سیدہ عائشہ رضی اللہ عنہا بیان کرتی ہیں: یہ بات سنت ہے، غسل جنابت ایک صاع پانی کے ذریعے کیا جائے، وضو ایک رطل پانی کے ذریعے کیا جائے، ایک صاع آٹھ رطل کا ہوتا ہے۔ منصور نامی راوی کے حوالے سے اس روایت کو صرف صالح نامی راوی نے نقل کیا ہے اور یہ شخص ضعیف ہے۔ [سنن الدارقطني/ كتاب زكاة الفطر/حدیث: 2137]

سیدنا انس بن مالک رضی اللہ عنہ بیان کرتے ہیں: نبی کریم صلی اللہ علیہ وسلم دو رطل (پانی) کے ذریعے وضو کر لیتے تھے، آپ صلی اللہ علیہ وسلم ایک صاع یعنی آٹھ رطل پانی کے ذریعے غسل کرتے تھے۔ [سنن الدارقطني/ كتاب زكاة الفطر/حدیث: 2138]

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم ایک مد یعنی دو رطل (پانی) کے ذریعے وضو کر لیتے تھے، ایک صاع یعنی آٹھ رطل پانی کے ذریعے غسل کر لیتے تھے۔ [سنن الدارقطني/ كتاب زكاة الفطر/حدیث: 2139]

سیدنا عبداللہ بن عباس رضی اللہ عنہما بیان کرتے ہیں: سیدہ بریرہ رضی اللہ عنہا کا شوہر غلام تھا، اس کا نام مغیث تھا، وہ منظر بھی میری نگاہ میں ہے، وہ شخص اس عورت کے پیچھے روتا ہوا جا رہا تھا، اس کے آنسو اس کی داڑھی پر بہہ رہے تھے، نبی کریم صلی اللہ علیہ وسلم نے سیدنا عباس رضی اللہ عنہ سے فرمایا: ”اے عباس! کیا آپ کو حیرانگی نہیں ہوتی کہ مغیث، بریرہ سے کتنی محبت کرتا ہے، اور بریرہ، مغیث کو کتنا ناپسند کرتی ہے۔“ نبی کریم صلی اللہ علیہ وسلم نے اس خاتون سے یہ فرمایا تھا: ”تمہیں اس کے ساتھ شادی برقرار رکھنی چاہیے، کیونکہ یہ تمہارے بچوں کا باپ ہے۔“ اس عورت نے عرض کی: ”یا رسول اللہ! آپ مجھے حکم دے رہے ہیں؟“ نبی کریم صلی اللہ علیہ وسلم نے فرمایا: ”میں سفارش کر رہا ہوں۔“ تو اس عورت نے عرض کی: ”پھر مجھے اس کے ساتھ تعلق برقرار رکھنے کی ضرورت نہیں ہے۔“ [سنن الدارقطني/ كتاب زكاة الفطر/حدیث: 2140]

مجالد بیان کرتے ہیں: میں جزء بن معاویہ کا سیکرٹری تھا، جو سیدنا احنف بن قیس کے چچا ہیں، ہمارے پاس سیدنا عمر رضی اللہ عنہ کا خط آیا، یہ ان کے انتقال سے ایک سال پہلے کی بات ہے (اس میں یہ تحریر تھا): ”تم ہر جادوگر کو قتل کر دو اور مجوسیوں میں سے جس شخص نے اپنی سگی رشتہ دار عورت کے ساتھ شادی کی ہو، ان کے درمیان جدائی کروا دو اور انہیں زمزمہ سے منع کر دو۔“ (راوی کہتے ہیں) ہم نے تین جادوگروں کو قتل کروا دیا، ہم نے ہر آدمی کی ایسی بیوی سے جدائی کروا دی، جس کے ساتھ نکاح کو اللہ تعالیٰ نے حرام قرار دیا ہے، پھر انہوں نے بہت سا کھانا تیار کروایا اور مجوسیوں کی دعوت کی، انہوں نے اپنی تلوار اپنے زانوؤں کے اوپر رکھی، ان لوگوں نے ایک خچر کے وزن جتنا یا دو خچر کے وزن جتنی چاندی وہاں رکھ دی اور انہوں نے زمزمہ کے بغیر کھانا کھایا۔ راوی بیان کرتے ہیں: سیدنا عمر رضی اللہ عنہ نے مجوسیوں سے اس وقت تک جزیہ وصول نہیں کیا، جب تک سیدنا عبدالرحمن بن عوف رضی اللہ عنہ نے یہ گواہی نہیں دی کہ نبی کریم صلی اللہ علیہ وسلم نے ہجر سے تعلق رکھنے والے مجوسیوں سے جزیہ وصول کیا تھا۔ [سنن الدارقطني/ كتاب زكاة الفطر/حدیث: 2141]

