حضرت عمرو بن دینار رحمہ اللہ فرماتے ہیں کہ جابر بن زید درہم کے معاملے میں مسلمان تھے۔ [مصنف ابن ابي شيبه/كتاب الزهد/حدیث: 38404]

حضرت ابوعیاض رحمہ اللہ سے قرآن پاک کی آیت { وَنُقَلِّبُہُمْ ذَاتَ الْیَمِینِ وَذَاتَ الشِّمَالِ } کی تفسیر میں مروی ہے کہ سال میں دو مرتبہ بدلتے تھے۔ [مصنف ابن ابي شيبه/كتاب الزهد/حدیث: 38405]

حضرت اسماء بنت عمیس رضی اللہ عنہا فرماتی ہیں کہ میرے پاس جعفر رضی اللہ عنہ اس وقت آئے جب وہ حبشہ میں تھے اور وہ رو رہے تھے تو اسماء نے پوچھا کہ آپ کو کیا ہوا ہے؟ انہوں نے جواب دیا کہ میں نے ایک حبشی نوجوان کو دیکھا ہے ناز ونعم والا اور جسامت والا وہ ایک عورت کے پاس سے گزرا اور اس عورت کے پاس موجود آٹے کو اس نے گرا دیا۔ پھر اس آٹے کو ہوا اڑا کرلے گئی تو اس عورت نے کہا کہ میں تو تجھ کو اس دن کے سپرد کرتی ہوں کہ جس دن بادشاہ کرسی پر بیٹھے گا اور ظالم سے مظلوم کا حق دلوائے گا۔ [مصنف ابن ابي شيبه/كتاب الزهد/حدیث: 38406]

حضرت عبدالرحمن بن اسود رحمہ اللہ فرماتے ہیں کہ میں ریحان خوشبو سونگھتا ہوں تو جنت یاد آتی ہے۔ [مصنف ابن ابي شيبه/كتاب الزهد/حدیث: 38407]

حضرت مالک بن مغول رحمہ اللہ فرماتے ہیں کہ کسی آدمی نے شعبی سے کہا کہ اے عالم! ہمیں فتویٰ دیجیے۔ انہوں نے جواب دیا کہ عالم وہ ہے جو اللہ سے ڈرے۔ [مصنف ابن ابي شيبه/كتاب الزهد/حدیث: 38408]

حضرت عمرو بن قیس رحمہ اللہ کا ارشاد ہے کہ لوگ اس بات کو ناپسند سمجھتے تھے کہ کوئی آدمی اپنے بچہ کو کوئی چیز دے پھر وہ اس چیز کو لے کر باہر نکلے اور اس کو کوئی مسکین دیکھ لے اور اپنے گھر والوں کے پاس جا کر روئے یا کوئی یتیم دیکھ لے اور اپنے گھر والوں کے پاس جا کر روئے۔ [مصنف ابن ابي شيبه/كتاب الزهد/حدیث: 38409]

حضرت سفیان رحمہ اللہ سے مروی ہے کہ کوئی آدمی اس وقت تک فقیہ نہیں شمار کیا جاسکتا کہ جب تک وہ مصیبت کو نعمت اور کشادگی کو مصیبت نہ سمجھنے لگے۔ [مصنف ابن ابي شيبه/كتاب الزهد/حدیث: 38410]

حضرت سفیان رحمہ اللہ فرماتے ہیں کہ لوگوں کو یہ بات اچھی لگتی تھی کہ وہ اپنے نفسوں کو خوش کریں۔ [مصنف ابن ابي شيبه/كتاب الزهد/حدیث: 38411]

حضرت مالک بن دینار رحمہ اللہ فرماتے ہیں کہ جس دل میں کوئی غم نہ ہو وہ ویران گھر کی طرح ہے۔ [مصنف ابن ابي شيبه/كتاب الزهد/حدیث: 38412]

بدیل بن میسرہ عقیلی یا مطر الوراق رحمہ اللہ فرماتے ہیں کہ جس شخص نے رب کو پہچان لیا وہ اس سے محبت کرنے لگا اور جو شخص دنیا کو دل کی آنکھ سے دیکھ لیتا ہے وہ اس میں زہد اختیار کرلیتا ہے اور مومن جب تک بےکار کام میں نہ لگے غافل نہیں ہوتا۔ جب وہ سوچتا ہے تو غمگین ہوتا ہے۔ [مصنف ابن ابي شيبه/كتاب الزهد/حدیث: 38413]