سیدنا ابومحذورہ رضی اللہ عنہ بیان کرتے ہیں: نبی کریم صلی اللہ علیہ وسلم حنین تشریف لے گئے۔ میں مکہ کے دس آدمیوں کے ساتھ پیچھے گیا۔ ہم نے ان لوگوں کو نماز کے لیے اذان دیتے سنا تو ہم بھی اٹھ کر اذان دینے لگے، ہم ان کا مذاق اڑا رہے تھے۔ نبی کریم صلی اللہ علیہ وسلم نے فرمایا: ”میں نے ان لوگوں میں ایک شخص کی اذان سنی ہے جس کی آواز بہت اچھی ہے۔“ پھر آپ نے ہمیں بلوایا۔ ہم میں سے ہر ایک نے الگ الگ اذان دی۔ میں نے سب سے آخر میں اذان دی۔ آپ نے فرمایا: ”آگے آؤ!“ پھر آپ نے مجھے اپنے سامنے بٹھایا، میری پیشانی پر ہاتھ پھیرا اور تین مرتبہ میرے لیے دعا کی۔ پھر فرمایا: ”جاؤ اور بیت اللہ کے پاس اذان دو۔“ میں نے عرض کی: ”وہ کیسے، یا رسول اللہ؟“ تو آپ نے مجھے اذان کا طریقہ سکھایا، جیسے آج کل اذان دی جاتی ہے: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔ صبح کی پہلی اذان میں یہ الفاظ استعمال کیے جاتے ہیں: ”الصلوٰۃ خیر من النوم، الصلوٰۃ خیر من النوم۔“ آپ نے مجھے اقامت کے کلمات بھی دو مرتبہ کہنے کا طریقہ سکھایا: ”قد قامت الصلوٰۃ، قد قامت الصلوٰۃ، اللہ اکبر اللہ اکبر، لا الہ الا اللہ۔“ [سنن الدارقطني/ كتاب الصلاة/حدیث: 903]

سیدنا ابومحذورہ رضی اللہ عنہ بیان کرتے ہیں: میں دس نوجوانوں کے ہمراہ نبی کریم صلی اللہ علیہ وسلم کے ساتھ حنین کے لیے روانہ ہوا۔ اس وقت آپ ہمارے نزدیک سب سے زیادہ ناپسندیدہ شخصیت تھے۔ ہم اٹھ کر اذان دینے لگے، ہم ان کا مذاق اڑا رہے تھے۔ نبی کریم صلی اللہ علیہ وسلم نے فرمایا: ”ان نوجوانوں کو میرے پاس لاؤ۔“ پھر آپ نے فرمایا: ”تم لوگ اذان دو!“ ان لوگوں نے اذان دی۔ آپ نے فرمایا: ”ہاں! یہ وہ شخص ہے جس کی میں نے اذان سنی تھی۔ تم جاؤ اور اہل مکہ کے لیے اذان دیا کرو۔ تم عتاب سے کہو کہ نبی کریم صلی اللہ علیہ وسلم نے یہ حکم دیا ہے کہ میں اہل مکہ کے لیے اذان دوں۔“ پھر آپ نے میری پیشانی پر ہاتھ پھیرا اور فرمایا: ”یہ کہو: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ۔“ یہ کلمات دو مرتبہ ہیں۔ ”اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔“ جب تم صبح کی پہلی اذان دو تو یہ کہو: ”الصلوٰۃ خیر من النوم، الصلوٰۃ خیر من النوم۔“ جب تم اقامت کہو تو ان کلمات کو دو مرتبہ کہو: ”قد قامت الصلوٰۃ، قد قامت الصلوٰۃ۔“ کیا تم نے یہ بات سن لی؟ راوی بیان کرتے ہیں: سیدنا ابومحذورہ رضی اللہ عنہ اپنی پیشانی کے بال نہیں کٹواتے تھے اور وہاں مانگ نہیں نکالتے تھے کیونکہ نبی کریم صلی اللہ علیہ وسلم نے اس پر ہاتھ پھیرا تھا۔ [سنن الدارقطني/ كتاب الصلاة/حدیث: 904]

سیدنا ابومحذورہ رضی اللہ عنہ بیان کرتے ہیں: نبی کریم صلی اللہ علیہ وسلم نے اذان کے یہ الفاظ سکھائے: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔ [سنن الدارقطني/ كتاب الصلاة/حدیث: 905]

