سیدنا عمار رضی اللہ عنہ کے غلام یزید بیان کرتے ہیں: ایک مرتبہ سیدنا عمار بن یاسر رضی اللہ عنہ پر مدہوشی طاری ہو گئی، جو ظہر، عصر، مغرب اور عشاء کے وقت تک برقرار رہی، نصف رات کے وقت جب ان کو ہوش آیا، تو انہوں نے ظہر، عصر، مغرب اور عشاء کی نمازیں ادا کیں۔ [سنن الدارقطني/ كتاب الجنائز/حدیث: 1859]

سیدہ عائشہ رضی اللہ عنہا بیان کرتی ہیں: انہوں نے نبی کریم صلی اللہ علیہ وسلم سے ایسے شخص کے بارے میں دریافت کیا، جس پر مدہوشی طاری ہو جاتی ہے اور وہ نماز چھوڑ دیتا ہے، سیدہ عائشہ رضی اللہ عنہا بیان کرتی ہیں کہ نبی کریم صلی اللہ علیہ وسلم نے یہ بات ارشاد فرمائی: ”ایسے شخص پر قضاء لازم نہیں ہو گی، قضاء اس وقت لازم ہو گی، جب کسی شخص کو کسی نماز کے وقت کے دوران اس پر بے ہوشی طاری ہو اور پھر اسی وقت کے دوران اسے ہوش آ جائے، تو وہ شخص اس نماز کو ادا کرے گا۔“ اس روایت کے دونوں راویوں کے الفاظ ایک جیسے ہیں، تاہم سند میں کچھ فرق ہے۔ [سنن الدارقطني/ كتاب الجنائز/حدیث: 1860]

سیدنا عبداللہ بن عمر رضی اللہ عنہما کے بارے میں یہ بات منقول ہے: ایک مرتبہ وہ ایک دن اور ایک رات بے ہوش رہے، تو انہوں نے اس دوران کی نمازوں کی قضاء نہیں کی۔ [سنن الدارقطني/ كتاب الجنائز/حدیث: 1861]

ایک اور سند کے حوالے سے یہ بات منقول ہے: ایک مرتبہ سیدنا عبداللہ بن عمر رضی اللہ عنہما دو دن سے زیادہ عرصے تک بے ہوش رہے، تو انہوں نے (اس دوران گزر جانے والی) نمازوں کی قضاء نہیں کی۔ [سنن الدارقطني/ كتاب الجنائز/حدیث: 1862]

نافع بیان کرتے ہیں: سیدنا عبداللہ بن عمر رضی اللہ عنہما ایک مرتبہ تین دن اور تین راتوں تک بے ہوش رہے، تو آپ نے اس دوران (قضاء ہو جانے والی نمازوں) کی قضاء نہیں کی۔ [سنن الدارقطني/ كتاب الجنائز/حدیث: 1863]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نماز کے دوران دائیں بائیں طرف دیکھ لیا کرتے تھے، البتہ آپ گردن موڑ کر اپنی پشت کی طرف نہیں دیکھتے تھے۔ اس روایت کو متصل روایت کے طور پر نقل کرنے میں فضل بن موسیٰ نامی راوی منفرد ہیں۔ دیگر راویوں نے اسے مرسل روایت کے طور پر نقل کیا ہے۔ [سنن الدارقطني/ كتاب الجنائز/حدیث: 1864]

عبداللہ بن سعید اپنی سند کے حوالے سے یہ بات نقل کرتے ہیں: اکرم صلی اللہ علیہ وسلم اپنی گردن موڑے بغیر نماز کے دوران ادھر ادھر ملاحظہ فرما لیا کرتے تھے۔ [سنن الدارقطني/ كتاب الجنائز/حدیث: 1865]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”(امام کو متوجہ کرنے کے لیے) ’سبحان اللہ‘ کہنے کا حکم مردوں کے لیے ہے اور تالی بجانے کا حکم عورتوں کے لیے ہے اور جو شخص نماز کے دوران کوئی ایسا اشارہ کرے جو سمجھ میں آ جائے، تو وہ شخص دوبارہ اس نماز کو ادا کرے گا۔“ [سنن الدارقطني/ كتاب الجنائز/حدیث: 1866]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص نماز کے دوران کوئی ایسا اشارہ کرے، جو سمجھ میں آ جائے، تو وہ شخص دوبارہ اپنی نماز ادا کرے گا۔“ اس روایت کا ایک راوی مجہول ہے، اور روایت کا آخری حصہ روایت میں اضافہ ہے، ہو سکتا ہے، یہ راوی کے الفاظ ہوں۔ نبی کریم صلی اللہ علیہ وسلم سے یہ بات مستند طور پر ثابت ہے، آپ صلی اللہ علیہ وسلم نماز کے دوران اشارہ کر دیا کرتے تھے۔ اس حدیث کو سیدنا انس، سیدنا جابر رضی اللہ عنہ اور دیگر صحابہ کرام رضی اللہ عنہ نے نبی کریم صلی اللہ علیہ وسلم کے حوالے سے نقل کیا ہے۔ شیخ ابوالحسن (یعنی امام دارقطنی رحمہ اللہ) فرماتے ہیں: اس روایت کو سیدنا عبداللہ بن عمر اور سیدہ عائشہ رضی اللہ عنہا نے بھی روایت کیا ہے۔ [سنن الدارقطني/ كتاب الجنائز/حدیث: 1867]

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم نماز کے دوران اشارہ کر لیا کرتے تھے۔ [سنن الدارقطني/ كتاب الجنائز/حدیث: 1868]