حضرت طلحہ بن یحییٰ سے روایت ہے کہ حضرت عمر بن عبدالعزیز قاصد روانہ کیا کرتے تھے۔ راوی کہتے ہیں: حضرت عمر کے ایک آزاد کردہ غلام نے آپ کی اجازت کے بغیر ایک آدمی کو ڈاک کے گھوڑے پر سوار کردیا۔ راوی کہتے ہیں۔ چناچہ آپ رحمہ اللہ نے اس کو بلایا اور فرمایا: تم اسی طرح رہو یہاں تک کہ تم اس کی قیمت لگاؤ اور پھر اس کو بیت المال میں جمع کرو۔ [مصنف ابن ابي شيبه/كتاب الزهد/حدیث: 37834]

حضرت جمیع بن عبداللہ سے روایت ہے کہ حضرت عمر بن عبدالعزیز نے قاصد کو اس بات سے منع فرمایا کہ چابک کے ایک جانب لوہا لگایا جائے جس کے ذریعہ جانور کو کچوکا دیا جائے۔ راوی کہتے ہیں۔ آپ نے بھاری لگاموں سے بھی منع کیا۔ [مصنف ابن ابي شيبه/كتاب الزهد/حدیث: 37835]

حضرت عامر بن عبد قیس سے روایت ہے وہ کہتے ہیں عیش چار چیزوں میں ہے: عورتیں، لباس، کھانا، نیند۔ پس عورتیں تو خدا کی قسم میرے لیے کسی عورت اور کسی بکری کو دیکھنا برابر ہے اور لباس تو خدا کی قسم! مجھے اپنی ستر چھپانے کو جو کپڑا ملا ہے تو مجھے کسی اور کپڑے کی پروا نہیں ہے۔ اور کھانا اور نیند تو تحقیق یہ دونوں مجھ پر غالب ہیں۔ بخدا! میں اپنی پوری کوشش سے ان دونوں کو نقصان پہنچاؤں گا۔ [مصنف ابن ابي شيبه/كتاب الزهد/حدیث: 37836]

حسن کہتے ہیں: بخدا! انہوں نے دونوں کو نقصان دیا۔ [مصنف ابن ابي شيبه/كتاب الزهد/حدیث: 37837]

حسن سے روایت ہے وہ کہتے ہیں کہ حضرت عامر کے پاس گھر میں جایا گیا تو ان کے پاس صرف ایک گھڑا تھا جس میں ان کے وضو اور پینے کا پانی تھا اور ایک ٹوکرا تھا جس میں ان کا کھانا تھا۔ [مصنف ابن ابي شيبه/كتاب الزهد/حدیث: 37838]

حسن سے روایت ہے وہ کہتے ہیں کہ حضرت عامر بن عبد قیس کے جسم کا جو حصہ زمین کو لگتا تھا وہ اونٹ کے گھٹنوں کے گٹوں کی طرح (سخت) تھا۔ [مصنف ابن ابي شيبه/كتاب الزهد/حدیث: 37839]

حضرت سہم بن شقیق سے روایت ہے وہ کہتے ہیں کہ میں حضرت عامر بن عبد قیس کے پاس حاضر ہوا اور میں ان کے دروازے پر بیٹھ گیا۔ پس وہ غسل کرکے باہر آئے تو میں نے کہا: میرے خیال میں آپ کو غسل پسند ہے۔ انہوں نے فرمایا: میں کبھی کبھی غسل کرتا ہوں۔ پھر پوچھا: تمہاری کیا ضرورت ہے؟ میں نے کہا: حدیث کی محبت (مجھے یہاں لائی ہے)۔ آپ نے فرمایا: تمہارا میرے بارے میں یہ خیال ہے کہ مجھے حدیث سے محبت ہے؟“ [مصنف ابن ابي شيبه/كتاب الزهد/حدیث: 37840]

حضرت محمد بن سیرین سے روایت ہے وہ کہتے ہیں کہ حضرت عامر بن عبداللہ سے کہا گیا۔ آپ نے شادی کیوں نہیں کی؟ انہوں نے فرمایا: مجھے (اس کی) طلب نہیں ہے اور نہ ہی میرے پاس مال ہے۔ چناچہ میں کسی مسلمان عورت کو دھوکہ نہیں دے سکتا۔ [مصنف ابن ابي شيبه/كتاب الزهد/حدیث: 37841]

حضرت ثابت سے روایت ہے وہ کہتے ہیں کہ حضرت عامر بن عبد قیس نے اپنے دو چچا زاد بھائیوں سے کہا: تم اپنا معاملہ اللہ کے سپرد کردو۔ [مصنف ابن ابي شيبه/كتاب الزهد/حدیث: 37842]

حضرت عامر بن عبداللہ فرماتے ہیں کہ میں اپنے آپ کو بصرہ کی چار باتوں کی وجہ سے غمگین پاتا ہوں۔ اس کے موذنوں کا ایک دوسرے کو جواب دینا۔ اور سخت گرمیوں کی دوپہر کی پیاس، اور یہ کہ وہاں میرے دوست ہیں اور یہ کہ وہ میرا وطن ہے۔ [مصنف ابن ابي شيبه/كتاب الزهد/حدیث: 37843]