سعید بن جبیر بیان کرتے ہیں: ایک شخص سیدنا عبداللہ بن عباس رضی اللہ عنہما کی خدمت میں حاضر ہوا اور بولا: ”میں نے اپنی بیوی کو ایک ہزار طلاقیں دے دی ہیں۔“ تو سیدنا ابن عباس رضی اللہ عنہما نے فرمایا: ”تین طلاقوں کی وجہ سے تمہاری بیوی تم پر حرام ہو گئی ہے، اور بقیہ طلاقیں تمہارے لیے گناہ بن گئی ہیں، کیونکہ تم نے اللہ کی آیات کا مذاق اڑایا ہے۔“ [سنن الدارقطني/ كتاب الطلاق والخلع والإيلاء وغيره/حدیث: 3928]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الطلاق والخلع والإيلاء وغيره/حدیث: 3929]

سیدنا معاذ بن جبل رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا: ”شادی سے پہلے طلاق نہیں دی جا سکتی اور آدمی جس چیز کا مالک نہ ہو، اس کے بارے میں نذر نہیں مان سکتا۔“ [سنن الدارقطني/ كتاب الطلاق والخلع والإيلاء وغيره/حدیث: 3930]

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”آدمی جس چیز کا مالک نہ ہو، اسے طلاق نہیں دے سکتا، آزاد نہیں کر سکتا، فروخت نہیں کر سکتا، اور اس کی نذر پوری نہیں کر سکتا (یعنی نذر نہیں مان سکتا)۔“ [سنن الدارقطني/ كتاب الطلاق والخلع والإيلاء وغيره/حدیث: 3931]

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”آدمی جو چیز کا مالک نہ ہو، اسے طلاق نہیں دے سکتا، جس کا مالک نہ ہو، اسے فروخت نہیں کر سکتا، جس کا مالک نہ ہو، اسے آزاد نہیں کر سکتا۔“ [سنن الدارقطني/ كتاب الطلاق والخلع والإيلاء وغيره/حدیث: 3932]

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”آدمی جس کا مالک نہ ہو، اسے آزاد کرنا یا طلاق دینا جائز نہیں ہے۔“ راوی نے اس میں فروخت کرنے کا ذکر نہیں کیا۔ [سنن الدارقطني/ كتاب الطلاق والخلع والإيلاء وغيره/حدیث: 3933]

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے ارشاد فرمایا: ”جو شخص ایسی طلاق دے، جس کا وہ مالک نہ ہو، تو وہ طلاق نہیں ہو گی، جو شخص اسے آزاد کرے، جس کا وہ مالک نہ ہو، تو وہ آزاد نہیں ہو گا، جو شخص اس چیز کے بارے میں نذر مانے، جس کا وہ مالک نہیں ہے، تو اس کی نذر (معتبر) نہیں ہو گی، اور جو شخص کسی گناہ کے بارے میں قسم اٹھائے، اس کی قسم کا اعتبار نہیں ہو گا، اور جو شخص قطع رحمی کے بارے میں قسم اٹھائے، اس کی قسم کا اعتبار نہیں ہو گا۔“ [سنن الدارقطني/ كتاب الطلاق والخلع والإيلاء وغيره/حدیث: 3934]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے سیدنا ابوسفیان بن حرب رضی اللہ عنہ کو بھیجا، انہیں یہ ہدایت کی: ”(یعنی حکم یہ ہے) آدمی اس وقت تک طلاق نہیں دے سکتا، جب تک شادی نہ کر لے اور اسے آزاد نہیں کر سکتا، جس کا وہ مالک نہیں ہے۔“ [سنن الدارقطني/ كتاب الطلاق والخلع والإيلاء وغيره/حدیث: 3935]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے ابوسفیان کو یمن کے شہر نجران بھیجا، تاکہ وہ وہاں نماز پڑھائیں، جنگ کریں، صدقات وصول کریں، نبی کریم صلی اللہ علیہ وسلم نے ان کے ساتھ راشد بن عبداللہ کو بھی بھیجا، نبی کریم صلی اللہ علیہ وسلم جب ان کا ذکر کرتے تھے، یہ فرماتے تھے: ”راشد، پورے سلیم قبیلہ سے بہتر ہے اور ابوسفیان پورے عرینہ قبیلے سے بہتر ہے۔“ نبی کریم صلی اللہ علیہ وسلم نے ابوسفیان کو جو تلقین کی تھی، اس میں انہیں اللہ کا تقویٰ اختیار کرنے کی تلقین کی اور یہ ہدایت کی: ”کوئی شخص اسے طلاق نہیں دے سکتا، جس کے ساتھ اس کا نکاح نہ ہوا ہو، اور کوئی شخص اسے آزاد نہیں کر سکتا، جس کا وہ مالک نہ ہو، اور اللہ کی نافرمانی کے بارے میں نذر کی کوئی حیثیت نہیں ہے۔“ [سنن الدارقطني/ كتاب الطلاق والخلع والإيلاء وغيره/حدیث: 3936]

سیدنا عبداللہ بن عمر رضی اللہ عنہما نبی کریم صلی اللہ علیہ وسلم کے بارے میں نقل کرتے ہیں: آپ سے ایسے شخص کے بارے میں دریافت کیا گیا، جو یہ کہتا ہے: ”جس دن فلاں عورت کے ساتھ شادی کروں گا، اسے طلاق ہے۔“ نبی کریم صلی اللہ علیہ وسلم نے فرمایا: ”اس نے وہ طلاق دی ہے، جس کا وہ مالک نہیں ہے۔“ [سنن الدارقطني/ كتاب الطلاق والخلع والإيلاء وغيره/حدیث: 3937]