یہی روایت ایک اور سند کے ہمراہ منقول ہے، تاہم اس میں کچھ لفظی اختلاف ہے۔ [سنن الدارقطني/ كتاب الحج/حدیث: 2551]

معاویہ بن قرہ ایک انصاری بزرگ کے حوالے سے یہ بات نقل کرتے ہیں: ایک شخص حالت احرام میں اپنی سواری پر جا رہا تھا، وہ شترمرغ کے گھونسلے کے پاس پہنچا، اس نے وہاں سے انڈا لیا، جو اس کے ہاتھ سے گر گیا، تو سیدنا علی بن ابوطالب رضی اللہ عنہ نے اس کے بارے میں یہ فیصلہ دیا کہ وہ بنات مخاض خریدے گا، انہیں جفتی کے لیے دے گا، پھر وہ جو بچوں کو جنم دیں گی، وہ شخص ان بچوں کو بیت اللہ کے لیے ہدیہ کر دے گا، اور اگر ان اونٹنیوں نے کسی بچے کو جنم نہ دیا، تو بھی اس شخص کا کفارہ ادا ہو جائے گا، کیونکہ بعض اوقات کسی انڈے سے بچہ نکل آتا ہے اور بعض اوقات کسی انڈے سے بچہ نہیں نکلتا۔ راوی بیان کرتے ہیں: وہ شخص نبی کریم صلی اللہ علیہ وسلم کی خدمت میں حاضر ہوا اور آپ کو اس بارے میں بتایا، سیدنا علی بن ابوطالب رضی اللہ عنہ نے اسے فتویٰ دیا تھا، تو نبی کریم صلی اللہ علیہ وسلم نے ارشاد فرمایا: ”علی نے تو جو کہنا تھا، سو کہہ دیا، کیا تم کچھ رخصت حاصل کرنا چاہتے ہو؟“ اس نے عرض کی: ”جی ہاں۔“ نبی کریم صلی اللہ علیہ وسلم نے فرمایا: ”ہر ایک انڈے کے عوض ایک مسکین کو کھانا کھلانا یا ایک دن کا روزہ رکھنا (کفارہ) ہو گا۔“ [سنن الدارقطني/ كتاب الحج/حدیث: 2552]

یہی روایت ایک اور سند کے ہمراہ سیدنا علی بن ابوطالب رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔ [سنن الدارقطني/ كتاب الحج/حدیث: 2553]

یہی روایت ایک اور سند کے ہمراہ ایک انصاری صحابی سے منقول ہے۔ [سنن الدارقطني/ كتاب الحج/حدیث: 2554]

عبدالرحمن بن ابولیلیٰ، سیدنا علی رضی اللہ عنہ کے بارے میں یہ بات نقل کرتے ہیں: ایک مرتبہ ایک شخص نے اپنے اونٹ کے پاؤں کے نیچے شترمرغ کا گھونسلا دے دیا، وہ شخص حالت احرام میں تھا، وہ سیدنا علی رضی اللہ عنہ کے پاس آیا اور ان کے سامنے اس کی بات کا تذکرہ کیا، تو انہوں نے فرمایا: ایک انڈے کے عوض تمہیں ایک اونٹنی کو (جفتی کے لیے) دینا ہو گا یا ایک اونٹنی کے پیٹ میں موجود بچہ دینا ہو گا۔ وہ شخص نبی کریم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کے سامنے اس بات کا تذکرہ کیا، تو نبی کریم صلی اللہ علیہ وسلم نے ارشاد فرمایا: ”علی نے تو اس بارے میں جو کہنا تھا، وہ کہہ دیا ہے، لیکن تم رخصت کی طرف کیوں نہیں آتے؟ ہر ایک انڈے کے عوض تم پر ایک دن کا روزہ رکھنا لازم ہو گا یا ایک مسکین کو کھانا کھلانا ہو گا۔“ [سنن الدارقطني/ كتاب الحج/حدیث: 2555]

معاویہ بن قرہ بیان کرتے ہیں: ایک شخص نے اپنے اونٹ کے پاؤں کے نیچے شترمرغ کا گھونسلا توڑ دیا، اس نے سیدنا علی رضی اللہ عنہ سے اس بارے میں دریافت کیا، تو سیدنا علی رضی اللہ عنہ نے فرمایا: ہر ایک انڈے کے عوض تمہیں ایک اونٹنی کو جفتی کے لیے دینا ہو گا یا اونٹنی کے پیٹ میں موجود بچے کی ادائیگی کرنی ہو گی۔ وہ شخص نبی کریم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کو اس بارے میں بتایا، جو سیدنا علی رضی اللہ عنہ نے اس سے کہا تھا۔ آپ صلی اللہ علیہ وسلم نے ارشاد فرمایا: ”اس نے جو کہا، وہ تم نے سن لیا، تم رخصت کی طرف کیوں نہیں آتے؟ ایک انڈے کے عوض تمہیں ایک دن کا روزہ رکھنا ہو گا اور ایک مسکین کو کھانا کھلانا ہو گا۔“ [سنن الدارقطني/ كتاب الحج/حدیث: 2556]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”شترمرغ کے ایک انڈے کے عوض (کفارے میں) ایک دن روزہ رکھنا ہو گا یا ایک مسکین کو کھانا کھلانا ہو گا۔“ [سنن الدارقطني/ كتاب الحج/حدیث: 2557]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الحج/حدیث: 2558]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے انڈے کے بارے میں یہ فیصلہ دیا تھا، جسے کسی آدمی نے حالت احرام میں توڑ دیا تھا (نبی کریم صلی اللہ علیہ وسلم کا فیصلہ یہ تھا): ”ایک انڈے کے عوض ایک روزہ رکھنا ہو گا۔“ [سنن الدارقطني/ كتاب الحج/حدیث: 2559]

ام المؤمنین سیدہ عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نے فرمایا: ”شترمرغ کے اس انڈے کے فدیے میں، جو محرم آدمی توڑ دیتا ہے، ہر انڈے کے بدلے میں ایک دن کا روزہ رکھنا ہے۔“ ابوخالد نامی راوی بیان کرتے ہیں: اگر حالت احرام والا شخص شترمرغ کے انڈے کو توڑ دے، تو وہ ایک دن روزہ رکھے گا۔ [سنن الدارقطني/ كتاب الحج/حدیث: 2560]