سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نماز کے دوران اشارہ کر دیا کرتے تھے۔ [سنن الدارقطني/ كتاب الجنائز/حدیث: 1869]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص سورج نکلنے سے پہلے صبح کی نماز کا ایک سجدہ پا لے، اس نے اس نماز کو پا لیا، یا سورج غروب ہونے سے پہلے (عصر کی نماز کا) سجدہ پا لے، اس نے اس نماز کو پا لیا۔“ [سنن الدارقطني/ كتاب الجنائز/حدیث: 1870]

بکیر بن اشج بیان کرتے ہیں: مدینہ منورہ میں نبی کریم صلی اللہ علیہ وسلم کی مسجد مبارکہ کے ساتھ نو مسجدیں تھیں، اکرم صلی اللہ علیہ وسلم کے زمانہ اقدس میں ان مسجدوں کے آس پاس رہنے والے لوگ سیدنا بلال رضی اللہ عنہ کی اذان سنتے تھے، لیکن وہ ان مسجدوں میں نماز ادا کر لیا کرتے تھے، ان میں سب سے زیادہ قریب مسجد بنو عمرو تھی، جس کا تعلق بنو نجار سے تھا، ایک مسجد بنو صاعدہ تھی، ایک مسجد بنو عبید تھی، ایک مسجد بنو سلمہ تھی، ایک مسجد بنو راتج تھی، جس کا تعلق بنو عبد الاشہل سے تھا، ایک مسجد بنو زریق تھی، ایک مسجد بنو غفار تھی، ایک مسجد اسلم تھی اور ایک مسجد جہینہ تھی، نویں مسجد کے بارے میں راوی کو شک ہے۔ باب: جو شخص کسی دوسرے شخص کی طرف منہ کر کے نماز ادا کرے، جسے وہ اپنے سامنے قبلہ کی سمت میں دیکھ رہا ہو، اس پر دوبارہ نماز ادا کرنا لازم ہے۔ [سنن الدارقطني/ كتاب الجنائز/حدیث: 1871]

محمد بن حنفیہ بیان کرتے ہیں: نبی کریم صلی اللہ علیہ وسلم نے ایک شخص کو دیکھا، جو دوسرے شخص کی طرف رخ کر کے نماز ادا کر رہا تھا، تو آپ صلی اللہ علیہ وسلم نے اس شخص کو حکم دیا کہ وہ دوبارہ نماز ادا کرے، اس شخص نے عرض کی: ”یا رسول اللہ! میں تو مکمل نماز ادا کر چکا ہوں۔“ تو نبی کریم صلی اللہ علیہ وسلم نے ارشاد فرمایا: ”تم نے نماز ایسی حالت میں ادا کی ہے کہ تم قبلہ کی سمت میں ایک دوسرے شخص کی طرف دیکھ رہے تھے۔“ [سنن الدارقطني/ كتاب الجنائز/حدیث: 1872]

سیدنا عباس جشمی بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”بعض امام بھگانے والے ہوتے ہیں۔“ اس روایت کے راوی قتادہ کہتے ہیں: میرے علم کے مطابق یہاں بھگانے والوں سے مراد وہ لوگ ہیں، جو امامت کے دوران طویل قراءت کرتے ہیں، یہاں تک کہ لوگ انہیں چھوڑ کر چلے جائیں۔ [سنن الدارقطني/ كتاب الجنائز/حدیث: 1873]

ابن سابط بیان کرتے ہیں: نبی کریم صلی اللہ علیہ وسلم نے صبح کی نماز ادا کی، آپ صلی اللہ علیہ وسلم نے اس میں سات آیات تلاوت کیں، پھر آپ نے ایک بچے (کے رونے) کی آواز سنی، تو آپ رکوع میں چلے گئے، پھر اس کے بعد آپ (دوسری رکعت میں) کھڑے ہوئے، تو آپ صلی اللہ علیہ وسلم نے دو آیات کی تلاوت کی اور رکوع میں چلے گئے۔ [سنن الدارقطني/ كتاب الجنائز/حدیث: 1874]

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم بعض اوقات اپنی ماں کے ساتھ موجود کسی بچے کے رونے کی آواز سنتے تھے، آپ اس وقت نماز کی حالت میں ہوتے، تو آپ صلی اللہ علیہ وسلم (چھوٹی سی سورت پڑھ کر) رکوع میں چلے جاتے۔ [سنن الدارقطني/ كتاب الجنائز/حدیث: 1875]

سیدنا علی بن ابوطالب رضی اللہ عنہ بیان کرتے ہیں: نبی کریم صلی اللہ علیہ وسلم نے مجھ سے یہ فرمایا تھا: ”تم اپنے زانوؤں کو کسی کے سامنے بے پردہ نہیں کرنا اور کسی بھی زندہ یا مرحوم شخص کے زانوؤں کی طرف نہیں دیکھنا (کیونکہ زانوؤں، ستر کا حصہ ہیں)۔“ [سنن الدارقطني/ كتاب الجنائز/حدیث: 1876]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم کا ایک موذن تھا، جو طربیہ انداز میں اذان دیتا، نبی کریم صلی اللہ علیہ وسلم نے فرمایا: ”اذان آسان اور نرمی کا کام ہے، اگر تم آسانی اور نرمی کے ساتھ اذان دے سکتے ہو، تو ٹھیک ہے، ورنہ اذان نہ دو۔“ [سنن الدارقطني/ كتاب الجنائز/حدیث: 1877]

سیدنا کعب رضی اللہ عنہ بیان کرتے ہیں: جو شخص عشاء کی نماز کے بعد چار رکعت ادا کرے، ان میں قراءت کرے، ان میں اچھی طرح رکوع اور سجدہ کرے، تو اس شخص کو اس نماز کا اسی طرح اجر ملے گا، جس طرح شب قدر میں ان رکعتوں کو ادا کرنے کا اجر ملتا ہے۔ [سنن الدارقطني/ كتاب الجنائز/حدیث: 1878]