عمار بن سعد رحمہ اللہ اپنے والد سیدنا سعد بن ابی وقاص رضی اللہ عنہ کا یہ بیان نقل کرتے ہیں: یہ اذان سیدنا بلال رضی اللہ عنہ کی اذان ہے، جس کا حکم انہیں نبی کریم صلی اللہ علیہ وسلم نے دیا تھا: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، پھر وہ دوبارہ کہتے: اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔ ان کی اقامت کے الفاظ یہ ہیں: اقامت کے الفاظ ایک ایک مرتبہ کہے جاتے ہیں، اور یہ جملہ بھی ایک مرتبہ کہا جاتا ہے: قد قامت الصلوٰۃ۔ سیدنا سعد رضی اللہ عنہ فرماتے ہیں: نبی کریم صلی اللہ علیہ وسلم نے مجھ سے فرمایا: ”اے سعد! جب تم بلال کو میرے ساتھ نہ دیکھو تو تم اذان دے دیا کرو۔“ آپ نے اپنا دست مبارک ان کے سر پر پھیرا اور فرمایا: ”اے سعد! اللہ تعالیٰ تمہیں برکت نصیب کرے! جب تم بلال کو میرے ساتھ نہ دیکھو تو اذان دے دیا کرو۔“ راوی بیان کرتے ہیں: پھر سیدنا سعد رضی اللہ عنہ نے قباء میں نبی کریم صلی اللہ علیہ وسلم کے لیے تین مرتبہ اذان دی۔ راوی بیان کرتے ہیں: جب سیدنا بلال رضی اللہ عنہ نے سیدنا عمر بن خطاب رضی اللہ عنہ سے جہاد میں جانے کی اجازت مانگی تو انہوں نے پوچھا: ”اے بلال! اب میں اذان کا کام کس کے سپرد کروں؟“ انہوں نے جواب دیا: ”سعد کے، کیونکہ انہوں نے قباء میں نبی کریم صلی اللہ علیہ وسلم کے لیے اذان دی ہے۔“ تو سیدنا عمر رضی اللہ عنہ نے سیدنا سعد رضی اللہ عنہ کو بلایا اور فرمایا: ”اذان دینے کا کام تمہارے اور تمہاری اولاد کے سپرد ہے۔“ پھر انہوں نے انہیں وہ نیزہ عطا کیا جو سیدنا بلال رضی اللہ عنہ نبی کریم صلی اللہ علیہ وسلم کے لیے اٹھایا کرتے تھے۔ سیدنا عمر رضی اللہ عنہ نے فرمایا: ”تم اسے لے کر میرے آگے چلا کرو۔“ سیدنا بلال رضی اللہ عنہ اسے نبی کریم صلی اللہ علیہ وسلم کے آگے لے کر چلا کرتے تھے اور عید گاہ میں گاڑ دیا کرتے تھے۔ تو سیدنا سعد رضی اللہ عنہ نے بھی ایسا ہی کیا۔ [سنن الدارقطني/ كتاب الصلاة/حدیث: 906]

ابراہیم بن عبدالعزیز رحمہ اللہ بیان کرتے ہیں: میں نے اپنے جد، والد، اور دیگر رشتہ داروں کو یہ کہتے پایا کہ وہ اقامت ان الفاظ میں پڑھا کرتے تھے: اللہ اکبر اللہ اکبر، اشھد ان لا الہ الا اللہ، اشھد ان محمدا رسول اللہ، حی علی الصلوٰۃ، حی علی الفلاح، قد قامت الصلوٰۃ، اللہ اکبر، لا الہ الا اللہ۔ [سنن الدارقطني/ كتاب الصلاة/حدیث: 907]

ابراہیم بن ابومحذورہ رحمہ اللہ اپنے والد کے حوالے سے اپنے دادا کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: نبی کریم صلی اللہ علیہ وسلم نے سیدنا ابومحذورہ رضی اللہ عنہ کو بلایا اور انہیں اذان دینے کا طریقہ سکھایا اور ہدایت کی کہ وہ مکہ میں اذان دیں، جس میں اللہ اکبر دو مرتبہ ہو، اور اقامت کے کلمات ایک مرتبہ پڑھا کریں۔ [سنن الدارقطني/ كتاب الصلاة/حدیث: 908]

سیدنا ابومحذورہ رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں اقامت کے انیس کلمات سکھائے۔ اذان کے الفاظ یہ ہیں: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔ اقامت کے الفاظ دو مرتبہ ادا کیے جاتے ہیں اور دہرائے نہیں جاتے۔ [سنن الدارقطني/ كتاب الصلاة/حدیث: 909]

سیدنا ابومحذورہ رضی اللہ عنہ بیان کرتے ہیں: میں کم سن لڑکا تھا۔ میں نے نبی کریم صلی اللہ علیہ وسلم کے سامنے فجر کی اذان دی۔ یہ حنین کا واقعہ ہے۔ جب میں حی علی الفلاح پر پہنچا تو نبی کریم صلی اللہ علیہ وسلم نے فرمایا: ”تم اس میں یہ جملہ شامل کر لو: الصلوٰۃ خیر من النوم۔“ یعنی ”نماز نیند سے بہتر ہے۔“ [سنن الدارقطني/ كتاب الصلاة/حدیث: 910]

سیدنا عبداللہ بن عمر رضی اللہ عنہما بیان کرتے ہیں: جب مسلمان مدینہ منورہ آئے تو نماز کے وقت اکٹھے ہو جایا کرتے تھے۔ انہیں اس کے لیے (باقاعدہ طور پر) بلایا نہیں جاتا تھا۔ ایک دن انہوں نے اس بارے میں بات چیت کی تو کسی نے کہا: تم لوگ عیسائیوں کے ناقوس کی طرح ناقوس بجایا کرو۔ کچھ نے کہا: یہودیوں کی طرح بوق بجایا کرو۔ تو سیدنا عمر رضی اللہ عنہ نے یہ فرمایا: ”تم لوگ کچھ لوگوں کو بھیجتے کیوں نہیں؟ تاکہ وہ نماز کے لیے اعلان کر دیا کریں۔“ تو نبی کریم صلی اللہ علیہ وسلم نے ارشاد فرمایا: ”اے بلال! تم اٹھو اور اذان دو۔“ [سنن الدارقطني/ كتاب الصلاة/حدیث: 911]

عبدالملک رحمہ اللہ اپنے والد کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: آپ نے فرمایا: ”اے ابومحذورہ! ہر نماز کی اذان میں کلمات دو مرتبہ پڑھو اور صبح کی اذان میں کہو: ’نماز نیند سے بہتر ہے۔‘“ [سنن الدارقطني/ كتاب الصلاة/حدیث: 912]