حضرت عبداللہ بن حارث فرماتے ہیں کہ ”الزبانیہ“ سے مراد فرشتے ہیں کہ جن کے سر آسمان میں اور پاؤں زمین میں ہیں۔ [مصنف ابن ابي شيبه/كتاب الزهد/حدیث: 38214]

حضرت ابن عباس رضی اللہ عنہما سے اللہ تعالیٰ کے ارشاد { مَا یَلْفِظُ مِنْ قَوْلٍ } کی تفسیر منقول ہے کہ آدمی کی ہر اچھی اور بری بات لکھی جاتی ہے۔ [مصنف ابن ابي شيبه/كتاب الزهد/حدیث: 38215]

حضرت عکرمہ رحمہ اللہ سے مروی ہے کہ اس کے نفع اور نقصان کی ہر بات لکھی جاتی ہے۔ [مصنف ابن ابي شيبه/كتاب الزهد/حدیث: 38216]

حضرت سعید بن ابی الحسن سے اللہ تعالیٰ کے ارشاد { کَانُوا قَلِیلاً مِنَ اللَّیْلِ مَا یَہْجَعُونَ } کی تفسیر میں منقول ہے کہ بہت کم ہی کوئی ایسی رات آتی تھی کہ جس میں وہ سوتے ہوں۔ [مصنف ابن ابي شيبه/كتاب الزهد/حدیث: 38217]

حضرت حسان بن عطیہ فرماتے ہیں کہ ایک دفعہ ایک آدمی گدھے پر سوار تھا اچانک گدھے نے ٹھوکر کھائی تو اس نے کہا کہ تو ہلاک ہو۔ تو دائیں جانب کے فرشتے نے کہا کہ یہ کوئی نیکی تو نہیں ہے کہ جس کو میں لکھوں اور بائیں جانب کے فرشتے نے کہا کہ یہ کون سی برائی ہے کہ جس کو میں لکھوں تو بائیں جانب کے فرشتہ کو آواز دی گئی کہ جس قول کو دایاں چھوڑ دے اس کو لکھ لو۔ [مصنف ابن ابي شيبه/كتاب الزهد/حدیث: 38218]

حضرت حسان بن عطیہ کا ارشاد ہے کہ جو شخص اللہ کے دوستوں سے دشمنی کرتا ہے تو اللہ اس سے اعلانِ جنگ کرتا ہے اور جس شخص کی سفارش اللہ کے قانون وحدود میں آڑے بنتی ہے تو وہ شخص اللہ کے حکم میں رکاوٹ بن رہا ہے اور جو کوئی شخض کسی ایسے جھگڑے کی معاونت کرتا ہے جس کا اس کو علم ہی نہیں تو وہ اس جھگڑے سے نکلنے تک اللہ کے غصہ میں رہتا ہے اور جو شخص کسی مسلمان پر ایسی تہمت لگاتا ہے جس کا اس کو علم ہی نہیں تو اللہ اس کو ہلاکت کی دلدل میں پھنسا دیتا ہے حتی کہ وہ خود اس سے راستہ نکال لے۔ اور جو کوئی شخص کسی کمزور کے حق میں جھگڑا کرتا ہے تاکہ اس کو اس کا حق دلوا دے تو اللہ ایسے دن کہ جب قدم لڑ کھڑائیں گے اس کو ثابت قدم رکھتا ہے۔ اور اللہ تعالیٰ کا ارشاد ہے کہ میں جب کسی چیز کا ارادہ کرتا ہوں تو کوئی تردد نہیں کرتا۔ سوائے اپنے مومن بندے کی جان قبض کرنے کے وقت کیونکہ وہ موت کو ناپسند کرتا ہے اور میں اس کی تکلیف کو ناپسند کرتا ہوں جبکہ اس سے کوئی چارۂ کار نہیں۔ [مصنف ابن ابي شيبه/كتاب الزهد/حدیث: 38219]

حضرت ابن محیریز فرماتے ہیں کہ مسجد میں نمازی یا اللہ کے ذکر یا کسی اچھی چیز کی طلب یا عطا کے علاوہ تمام باتیں لغو ہیں۔ [مصنف ابن ابي شيبه/كتاب الزهد/حدیث: 38220]

حضرت ابن محیریز ایک مرتبہ ایک کپڑا فروش کے پاس گئے اور اس سے کچھ خریدا تو ایک آدمی نے کپڑے فروش سے کہا کہ یہ تو جانتا ہے یہ کون ہیں؟ تو یہ ابن محیریز ہیں تو وہ کپڑا فروش کھڑا ہوگیا۔ حضرت ابن محیریز نے فرمایا کہ ہم اپنے دراہم کے بدلہ میں خریدنے آئے ہیں اپنے دین کے بدلے خریدنے نہیں آئے۔ [مصنف ابن ابي شيبه/كتاب الزهد/حدیث: 38221]

حضرت موسیٰ بن عقبہ رحمہ اللہ فرماتے ہیں کہ ہم رملہ میں تھے کہ میں نے ابن محیریز رحمہ اللہ کو یہ کہتے ہوئے سنا کہ ”میں نے وہ لوگ بھی دیکھے ہیں جب کوئی مسلمان مرتا تو لوگ کہتے کہ تمام تعریفیں اس اللہ کے لیے ہیں جس نے فلاں شخص کو اسلام پر موت عطا کی۔ پھر یہ زمانہ ختم ہوگیا اور اب کوئی بھی اس طرح نہیں کہتا۔ [مصنف ابن ابي شيبه/كتاب الزهد/حدیث: 38222]

حضرت مجمع بن جاریہ رضی اللہ عنہ دعا کیا کرتے تھے کہ اے اللہ میں تجھ سے نرم وآسان موت کا سوال کرتا ہوں۔ [مصنف ابن ابي شيبه/كتاب الزهد/حدیث: 38223]