ابومعاویہ بیان کرتے ہیں: میں سیدنا جزء بن معاویہ کا سیکرٹری تھا، ہمارے پاس سیدنا عمر بن خطاب رضی اللہ عنہ کا خط آیا (جس میں یہ تحریر تھا): ”سیدنا عبدالرحمن بن عوف رضی اللہ عنہ نے مجھے یہ بات بتائی ہے، نبی کریم صلی اللہ علیہ وسلم نے ہجر سے تعلق رکھنے والے مجوسیوں سے جزیہ وصول کیا تھا، اس لیے تم بھی اپنے علاقے کے مجوسیوں سے جزیہ وصول کرو۔“ اس روایت کا راوی حجاج مستند نہیں ہے۔ [سنن الدارقطني/ كتاب زكاة الفطر/حدیث: 2142]

بجالہ نامی راوی بیان کرتے ہیں: سیدنا عمر رضی اللہ عنہ پہلے مجوسیوں سے جزیہ وصول نہیں کرتے تھے، یہاں تک کہ سیدنا عبدالرحمن بن عوف رضی اللہ عنہ نے اس بات کی گواہی دی کہ نبی کریم صلی اللہ علیہ وسلم نے ان مجوسیوں سے جزیہ وصول کیا ہے۔ راوی بیان کرتے ہیں: سیدنا عبداللہ بن عباس رضی اللہ عنہما نے یہ بات بیان کی ہے: ایک مرتبہ میں نبی کریم صلی اللہ علیہ وسلم کے دروازے پر بیٹھا ہوا تھا، دو آدمی آپ صلی اللہ علیہ وسلم کی خدمت میں حاضر ہوئے، پھر وہ دونوں باہر نکل آئے، تو میں نے دریافت کیا: نبی کریم صلی اللہ علیہ وسلم نے دونوں کے بارے میں کیا فیصلہ دیا ہے؟ تو ان دونوں نے بتایا (یہ فیصلہ دیا ہے): ”یا ہم اسلام قبول کر لیں یا قتل ہو جائیں۔“ سیدنا عبداللہ بن عباس رضی اللہ عنہما بیان کرتے ہیں: تو لوگوں نے سیدنا عبدالرحمن بن عوف رضی اللہ عنہ کے بیان کو اختیار کر لیا اور میری روایت کو ترک کر دیا۔ [سنن الدارقطني/ كتاب زكاة الفطر/حدیث: 2143]

بجالہ تمیمی بیان کرتے ہیں: سیدنا عمر رضی اللہ عنہ مجوسیوں سے جزیہ وصول نہیں کرنا چاہتے تھے، یہاں تک کہ سیدنا عبدالرحمن بن عوف رضی اللہ عنہ نے اس بات کی گواہی دی کہ نبی کریم صلی اللہ علیہ وسلم نے ”ہجر“ سے تعلق رکھنے والے مجوسیوں سے جزیہ وصول کیا تھا۔ [سنن الدارقطني/ كتاب زكاة الفطر/حدیث: 2144]

سیدنا حذیفہ رضی اللہ عنہ بیان کرتے ہیں: اگر میں نے اپنے ساتھیوں کو مجوسیوں سے جزیہ وصول کرتے ہوئے نہ دیکھا ہوتا، تو میں ان سے اسے وصول نہ کرتا۔ پھر انہوں نے یہ آیت تلاوت کی: ”اور تم ان لوگوں کے ساتھ جنگ کرو جو اللہ تعالیٰ اور آخرت کے دن پر ایمان نہیں رکھتے ہیں اور جس چیز کو اللہ اور اس کے رسول نے حرام قرار دیا ہے، وہ اسے حرام نہیں سمجھتے ہیں۔“ یہ آیت آخر تک ہے: ”یہاں تک کہ وہ جزیہ ادا کریں، جبکہ وہ ذلیل ہوں۔“ [سنن الدارقطني/ كتاب زكاة الفطر/حدیث: 2145]