوں نہ کی، اور تم نے مجھے میرے غصے سے کیوں نہ روکا، خدا کی قسم میں تمہارے کسی معاملے کا قائد نہیں بنوں گا۔ پھر انہوں نے حضرت عمرکو خط لکھا کہ اے امیر المومنین! میں رعیت کے کسی کام کی طاقت نہیں رکھتا۔ آپ اس کام کے لئے کسی اور کو بھیج دیجئے۔ [مصنف ابن ابي شيبه/كتاب الزهد/حدیث: 38174]

حضرت ہرم بن حیان فرمایا کرتے تھے کہ میں جہنم کو ایسی چیز نہیں سمجھتا جس سے بھاگنے والے کو نیند آئے اور جنت کو ایسی چیز نہیں سمجھتاجس کو حاصل کرنے والا سو پائے۔ [مصنف ابن ابي شيبه/كتاب الزهد/حدیث: 38175]

حمید بن ہلال رحمہ اللہ فرماتے ہیں کہ ہرم بن حیان ”اہواز“ علاقے کے بعض دیہاتوں کے گورنر تھے۔ ان سے ان کے کسی ساتھی نے اپنے گھر جانے کی اجازت طلب کی تو انہوں نے اجازت دینے سے انکار کردیا۔ ”حمید بن ہلال“ کہتے ہیں کہ ہرم بن حیان جمعہ کے خطبہ دے رہے تھے کہ اچانک ایک آدمی نے ناک پر ہاتھ رکھ کر اجازت طلب کی تو ”ہرم“ نے اس کو ہاتھ کے اشارے سے کہا کہ چلا جا۔ وہ نکلا یہاں تک کہ اپنے گھر آیا اور اپنی ضرورت کو پورا کرنے کے بعد لوٹا۔ ”ہرم“ نے اس سے پوچھا کہ ”آپ کہاں تھے“ تو اس نے جواب دیا کہ کیا آپ نے دیکھا نہیں تھا کہ جب میں نے کھڑا ہو کر ناک کو روک رکھا تھا تو آپ نے کہا تھا کہ چلا جا تو ہرم نے فرمایا کہ ”برے لوگوں کو برے زمانہ کے لیے چھوڑ دو۔ [مصنف ابن ابي شيبه/كتاب الزهد/حدیث: 38176]

بکر فرماتے ہیں کہ بروز قیامت اللہ تعالیٰ مومن کی ہر حاجت کو پورا کرے گا۔ اور مومن اس سے صرف وہی مانگے گا جو اس کی رضا کے موافق ہو۔ [مصنف ابن ابي شيبه/كتاب الزهد/حدیث: 38177]

سعید جریری رحمہ اللہ فرماتے ہیں کہ مورق العجلی قبیلے کی مجلس سے گزرے تو ان کو سلام کیا۔ انہوں نے سلام کا جواب دیا اور ایک آدمی نے ان سے پوچھا کہ ”آپ کی حالت بالکل درست ہے؟“ تو انہوں نے جواب دیا کہ ”میں تو چاہتا ہوں کہ اس کا دسواں حصہ ہی ٹھیک ہوجائے۔ [مصنف ابن ابي شيبه/كتاب الزهد/حدیث: 38178]

بکر رحمہ اللہ فرماتے ہیں کہ آدمی پرہیزگار اس وقت تک نہیں ہوسکتا جب تک کہ غصہ اور لالچ سے نہ بچے۔ [مصنف ابن ابي شيبه/كتاب الزهد/حدیث: 38179]

مجاہد رحمہ اللہ سے آیت کریمہ { فَلأَنْفُسِہِمْ یَمْہَدُونَ } کی تفسیر میں مروی ہے کہ یہ قبر کے بارے میں ہے۔ [مصنف ابن ابي شيبه/كتاب الزهد/حدیث: 38180]

مجاہد سے آیت کریمہ { وَلِمَنْ خَافَ مَقَامَ رَبِّہِ جَنَّتَانِ } کے بارے میں مروی ہے کہ جو شخص دنیا میں گناہ پر اصرار کرنے سے اللہ سے ڈرے۔ [مصنف ابن ابي شيبه/كتاب الزهد/حدیث: 38181]

حضرت اعمش فرماتے ہیں کہ میں جب بھی مجاہد کو دیکھتا تو یہ سمجھتا کہ شاید یہ کوئی گدھے والا ہے جس کا گدھا گم ہوگیا ہے جس کی وجہ سے یہ پریشان ہے۔ [مصنف ابن ابي شيبه/كتاب الزهد/حدیث: 38182]

حضرت مجاہد کا ارشاد ہے کہ جب بھی دنیا سے کوئی دن گزر جاتا ہے تو وہ یہ کہتا ہے کہ ”تمام تعریفیں اللہ کے لیے ہیں کہ جس نے مجھے اس دنیا سے نکال دیا ہے اب میں کبھی اس کی طرف لوٹ کر نہیں آؤں گا۔ [مصنف ابن ابي شيبه/كتاب الزهد/حدیث: 38183]