سیدنا عقبہ بن عامر رضی اللہ عنہ بیان کرتے ہیں: نبی کریم صلی اللہ علیہ وسلم نے غزوہ احد میں شہید ہونے والوں کی نماز جنازہ آٹھ سال بعد ادا کی تھی۔ [سنن الدارقطني/ كتاب الجنائز/حدیث: 1849]

سیدنا عبداللہ بن جعفر رضی اللہ عنہ بیان کرتے ہیں: جب سیدنا جعفر طیار رضی اللہ عنہ کے انتقال کی خبر آئی، تو نبی کریم صلی اللہ علیہ وسلم نے ارشاد فرمایا: ”جعفر کے گھر والوں کے لیے کھانا تیار کرو، کیونکہ انہیں ایک ایسی صورت حال لاحق ہو گئی ہے، جس نے انہیں مشغول کر دیا ہے۔“ (یہاں ایک لفظ کے بارے میں راوی کو شک ہے)۔ [سنن الدارقطني/ كتاب الجنائز/حدیث: 1850]

سیدہ اسماء بنت عمیس رضی اللہ عنہا بیان کرتی ہیں: سیدہ فاطمہ رضی اللہ عنہا نے یہ وصیت کی تھی کہ انہیں ان کے شوہر سیدنا علی رضی اللہ عنہ اور اسماء (بنت عمیس) غسل دیں گے، تو ان دونوں نے ہی انہیں غسل دیا۔ [سنن الدارقطني/ كتاب الجنائز/حدیث: 1851]

نافع بیان کرتے ہیں: سیدنا عبداللہ بن عمر رضی اللہ عنہما نے سات افراد کی نماز جنازہ ایک ساتھ پڑھائی، جن میں مرد بھی تھے اور خواتین بھی، تو آپ نے مردوں کو اپنے آگے رکھا اور خواتین کو قبلہ والی سمت میں رکھا، آپ نے ان سب کے لیے ایک ہی صف بنائی۔ راوی بیان کرتے ہیں: سیدنا عمر بن خطاب رضی اللہ عنہ کی اہلیہ اور سیدنا علی رضی اللہ عنہ کی صاحبزادی سیدہ ام کلثوم رضی اللہ عنہا اور ان کے صاحبزادے کی میت رکھی گئی۔ ان صاحبزادے کا نام زید بن عمر تھا۔ ان دنوں سیدنا سعید بن العاص گورنر تھے اور حاضرین میں سیدنا عبداللہ بن عباس، ابوہریرہ، سیدنا ابوسعید خدری اور سیدنا قتادہ رضی اللہ عنہ تھے۔ میں نے دریافت کیا: یہ کیا طریقہ ہے؟ انہوں نے بتایا: ”یہ سنت ہے۔“ [سنن الدارقطني/ كتاب الجنائز/حدیث: 1852]

سیدنا عتبان بن مالک رضی اللہ عنہ بیان کرتے ہیں: نبی کریم صلی اللہ علیہ وسلم نے ان کے گھر میں چاشت کے وقت نوافل ادا کیے، لوگ آپ صلی اللہ علیہ وسلم کے پیچھے کھڑے ہو گئے اور انہوں نے بھی نماز ادا کی۔ باب: نماز کے دوران تھوڑا عمل کرنا جائز ہے اور جس شخص پر بے ہوشی طاری ہو جائے، اس پر کون سی نماز کی قضاء لازم ہو گی، نفل نماز ادا کرنے کا وقت۔ [سنن الدارقطني/ كتاب الجنائز/حدیث: 1853]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نماز ادا کر رہے ہوتے تھے، اگر اس دوران کوئی شخص دروازے پر دستک دیتا، تو اگر دروازہ آپ کے سامنے کی طرف یا آپ صلی اللہ علیہ وسلم کے دائیں طرف یا بائیں طرف ہوتا، تو آپ صلی اللہ علیہ وسلم دروازہ کھول دیا کرتے تھے، البتہ قبلہ کی طرف پیٹھ کر کے (اس طرف منہ موڑ کر) دروازہ نہیں کھولتے تھے۔ [سنن الدارقطني/ كتاب الجنائز/حدیث: 1854]

سیدہ عائشہ رضی اللہ عنہا بیان کرتی ہیں: بعض اوقات نبی کریم صلی اللہ علیہ وسلم نماز ادا کر رہے ہوتے اور دروازہ بند ہوتا، میں دوران میں آتی اور دروازہ کھولنے کے لیے کہتی، تو نبی کریم صلی اللہ علیہ وسلم چلتے ہوئے آتے اور میرے لیے دروازہ کھول دیتے، پھر آپ صلی اللہ علیہ وسلم اپنی جائے نماز پر تشریف لے جاتے۔ سیدہ عائشہ رضی اللہ عنہا نے یہ بات ذکر کی تھی کہ وہ دروازہ قبلہ کی سمت میں تھا۔ [سنن الدارقطني/ كتاب الجنائز/حدیث: 1855]

