حضرت حسان بن عطیہ رحمہ اللہ کا ارشاد ہے کہ مجھ کو یہ بات پہنچی ہے کہ اللہ تبارک وتعالیٰ قیامت کے دن فرمائیں گے کہ اے ابن آدم! جب سے ہم نے تم کو پیدا کیا ہے ہم تمہارے بارے میں خاموش رہے۔ پس آج تم خاموش رہو اور ہم تمہارے اعمال نامے کو سنائیں گے جو شخص اچھا اعمال نامہ دیکھے وہ اللہ کی تعریف کرے اور جو شخص برا اعمال نامہ دیکھے وہ صرف اپنے آپ کو ہی ملامت کرے۔ کیونکہ یہ تو تمہارے ہی اعمال نامے ہیں جو ہم تم کو واپس کررہے ہیں۔ [مصنف ابن ابي شيبه/كتاب الزهد/حدیث: 38384]

حضرت ضمرہ رحمہ اللہ فرماتے ہیں کہ ابوریحانہ رحمہ اللہ نے اپنی چوکی کے امیر سے گھر جانے کی اجازت مانگی۔ اس نے کہا کہ اے ابوریحانہ آپ کو کتنی مہلت چاہیے۔ انہوں نے جواب دیا کہ ایک رات۔ پھر جب آئے تو مسجد میں چلے گئے اور صبح تک نماز پڑھتے رہے۔ پھر اپنی سواری منگوائی اور اپنی چوکی کی طرف چل دئیے۔ لوگوں نے کہا کہ اے ابوریحانہ کیا آپ نے اپنے گھر جانے کی اجازت نہیں لی تھی؟ انہوں نے جواب دیا کہ مجھ کو میرے امیر نے صرف ایک رات کی اجازت دی تھی۔ پس نہ تو میں جھوٹ بولتا ہوں اور نہ ہی وعدہ خلافی کرتا ہوں۔ راوی فرماتے ہیں کہ وہ اپنی چوکی کی طرف چل نکلے اور اپنے گھر والوں کے پاس نہیں گئے اور ابوریحانہ کا گھر بیت المقدس میں تھا۔ [مصنف ابن ابي شيبه/كتاب الزهد/حدیث: 38385]

حضرت یحییٰ بن ابی کثیر فرماتے ہیں کہ عبداللہ بن سلام نے اپنے ایک غلام کو طمانچہ مارا۔ پس وہ رونے لگے اور کہنے لگے کہ مجھ سے بدلہ لے لے اور غلام کہنے لگا کہ اے سردار! میں آپ سے بدلہ نہیں لوں گا تو ابن سلام نے فرمایا کہ اللہ تعالیٰ ہر گناہ کو معاف کردے گا سوائے چہرے کے تھپڑ کے۔ [مصنف ابن ابي شيبه/كتاب الزهد/حدیث: 38386]

حضرت کعب رحمہ اللہ فرماتے ہیں کہ ہر بندے کے سر میں ایک لگام ہوتی ہے۔ پھر اگر وہ تواضع کرے تو اللہ اس کو بلند کردیتے ہیں اور اگر تکبر کرے تو اللہ اس کو گرا دیتے ہیں۔ [مصنف ابن ابي شيبه/كتاب الزهد/حدیث: 38387]

حضرت حسن رحمہ اللہ سے اللہ تعالیٰ کے ارشاد { مَنْ یَعْمَلْ سُوئًا یُجْزَ بِہِ } کی تفسیر میں منقول ہے کہ جس کو اللہ کے ذلیل کرنے کا ارادہ کرلیا ہو۔ لیکن جس شخص کو عزت دینے کا ارادہ ہو تو اللہ تعالیٰ اس کی غلطیوں سے درگزر کردیتے ہیں اور جنت میں ٹھکانہ دیتے ہیں جیسا کہ اللہ کا ارشاد ہے: { وَعْدَ الصِّدْقِ الَّذِی کَانُوا یُوعَدُونَ }۔ [مصنف ابن ابي شيبه/كتاب الزهد/حدیث: 38388]

حضرت ابوصالح فرماتے ہیں کہ ابوعلاء یزید بن عبداللہ بن الشخیر قرآن پڑھتے ہوئے بےہوش ہوجایا کرتے تھے۔ [مصنف ابن ابي شيبه/كتاب الزهد/حدیث: 38389]

حضرت سعید جریری رحمہ اللہ فرماتے ہیں کہ ابوالعلاء قرآن پڑھتے تو مطرف ان سے بعض اوقات کہا کرتے تھے کہ باقی دن اپنے مصحف سے ہمیں معاف رکھو۔ [مصنف ابن ابي شيبه/كتاب الزهد/حدیث: 38390]

حضرت ہارون بن عنترہ اپنے والد سے نقل کرتے ہیں کہ میں نے ابن عباس رضی اللہ عنہما سے پوچھا کہ کون سا عمل سب سے بہتر ہے۔ انہوں نے جواب دیا کہ اللہ کا ذکر کرنا فرمایا کہ جس شخص کو اس کا عمل پیچھے ڈال دے اس کو اس کا حسب ونسب آگے نہیں بڑھا سکتا۔ [مصنف ابن ابي شيبه/كتاب الزهد/حدیث: 38391]

حضرت عبداللہ بن ابی الحسین رحمہ اللہ فرماتے ہیں کہ رسول اللہ صلی اللہ علیہ وسلم نے فرمایا کہ میں تم کو دنیا اور آخرت میں سب سے اچھے اخلاق والا نہ بتاؤں؟ یہ وہ شخص ہے جو اس کو معاف کردے جس نے اس پر ظلم کیا ہو اور اس شخص کو عطا کرے جس نے اس کو محروم رکھا ہو اور اس سے رشتہ جوڑے جس نے قطع رحمی کی ہو اور جس شخص کو یہ اچھی بات اچھی لگتی ہے کہ اس کی عمر دراز اور مال زیادہ ہو تو وہ اپنے اللہ سے ڈرے اور صلہ رحمی اختیار کرے۔ [مصنف ابن ابي شيبه/كتاب الزهد/حدیث: 38392]

حضرت ابوجوزا رحمہ اللہ قرآنِ پاک کی آیت { یَوْمَ ہُمْ عَلَی النَّارِ یُفْتَنُونَ } کی تفسیر میں فرماتے ہیں کہ یُعَذَّبُونَ یعنی ان کو عذاب دیا جائے گا۔ [مصنف ابن ابي شيبه/كتاب الزهد/حدیث: 38393]