حضرت ابن ابی ملیکہ سے روایت ہے کہ حضرت عمر نے اہل شوریٰ میں سے کسی کو خاص نہیں کیا لیکن آپ نے حضرت علی رضی اللہ عنہ اور حضرت عثمان سے علیحدگی (میں کوئی بات) کی۔ اور ان میں سے بھی ہر ایک کو دوسرے سے علیحدہ کیا۔ آپ نے فرمایا۔ اے فلاں! اللہ سے ڈر اور اگر تجھے اس معاملہ کے ذریعہ خدا تعالیٰ آزمائے تو تُو بنی فلاں کو دیگر لوگوں کی گردنوں پر بلند نہ کرنا۔ اور (اسی طرح) آپ دوسرے (علی رضی اللہ عنہ و عثمان میں) سے بھی ایسا کہا۔ [مصنف ابن ابي شيبه/كتاب المغازي/حدیث: 39853]

حضرت حسن بن محمد سے روایت ہے کہ حضرت عمر نے حضرت عثمان سے کہا۔ اللہ سے ڈر اور اگر تجھے لوگوں کے معاملا ت میں سے کسی کی ولایت مل جائے تو تُو بنو ابی معیط کے لوگوں کو دیگر لوگوں کی گردنوں پر بلند نہ کرنا۔ اور حضرت عمر نے حضرت علی رضی اللہ عنہ سے کہا۔ اللہ سے ڈر۔ اور اگر تجھے لوگوں کے معاملات میں سے کسی کا اختیار مل جائے تو تُو بنو ہاشم کو دیگر لوگوں کی گردن پر بلند نہ کرنا۔ [مصنف ابن ابي شيبه/كتاب المغازي/حدیث: 39854]

اہل شام کے علماء میں سے ایک عالم حضرت ابراہیم بن زرعہ سے عبد العزیز بن عمر نقل کرتے ہیں کہ میں نے ابن زرعہ سے پوچھا۔ حضرت عمر کا جنازہ کس نے پڑھا یا تھا؟ انہوں نے جواب دیا۔ صہیب نے۔ [مصنف ابن ابي شيبه/كتاب المغازي/حدیث: 39855]

حضرت قاسم سے روایت ہے۔ کہ جب حضرت عمر کو نیزہ لگا تو لوگ (آپ کے پاس) آ کر آپ کی تعریف کرنے لگے اور آپ کے لئے دعا کرنے لگے تو حضرت عمر نے ان سے کہا۔ کیا تم لوگ خلافت کی بنیاد پر مجھے پاکیزہ سمجھ رہے ہو؟ تحقیق میں نے رسول اللہ صلی اللہ علیہ وآلہ وسلم کی صحبت اختاکر کی پھر آپ صلی اللہ علیہ وآلہ وسلم اس حالت میں دنیا سے تشریف لے گئے کہ آپ صلی اللہ علیہ وآلہ وسلم مجھ سے خوش تھے پھر میں نے حضرت ابوبکر کی صحبت اختیار کی اور میں نے آپ کا حکم سُنا اور مانا پھر آپ کی وفات بھی اس حالت میں ہوئی کہ میں آپ کی بات سننے اور ماننے والا تھا۔ اور مجھے تو اپنے آپ پر صرف تمہاری امارت ہی کا خوف ہے۔ [مصنف ابن ابي شيبه/كتاب المغازي/حدیث: 39856]

حضرت ابو سلمہ، حضرت یحییٰ بن عبدالرحمن بن حاطب اور دوسرے بزرگ فرماتے ہیں کہ حضرت عمر نے خواب دیکھا تو فرمایا: میں نے دیکھا کہ ایک سرخ مرغے نے میری ناف اور زیر ناف کے درمیان تین مرتبہ چونچ ماری ہے۔ عبد اللہ بن جعفر کی والدہ حضرت اسماء بنت عمیس رضی اللہ عنہا تعبیر کی ماہر تھیں، انہوں نے فرمایا کہ ان سے کہو کہ وصیت کردیں۔ میں نہیں جانتا کہ یہ تعبیر ان تک پہنچی یا نہیں۔ پھر مغیرہ بن شعبہ کا غلام ابو لؤلؤ کافر مجوسی، حضرت عمر کے پاس آیا اور کہا کہ مغیرہ نے مجھ پر کچھ مال خراج مقرر کیا ہے۔ حضرت عمر نے پوچھا: تم پر کتنا مقرر کیا ہے؟ اس نے کہا: اتنا اتنا۔ حضرت عمر نے پوچھا کہ تم کیا کرتے ہو؟ اس نے کہا میں چکیاں بناتا ہوں۔ حضرت عمر نے کہا کہ پھر تو بہت زیادہ نہیں کیونکہ یہاں تمہارے علاوہ کوئی یہ کام نہیں کرتا، کیا تم مجھے ایک چکی بنا کردو گے؟ اس نے کہا کیوں نہیں، خدا کی قسم! میں آپ کو ایسی چکی بنا کر دوں گا کہ اس کی شہرت سارے عالم میں ہوگی۔ 2۔ پھر حضرت عمر حج کے لئے چل پڑے پس جب آپ واپس لوٹے تو آپ وادی محصب میں لیٹ گئے اور اپنی چادر کو اپنے سر کے نیچے رکھ لیا۔ آپ نے چاند کی طرف دیکھا تو آپ کو اس کی خوبصورتی اور برابری بہت پیاری لگی اس پر آپ نے فرمایا۔ یہ ابتداء میں کمزور ساظاہر ہوتا ہے پھر اللہ تعالیٰ اس میں اضافہ کرتے رہتے ہیں اور اس کو بڑھاتے رہتے ہیں یہاں تک کہ یہ برابر ہوجاتا ہے۔ اور پھر یہ کمال حسن تک پہنچ جاتا ہے۔ پھر یہ کم ہونا شروع ہوتا ہے یہاں تک دوبارہ ویسا ہی (پہلے جیسا) ہوجاتا ہے۔ ساری مخلوق کی حالت ایسی ہی ہے۔ پھر آپ نے اپنے ہاتھ اٹھائے اور عرض کیا۔ اے اللہ! میری رعایا بہت زیادہ ہوگئی ہے۔ اور بہت پھیل گئی ہے پس تو مجھے اپنی طرف واپس بلا لے عاجز اور ضائع کیے بغیر۔ 3۔ پھر حضرت عمر مدینہ واپس آئے تو ان کے سامنے ذکر کیا گیا کہ مسلمانوں کی ایک عورت مقام بیداء میں مرگئی تھی، وہ زمین پر پڑی ہوئی تھی اور لوگ اس کے پاس سے گزرتے جا رہے تھے۔ کسی نے بھی اس کو کفن نہ دیا اور نہ ہی اس کو دفنایا یہاں تک کہ حضرت کلیب بن بکیر لیثی اس عورت کے پاس سے گزرے تو وہ اس کے پاس ٹھہرے رہے یہاں تک کہ انہوں نے اس کو کفنایا اور دفنایا۔ یہ بات حضرت عمر کے سامنے ذکر کی گئی تو آپ نے پوچھا۔ مسلمانوں میں سے کون لوگ اس کے پا س سے گزرے تھے؟ لوگوں نے جواب دیا۔ اس کے پاس سے گزرنے والے لوگوں میں حضرت عبد اللہ بن عمر رضی اللہ عنہما بھی تھے۔ چناچہ آپ نے ابن عمر رضی اللہ عنہما کو بلایا اور فرمایا۔ تو ہلاک ہوجائے۔ تو ایک مسلمان عورت پر سے جو راستہ میں زمین پر گری پڑی تھی گزرا اور تو نے اس کو کفنایا، دفنایا کیوں نہیں؟ انہوں نے جواب دیا۔ خدا کی قسم! مجھے تو اس کا پتہ ہی نہیں چلا اور نہ ہی مجھ سے کسی نے اس کے بارے میں ذکر کیا۔ حضرت عمر نے فرمایا۔ مجھے ڈر ہے کہ کہیں تو خیر سے خالی نہ ہو۔ پھر حضرت عمر نے پوچھا۔ اس عورت کو کس نے کفنایا اور دفنایا؟ لوگوں نے جواب دیا کہ کلیب بن بکیر لیثی نے۔ آپ نے فرمایا: خدا کی قسم! کلیب اس بات کا حق دار ہے کہ اس کو خیر پہنچے۔ 