سیدہ عائشہ رضی اللہ عنہا بیان کرتی ہیں: میں دروازہ کھولنے کے لیے کہتی، حالانکہ نبی کریم صلی اللہ علیہ وسلم اس وقت کھڑے نوافل ادا کر رہے ہوتے، تو آپ صلی اللہ علیہ وسلم اپنے دائیں طرف یا بائیں طرف سے آ کر دروازہ کھول دیتے اور پھر واپس اپنی جگہ تشریف لے جاتے۔ [سنن الدارقطني/ كتاب الجنائز/حدیث: 1856]

عاصم بن ضمرہ بیان کرتے ہیں: ہم نے سیدنا علی رضی اللہ عنہ سے کہا: آپ ہمیں نبی کریم صلی اللہ علیہ وسلم کے نوافل کے بارے میں کوئی حدیث سنائیں، تو انہوں نے فرمایا: ”ان کی طاقت کون رکھ سکتا ہے؟“ راوی کہتے ہیں: ہم نے عرض کی کہ آپ ہمیں اس بارے میں بتائیں، جہاں تک ہماری طاقت ہو گی، ہم اتنے ادا کر لیا کریں گے، تو سیدنا علی رضی اللہ عنہ نے بتایا: نبی کریم صلی اللہ علیہ وسلم (نماز ادا کر لینے کے بعد) انتظار کرتے، یہاں تک کہ سورج بلند ہو جاتا اور مشرق کی سمت میں اتنا بلند ہو جاتا، جتنا عصر کے وقت (مغرب کی سمت میں بلند ہوتا ہے)، پھر نبی کریم صلی اللہ علیہ وسلم دو رکعت ادا کرتے، آپ ان کے درمیان فصل کرتے ہوئے فرشتوں، انبیاء کرام اور ان کے پیروکار مومنین اور مسلمانوں پر سلام بھیجتے، پھر اس کے بعد آپ انتظار کرتے رہتے، یہاں تک کہ چاشت کے وقت وہ اتنا بلند ہو جاتا کہ جتنی ظہر کے وقت مشرق کی سمت اس کی مقدار ہوتی، پھر آپ چار رکعت ادا کرتے، جن کے درمیان سابقہ طریقے کے مطابق فصل کرتے، پھر آپ انتظار کرتے، یہاں تک کہ سورج ڈھل جاتا، تو آپ چار رکعت نماز ادا کرتے اور ان میں آپ مقرب فرشتوں، انبیاء کرام اور ان کے پیروکار مومنوں اور مسلمانوں پر سلام فصل کرتے، اس کے بعد آپ ظہر کی نماز کے بعد دو رکعت (سنت) ادا کرتے اور اس کی مانند فصل کرتے، پھر آپ سے پہلے چار رکعات (سنت) ادا کرتے اور ان کے درمیان بھی اسی طرح فصل کرتے۔ [سنن الدارقطني/ كتاب الجنائز/حدیث: 1857]

عاصم بن ضمرہ بیان کرتے ہیں: ہم نے سیدنا علی رضی اللہ عنہ سے نبی کریم صلی اللہ علیہ وسلم کی نماز کے بارے میں دریافت کیا، تو انہوں نے فرمایا: ”اس کی کون طاقت رکھتا ہے؟“ ہم نے عرض کی: ہم طاقت نہیں رکھتے (لیکن آپ ہمیں اس بارے میں بتائیں)، تو سیدنا علی رضی اللہ عنہ نے بتایا: نبی کریم صلی اللہ علیہ وسلم انتظار کرتے، یہاں تک کہ سورج طلوع ہونے کے مقام سے اتنا دور ہو جاتا، جتنا عصر کے وقت غروب ہونے کی جگہ سے دور ہوتا ہے، اس وقت آپ دو رکعت نماز ادا کرتے، پھر آپ انتظار کرتے، یہاں تک کہ سورج طلوع ہونے کے مقام سے اتنا دور ہو جاتا، جتنا غروب ہونے کے مقام سے دور ہوتا (یعنی زوال کا وقت ہو جاتا)، اس وقت نبی کریم صلی اللہ علیہ وسلم زوال کے بعد ظہر کی نماز سے پہلے چار رکعت سنت ادا کرتے، ظہر کے بعد آپ دو رکعت سنت ادا کرتے اور پھر سے پہلے چار رکعت ادا کرتے۔ [سنن الدارقطني/ كتاب الجنائز/حدیث: 1858]