یہی روایت ایک اور سند کے ہمراہ منقول ہے اور اس میں یہ الفاظ ہیں: ”تو میں تمہیں غسل دوں گا۔“ [سنن الدارقطني/ كتاب الجنائز/حدیث: 1829]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے ایک نماز جنازہ ادا کی، تو آپ صلی اللہ علیہ وسلم نے اپنا دایاں دست مبارک بائیں دست مبارک پر رکھا۔ [سنن الدارقطني/ كتاب الجنائز/حدیث: 1830]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم جب کسی شخص کی نماز جنازہ ادا کرتے تھے، تو آپ صلی اللہ علیہ وسلم پہلی تکبیر میں دونوں ہاتھ اٹھایا کرتے تھے، پھر اس کے بعد اپنا دایاں دست مبارک بائیں دست مبارک پر رکھ لیتے تھے۔ [سنن الدارقطني/ كتاب الجنائز/حدیث: 1831]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نماز جنازہ میں پہلی تکبیر میں دونوں ہاتھ اٹھا کرتے تھے، پھر اس کے بعد آپ نماز جنازہ میں تکبیر کہتے ہوئے رفع یدین نہیں کرتے تھے۔ [سنن الدارقطني/ كتاب الجنائز/حدیث: 1832]

عمرو بیان کرتے ہیں: ایک عیسائی عورت کا انتقال ہو گیا، جس کے پیٹ میں ایک مسلمان (کا) بچہ تھا، تو سیدنا عمر رضی اللہ عنہ نے یہ حکم دیا کہ اس عورت کو اس بچے کی وجہ سے مسلمانوں کے قبرستان میں دفن کیا جائے۔ [سنن الدارقطني/ كتاب الجنائز/حدیث: 1833]

ابوسلمان بیان کرتے ہیں: ایک مرتبہ سیدنا زید بن ارقم رضی اللہ عنہ نے ایک شخص کی نماز جنازہ پڑھائی، تو انہوں نے پانچ مرتبہ تکبیر کہی، جب انہوں نے سلام پھیرا، تو ہم نے ان سے کہا: ”آپ نے غلطی سے ایسا کیا ہے یا جان بوجھ کر کیا ہے؟“ تو انہوں نے بتایا: ”جان بوجھ کر کیا ہے، کیونکہ نبی کریم صلی اللہ علیہ وسلم اسی طرح اسے ادا کیا کرتے تھے۔“ [سنن الدارقطني/ كتاب الجنائز/حدیث: 1834]

عبداللہ بن کعب اپنے والد کا یہ بیان نقل کرتے ہیں: سیدنا ثابت رضی اللہ عنہ، نبی کریم صلی اللہ علیہ وسلم کی خدمت میں حاضر ہوئے، انہوں نے بتایا: ان کی والدہ کا انتقال ہو گیا ہے، جو عیسائی تھی اور وہ یہ چاہتے تھے کہ اپنی والدہ کی آخری رسومات میں شریک ہوں، تو نبی کریم صلی اللہ علیہ وسلم نے ارشاد فرمایا: ”تم اپنی سواری پر سوار ہو جاؤ اور جنازے کے آگے چلو، اگر تم اس کے آگے چل رہے ہوگے، تو تم اس کے ساتھ شمار نہیں ہوگے۔“ (امام دارقطنی رحمہ اللہ بیان کرتے ہیں) یہ روایت ثابت نہیں ہے، اس روایت کا ایک راوی معشر ضعیف ہے۔ [سنن الدارقطني/ كتاب الجنائز/حدیث: 1835]

عبداللہ بن عامر اپنے والد کا یہ بیان نقل کرتے ہیں: مجھے نبی کریم صلی اللہ علیہ وسلم کے بارے میں یہ بات اچھی طرح یاد ہے، جب آپ صلی اللہ علیہ وسلم نے سیدنا عثمان بن مظعون رضی اللہ عنہ کو دفن کروایا (تو اس سے پہلے) آپ نے ان کی نماز جنازہ ادا کرتے ہوئے ان پر چار مرتبہ تکبیر کہی، (بعد میں دفن کے بعد) آپ صلی اللہ علیہ وسلم نے دونوں مٹھیوں میں تین مرتبہ مٹی لے کر ان کی قبر پر ڈالی، آپ صلی اللہ علیہ وسلم ان کے سرہانے کی طرف کھڑے ہوئے تھے۔ [سنن الدارقطني/ كتاب الجنائز/حدیث: 1836]

مسروق بیان کرتے ہیں: سیدنا عمر رضی اللہ عنہ نے نبی کریم صلی اللہ علیہ وسلم کی ایک زوجہ محترمہ کی نماز جنازہ پڑھائی، تو میں نے انہیں یہ کہتے ہوئے سنا: ”میں اس خاتون کی نماز جنازہ اس طرح پڑھاؤں گا، جس طرح نبی کریم صلی اللہ علیہ وسلم نے آخری مرتبہ نماز جنازہ پڑھائی تھی۔“ پھر سیدنا عمر رضی اللہ عنہ نے چار مرتبہ تکبیر کہی۔ [سنن الدارقطني/ كتاب الجنائز/حدیث: 1837]

سیدنا انس بن مالک رضی اللہ عنہ بیان کرتے ہیں: نبی کریم صلی اللہ علیہ وسلم دعا کے دوران دونوں ہاتھ بلند نہیں کیا کرتے تھے، صرف نماز استسقاء میں ایسا کیا کرتے تھے، آپ اس میں دونوں ہاتھ اتنے بلند کر لیا کرتے تھے کہ آپ کے بغلوں کی سفیدی نظر آنے لگتی تھی۔ [سنن الدارقطني/ كتاب الجنائز/حدیث: 1838]