4۔ پھر حضرت عمر لوگوں کو اپنے درے سے صبح کی نماز کے لئے بیدار کرنے کے لئے نکلے تھے کہ آپ کو ابو لؤلؤ کافر ملا اور اس نے آپ کی ناف اور زیر ناف کے درمیان تین وار کئے۔ اور حضرت کلیب بن بکیر کو مارا اور ان کا کام تمام کردیا۔ لوگوں نے آوازیں بلند کیں تو ایک آدمی نے اس پر بڑی چادر پھینک دی پھر اس کو اپنی طرف دبوچ لیا۔ اور حضرت عمر کو اٹھا کر گھر لے جایا گیا۔ اور حضرت عبد الرحمان بن عوف نے لوگوں کو نماز پڑھائی۔ اور حضرت عمر سے کہا گیا۔ نماز! تو آپ نے اس حالت میں نماز پڑھی کہ آپ کے زخموں سے خون بہہ رہا تھا۔ اور آپ نے ارشاد فرمایا۔ جس آدمی کی نماز نہیں، اس کا اسلام میں کوئی حصہ نہیں۔ پس آپ نے اس حالت میں نماز ادا فرمائی کہ آپ کا خون ٹپک رہا تھا۔ پھر لوگ حضرت عمر کی خدمت میں حاضر ہوئے اور کہنے لگے۔ اے امیر المؤمنین! آپ کو کوئی خطرہ نہیں ہے۔ اور یقینا ہمیں امید ہے کہ اللہ تعالیٰ آپ کی عمر دراز کرے گا اور آپ کو مزید ایک وقت تک یا ایک خیر (کے کام) تک مہلت دے گا۔ 5۔ پھر حضرت عمر کی خدمت میں حضرت ابن عباس رضی اللہ عنہما حاضر ہوئے، حضرت عمر کو ابن عباس رضی اللہ عنہما سے محبت تھی، حضرت عمر نے فرمایا۔ تم دیکھو کہ مجھے قتل کرنے والا کون ہے؟ چناچہ ابن عباس رضی اللہ عنہما باہر چلے گئے پھر واپس آئے تو فرمایا۔ اے امیر المؤمنین! آپ کو خوشخبری ہو کہ آپ کا قاتل حضرت مغیرہ بن شعبہ کا غلام ابو لؤلؤ مجوسی ہے۔ اس پر حضرت عمر نے اللہ اکبر کہا۔ یہاں تک (بلند آواز میں کہا کہ) آپ کی آواز دروازے سے باہر نکل گئی پھر حضرت عمر نے فرمایا۔ تمام تعریفیں اس خدا کے لئے ہیں جس نے قاتل کو مسلمان آدمی نہیں بنایا کہ بروز قیامت وہ میرے ساتھ کسی ایسے سجدہ کی وجہ سے مخاصمت کرتا جو اس سے صرف خدا کے لئے کیا ہوتا۔ پھر حضرت عمر لوگوں کی طرف متوجہ ہوئے اور فرمایا۔ کیا یہ کام تم میں سے کسی جماعت کے مشورے سے ہوا ہے؟ لوگوں نے کہا۔ اللہ کی پناہ! خدا کی قسم! ہم تو اس بات کو پسند کرتے ہیں کہ ہم آپ پر اپنے آباء کو فداء کردیں اور آپ کی عمر میں اپنی عمروں سے اضافہ کردیں۔ آپ کو کوئی خطرہ نہیں ہے۔ حضرت عمر نے فرمایا۔ اے یرفأ! تجھ پر افسوس، مجھے پلاؤ۔ چناچہ وہ ایک پیالہ لائے جس میں میٹھا نبیذ تھا، آپ نے اسے پی لیا اور اپنی چادر اپنے پیٹ سے چپکا لی۔ راوی کہتے ہیں: جب مشروب آپ کے پیٹ میں پہنچا تو زخموں سے باہر نکل آیا۔ لوگوں نے کہا۔ الحمد للہ! یہ خون ہے جو آپ کے پیٹ میں جما ہوا تھا، اللہ نے اسے آپ کے پیٹ سے نکال دیا۔ آپ نے فرمایا۔ اے یرفأ! تجھ پر افسوس، مجھے دودھ پلاؤ۔ چناچہ وہ دودھ لائے، آپ نے اسے پیا، پس جب وہ آپ کے پیٹ میں پہنچا تو زخموں سے باہر نکل آیا۔ جب لوگوں نے یہ دیکھا تو جان گئے کہ آپ کا آخری وقت ہے۔ انہوں نے کہا۔ اللہ آپ کو جزائے خیر دے، آپ ہمارے درمیان کتاب اللہ پر عمل کرتے تھے اور اپنے دونوں ساتھیوں کی سنت کی پیروی کرتے تھے، اس سے ہٹ کر کسی اور طرف نہیں جاتے تھے۔ اللہ آپ کو بہترین جزا دے۔ آپ نے فرمایا۔ کیا تم امارت کی وجہ سے مجھ پر رشک کرتے ہو؟ خدا کی قسم! میری تو یہ خواہش ہے کہ میں اس سے برابر برابر چھوٹ جاؤں، نہ میرے خلاف کچھ ہو اور نہ میرے حق میں۔ اٹھو اور اپنے معاملہ میں مشورہ کرو۔ اپنے میں سے ایک آدمی کو اپنا امیر بنا لو، پھر جو اس کی مخالفت کرے اس کا سر مار دو۔ راوی کہتے ہیں: لوگ اٹھ کھڑے ہوئے اور حضرت عبد اللہ بن عمر رضی اللہ عنہما نے آپ کو اپنے سینے سے سہارا دیا ہوا تھا۔ حضرت عبد اللہ نے کہا۔ کیا تم امیر مقرر کر رہے ہو جبکہ امیر المؤمنین زندہ ہیں؟ حضرت عمر نے فرمایا۔ نہیں، صہیب تین دن نماز پڑھائیں، اور طلحہ کا انتظار کرو، اور اپنے معاملہ میں مشورہ کرو، پھر اپنے میں سے ایک آدمی کو اپنا امیر بنا لو، پھر اگر کوئی تمہاری مخالفت کرے تو اس کا سر مار دو۔ پھر آپ نے فرمایا۔ حضرت عائشہ رضی اللہ عنہا کے پاس جاؤ، انہیں میری طرف سے سلام کہو اور کہو کہ عمر کہتے ہیں: اگر یہ ممکن ہو اور آپ کو اس سے نقصان اور تنگی نہ ہو تو میں چاہتا ہوں کہ اپنے دونوں ساتھیوں کے ساتھ دفن کیا جاؤں۔ اور اگر آپ کو اس سے نقصان اور تنگی ہو تو میری جان کی قسم! اس بقیع میں رسول اللہ صلی اللہ علیہ وآلہ وسلم کے ایسے صحابہ اور امہات المؤمنین دفن ہیں جو عمر سے بہتر ہیں۔ قاصد ان کے پاس آیا تو انہوں نے فرمایا۔ اس سے مجھے نہ نقصان ہے اور نہ تنگی۔ آپ نے فرمایا۔ پھر مجھے ان دونوں کے ساتھ دفن کرنا۔ حضرت عبد اللہ بن عمر رضی اللہ عنہما فرماتے ہیں: پھر موت آپ پر طاری ہونے لگی اور میں نے آپ کو اپنے سینے سے تھاما ہوا تھا۔ آپ نے فرمایا۔ تجھ پر افسوس، میرا سر زمین پر رکھ دے۔ پھر آپ پر غشی طاری ہوگئی تو مجھے اس سے رنج ہوا۔ پھر آپ کو افاقہ ہوا تو فرمایا۔ تجھ پر افسوس، میرا سر زمین پر رکھ دے۔ چناچہ میں نے آپ کا سر زمین پر رکھ دیا، آپ نے اسے مٹی میں ملا لیا اور فرمایا۔ عمر کے لئے ہلاکت ہے اور اس کی ماں کے لئے ہلاکت ہے اگر اللہ نے اس کی مغفرت نہ فرمائی۔ محمد بن عمرو کہتے ہیں: اہل شوریٰ یہ تھے: علی، عثمان، طلحہ، زبیر، سعد اور عبد الرحمان بن عوف۔ [مصنف ابن ابي شيبه/كتاب المغازي/حدیث: 39857]

