عبداللہ بن محمد اپنے والد کے حوالے سے اپنے دادا (سیدنا عبداللہ بن زید رضی اللہ عنہ) کا یہ بیان نقل کرتے ہیں: جب انہوں نے خواب میں اذان کا طریقہ دیکھا، تو نبی کریم صلی اللہ علیہ وسلم نے سیدنا بلال رضی اللہ عنہ کو حکم دیا تو انہوں نے اذان دی، پھر نبی کریم صلی اللہ علیہ وسلم نے سیدنا عبداللہ بن زید رضی اللہ عنہ کو حکم دیا انہوں نے اقامت کہی۔ [سنن الدارقطني/ كتاب الصلاة/حدیث: 943]

سیدنا انس رضی اللہ عنہ بیان کرتے ہیں: سنت یہ ہے کہ جب مؤذن فجر کی اذان دے تو ”حی علی الفلاح“ کے بعد ”الصلوٰۃ خیر من النوم“ دو مرتبہ کہے اور پھر ”اللہ اکبر اللہ اکبر، لا الہ الا اللہ“ کہہ دے۔ [سنن الدارقطني/ كتاب الصلاة/حدیث: 944]

سیدنا انس رضی اللہ عنہ بیان کرتے ہیں: تثویب صبح کی نماز میں ہوتی ہے۔ جب مؤذن فجر کی اذان میں ”حی علی الصلوٰۃ“ اور ”حی علی الفلاح“ کہے گا تو ”الصلوٰۃ خیر من النوم“ کہے گا۔ [سنن الدارقطني/ كتاب الصلاة/حدیث: 945]

سیدنا عبداللہ بن عمر رضی اللہ عنہما، سیدنا عمر رضی اللہ عنہ کے بارے میں نقل کرتے ہیں: انہوں نے اپنے مؤذن سے کہا تھا کہ جب تم فجر کی اذان میں ”حی علی الصلوٰۃ“ پر پہنچو تو یہ کہو: ”الصلوٰۃ خیر من النوم، الصلوٰۃ خیر من النوم۔“ [سنن الدارقطني/ كتاب الصلاة/حدیث: 946]

عبدالرحمن بن ابولیلی، سیدنا بلال رضی اللہ عنہ کا یہ بیان نقل کرتے ہیں: نبی کریم صلی اللہ علیہ وسلم نے مجھے یہ ہدایت کی تھی: میں فجر کی اذان میں تثویب کہوں، آپ نے مجھے عشاء کی اذان میں تثویب کہنے سے منع کیا تھا۔ [سنن الدارقطني/ كتاب الصلاة/حدیث: 947]

مالک بن دینار رحمہ اللہ بیان کرتے ہیں: جب سیدنا ابومحذورہ رضی اللہ عنہ کے صاحبزادے اذان دے کر فارغ ہوئے تو میں بھی ان کے پیچھے مسجد حرام کے مینار تک چڑھا اور میں نے ان سے کہا: مجھے اس اذان کے بارے میں بتائیں جو آپ کے والد نے نبی کریم صلی اللہ علیہ وسلم کے سامنے دی تھی۔ انہوں نے جواب دیا: انہوں نے اذان کے آغاز میں تکبیر کہی، پھر یہ کلمات پڑھے: ”اشھد ان لا الہ الا اللہ، اشھد ان محمدا رسول اللہ، حی علی الصلوٰۃ، حی علی الفلاح“۔ یہ ایک مرتبہ پڑھے، پھر دوبارہ یہ کلمات پڑھے: ”اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ“۔ یہاں تک کہ اذان کے آخر میں یہ کلمات پڑھے: ”اللہ اکبر اللہ اکبر، لا الہ الا اللہ“۔ اس روایت کو نقل کرنے میں داؤد رحمہ اللہ منفرد ہیں۔ [سنن الدارقطني/ كتاب الصلاة/حدیث: 948]

سیدنا ابومحذورہ رضی اللہ عنہ بیان کرتے ہیں: نبی کریم صلی اللہ علیہ وسلم نے انہیں اذان کے یہ کلمات سکھائے: ”اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ“۔ پھر انہوں نے دوبارہ کہا: ”اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح“۔ [سنن الدارقطني/ كتاب الصلاة/حدیث: 949]

اسود رحمہ اللہ بیان کرتے ہیں: سیدنا بلال رضی اللہ عنہ کی اذان کا اختتام ان کلمات پر ہوتا تھا: اللہ اکبر اللہ اکبر، لا الہ الا اللہ۔ [سنن الدارقطني/ كتاب الصلاة/حدیث: 950]

اسود رحمہ اللہ بیان کرتے ہیں: سیدنا بلال رضی اللہ عنہ کی اذان کے آخری کلمات یہ ہوتے تھے: لا الہ الا اللہ۔ [سنن الدارقطني/ كتاب الصلاة/حدیث: 951]

اسود رحمہ اللہ، سیدنا بلال رضی اللہ عنہ کے بارے میں بیان کرتے ہیں: ان کی اذان کے آخر میں یہ کلمات ہوتے تھے: اللہ اکبر اللہ اکبر، لا الہ الا اللہ۔ [سنن الدارقطني/ كتاب الصلاة/حدیث: 952]