حضرت حارثہ بن مضرب سے روایت ہے کہ میں نے حضرت عمر کے عہد امارت میں حج کیا تھا تو لوگوں کو اس بات میں شک نہیں تھا کہ حضرت عمر کے بعد خلافت حضرت عثمان کے پاس ہوگی۔ (یعنی یقین تھا)۔ [مصنف ابن ابي شيبه/كتاب المغازي/حدیث: 39858]

حضرت عبد اللہ بن سنان سے روایت ہے کہ جب حضرت عثمان کو خلیفہ مقرر کیا گیا تو عبد اللہ نے کہا۔ مَا أَلَوْنَا عَنْ أَعْلَانَا ذَا فُوْقٍ (یعنی ہم نے اپنے میں سے بلند ترین، سالم سوفار والے تیر جیسے بہترین شخص کے انتخاب میں کوئی کوتاہی نہیں کی)۔ [مصنف ابن ابي شيبه/كتاب المغازي/حدیث: 39859]

حضرت حکیم بن جابر سے روایت ہے کہ جب حضرت عثمان کی بیعت کی گئی تو ابن مسعود نے کہا۔ مَا أَلَوْنَا عَنْ أَعْلَانَا ذَا فُوْقٍ (یعنی ہم نے اپنے میں سے بلند ترین، سالم سوفار والے تیر جیسے بہترین شخص کے انتخاب میں کوئی کوتاہی نہیں کی)۔ [مصنف ابن ابي شيبه/كتاب المغازي/حدیث: 39860]

حضرت مرہ بہزی سے روایت ہے کہ ہم ایک دن مدینہ کے راستوں میں سے ایک راستہ پر نبی کریم صلی اللہ علیہ وآلہ وسلم کے ہمراہ تھے کہ آپ صلی اللہ علیہ وآلہ وسلم نے فرمایا۔ ”تم اس فتنہ میں کیا کرو گے جو زمین کے اطراف میں یوں پھیل جائے گا جیسے گائے کے سینگ ہوتے ہیں۔“ صحابہ نے پوچھا۔ اے اللہ کے نبی صلی اللہ علیہ وآلہ وسلم! پھر ہم کیا کریں۔ آپ صلی اللہ علیہ وآلہ وسلم نے فرمایا: ”تم اس کو اور اس کے ساتھیوں کو لازم پکڑنا۔“ راوی کہتے ہیں: پس میں (یہ سن کر) اس آدمی پر جلدی سے لپٹا اور میں نے عرض کیا۔ اے اللہ کے نبی صلی اللہ علیہ وآلہ وسلم! یہ آدمی؟ آپ صلی اللہ علیہ وآلہ وسلم نے فرمایا: ”یہی“ اور یہ شخص حضرت عثمان تھے۔ [مصنف ابن ابي شيبه/كتاب المغازي/حدیث: 39861]

حسن سے روایت ہے کہ مجھے وثَّاب نے بیان کیا۔ اور یہ وثاب ان لوگوں میں سے تھے جنہیں امیر المؤمنین حضرت عمر کی آزادی نصیب ہوئی اور بعد میں یہ حضرت عثمان کے سامنے (خدمت میں) رہتے تھے۔ راوی کہتے ہیں۔ میں نے اس کے حلق میں نیزے کے دو نشانات دیکھے جو داغ کے دو نشانوں کی طرح تھے۔ حضرت عثمان کے گھر میں محاصر ہ کے دن یہ نیزے انہیں مارے گئے تھے۔ یہ بیان کرتے ہیں کہ مجھے امیر المؤمنین حضرت عثمان نے بھیجا اور فرمایا: اشتر کو میرے پاس لاؤ۔ ابن عون کہتے ہیں: میرا گمان یہ ہے کہ انہوں نے یہ بھی کہا تھا۔ کہ میں نے امیر المؤمنین کے لئے تکیہ رکھا۔ پس حضرت عثمان نے فرمایا۔ اے اشتر! (باغی) لوگ مجھ سے کیا چاہتے ہیں؟ اشتر نے کہا۔ تین باتیں ہیں جن میں سے کسی ایک کا کرنا ضروری ہے۔ وہ لوگ آپ کو اس بات کا اختیار دیتے ہیں کہ یا تو آپ ان کی حکمرانی ان کے حوالہ کردیں اور یہ کہہ دیں کہ یہ تمہاری حکمرانی ہے تم جس کو چاہو یہ حکمرانی سونپ دو۔ اور یا یہ ہے کہ آپ اپنے سے بدلہ لینے کا موقع دیں۔ پس اگر آپ ان دونوں باتوں سے انکار کرتے ہیں تو پھر لوگ آپ کو قتل کردیں گے۔ حضرت عثمان نے پوچھا۔ کیا ان میں سے کسی ایک کو اختیار کرنا ضروری ہے؟ اشتر نے کہا (جی) ان میں سے کسی ایک کو اختیار کرنا ضروری ہے۔ 2۔ حضرت عثمان نے فرمایا۔ جہاں تک یہ بات ہے کہ میں ان کی حکمرانی کی ذمہ داری چھوڑ دوں۔ تو (سنو) میں وہ کبھی کرتا نہیں اتاروں گا جو اللہ تعالیٰ نے مجھے پہنایا ہے۔ ابن عون کہتے ہیں۔ حسن کے علاوہ دوسرا راوی بیان کرتا ہے کہ: اگر مجھے یوں پیش کیا جائے کہ میری گردن اڑا دی جائے تو بھی مجھے یہ بات اس سے زیادہ محبوب ہے کہ میں امت محمد (صلی اللہ علیہ وآلہ وسلم) کا معاملہ لوگوں کے درمیان چھوڑ دوں۔ ابن عون کہتے ہیں: یہ بات آپ کے کلام سے ملتی جلتی ہے۔ اور رہی یہ بات کہ میں لوگوں کو خود سے بدلہ لینے کا موقع دوں تو خدا کی قسم! میں جانتا ہوں کہ مجھ سے پہلے میرے دو ساتھی (لوگوں کو) اپنے آپ سے بدلہ لینے کا موقع دیتے تھے۔ لیکن میرا جسم قصاص کے لئے کھڑا نہیں ہوگا۔ اور یہ بات کہ لوگ مجھے قتل کریں گے تو خدا کی قسم (یاد رکھو) اگر وہ لوگ مجھے قتل کردیں تو پھر میرے بعد کبھی آپس میں محبت نہیں کرسکیں گے۔ اور نہ ہی میرے بعد دشمن کے خلاف کبھی سارے اکٹھے ہو کر جہاد کرسکیں گے۔ 3۔ راوی کہتے ہیں۔ پھر اشتر اٹھ کر چل پڑا۔ ہم وہیں ٹھہرے اور ہم کہنے لگے۔ ہوسکتا ہے کہ لوگ واپس پیچھے چلے جائیں۔ پھر ایک پست قامت آدمی آیا۔ یوں لگتا تھا کہ وہ بھیڑیا ہے۔ اور اس نے دروازے سے جھانکا اور واپس ہوگیا۔ پھر محمد بن ابی بکر تیرہ افراد کے ہمراہ کھڑا ہوا اور حضرت عثمان کے پاس پہنچا اور آپ کی داڑھی کو پکڑ کر ہلایا یہاں تک کہ میں نے آپ کی داڑھوں کے ٹکرانے کی آواز سنی اور وہ کہہ رہا تھا۔ تمہیں معاویہ نے کوئی فائدہ نہیں دیا! تمہیں ابن عامر نے کوئی فائدہ نہیں دیا! تمہیں تمہارے خطوط نے کوئی فائدہ نہیں دیا۔ حضرت عثمان نے کہا۔ اے بھتیجے! میری داڑھی تو چھوڑ دے۔ اے بھتیجے! میری داڑھی تو چھوڑ دے۔ 4۔ راوی کہتے ہیں: میں نے اس کو دیکھا کہ اس نے (اپنی) قوم میں سے ایک آدمی سے مدد مانگی تو اس کے پاس ایک آدمی چوڑے پھل والا نیزہ لے کر آیا اور اس کے ذریعہ سے حضرت عثمان کے سر پر زور لگا کر اس کو آپ کے سر میں اتار دیا۔ راوی (سے) پوچھا۔ پھر کیا ہوا؟ راوی نے جواب دیا۔ پھر یہ باغی حضر ت عثمان پر داخل ہوئے اورا نہیں قتل کردیا۔ [مصنف ابن ابي شيبه/كتاب المغازي/حدیث: 39862]