سیدنا عبداللہ بن عباس رضی اللہ عنہما سے مروی ہے کہ ایک مردار بکری کے پاس سے رسول اللہ صلی اللہ علیہ وسلم کا گزر ہوا، آپ صلی اللہ علیہ وسلم نے فرمایا: ”تم نے اس کے چمڑے سے فائدہ کیوں نہیں اٹھایا۔“ انہوں نے کہا: ”اے اللہ کے رسول! بیشک یہ تو مردار ہے،“ آپ صلی اللہ علیہ وسلم نے فرمایا: ”صرف اس کا کھانا حرام ہے۔“ [الفتح الربانی/كتاب الطهارة/حدیث: 423]

زوجہ رسول سیدہ میمونہ رضی اللہ عنہا کہتی ہیں کہ قریش کے چند مردوں سے رسول اللہ صلی اللہ علیہ وسلم کا گزر ہوا، وہ ایک بکری کو گدھے کی طرح گھسیٹ کر لے جا رہے تھے، آپ صلی اللہ علیہ وسلم نے ان سے فرمایا: ”کاش تم اس کا چمڑا اتار لیتے۔“ انہوں نے کہا: ”یہ تو مردار ہے،“ آپ صلی اللہ علیہ وسلم نے فرمایا: ”پانی اور قرظ اس کو پاک کر دیں گے۔“ [الفتح الربانی/كتاب الطهارة/حدیث: 424]

سیدنا عبداللہ بن عباس رضی اللہ عنہما سے مروی ہے، وہ کہتے ہیں: سیدہ سودہ بنت زمعہ رضی اللہ عنہا کی بکری مر گئی، انہوں نے کہا: ”اے اللہ کے رسول! فلاں بکری مر گئی ہے۔“ آپ صلی اللہ علیہ وسلم نے فرمایا: ”تم نے اس کا چمڑا کیوں نہیں اتار لیا۔“ انہوں نے کہا: ”ہم مر جانے والی بکری کا چمڑا کیسے اتار لیں؟“ رسول اللہ صلی اللہ علیہ وسلم نے فرمایا: ”اللہ تعالیٰ نے فرمایا: «قُلْ لَآ اَجِدُ فِیْ مَآ اُوْحِیَ اِلَیَّ مُحَرَّمًا عَلٰی طَاعِمٍ یَّطْعَمُہٗٓ اِلَّآ اَنْ یَّکُوْنَ مَیْتَۃً اَوْ دَمًا مَّسْفُوْحًا اَوْ لَحْمَ خِنْزِیْرٍ» (آپ کہہ دیجئے کہ جو کچھ احکام بذریعہ وحی میرے پاس آئے اس میں کوئی حرام نہیں پاتا کسی کھانے والے کے لیے جو اس کو کھائے، مگر یہ کہ وہ مردار ہو یا بہتا ہوا خون ہو یا خنزیر کا گوشت ہو۔) (الانعام: 145) پس بیشک تم نے اس کے چمڑے کو کھانا تو نہیں ہے، اگر تم اس کو رنگ لو تو اس سے فائدہ اٹھا سکتے ہو۔“ پس انہوں نے کسی بندے کو بھیج کر (اس بکری کو منگوا لیا) اور اس کی کھال اتار لی اور اس کو رنگ کر اس کا مشکیزہ بنا لیا، (پھر وہ اس کو استعمال کرتی رہیں) یہاں تک کہ وہ ان کے پاس ہی پھٹ گیا تھا۔ [الفتح الربانی/كتاب الطهارة/حدیث: 425]

ثابت بن اسلم بنانی رحمہ اللہ کہتے ہیں: میں عبدالرحمن بن ابو لیلی رحمہ اللہ کے ساتھ مسجد میں بیٹھا ہوا تھا، پس ایک موٹا سا آدمی آیا اور اس نے کہا: ”اے ابو عیسی (عبدالرحمن)!“ انہوں نے کہا: ”جی ہاں،“ اس نے کہا: ”تم نے فراء کے بارے جو کچھ سنا ہے، وہ بیان کرو،“ پس انہوں نے کہا: ”میں نے اپنے باپ سے سنا، انہوں نے کہا: میں رسول اللہ صلی اللہ علیہ وسلم کے پاس بیٹھا ہوا تھا کہ ایک آدمی آیا اور اس نے کہا: اے اللہ کے رسول! کیا میں فراء میں نماز پڑھ سکتا ہوں؟“ آپ صلی اللہ علیہ وسلم نے فرمایا: ”تو پھر رنگنے کا کیا فائدہ ہوا؟“ جب وہ چلا گیا تو میں (ثابت) نے کہا: ”یہ آدمی کون تھا؟“ عبدالرحمن نے کہا: ”یہ سوید بن غفلہ رضی اللہ عنہ تھے۔“ [الفتح الربانی/كتاب الطهارة/حدیث: 426]

سیدنا عبداللہ بن عکیم جہنی رضی اللہ عنہ سے مروی ہے، وہ کہتے ہیں: ہمارے پاس جہینہ کی سرزمین میں نبی کریم صلی اللہ علیہ وسلم کا خط آیا، جبکہ میں اس وقت نوجوان لڑکا تھا، (اس خط میں لکھا ہوا تھا:) ”تم مردار کے چمڑے اور پٹھے سے فائدہ نہ اٹھاؤ۔“ [الفتح الربانی/كتاب الطهارة/حدیث: 427]

(دوسری سند) سیدنا عبداللہ بن عکیم جہنی رضی اللہ عنہ کہتے ہیں: رسول اللہ صلی اللہ علیہ وسلم نے اپنی وفات سے ایک ماہ قبل ہماری طرف یہ حکم لکھا کہ ”تم مردار کے چمڑے اور پٹھے سے فائدہ نہ اٹھاؤ۔“ [الفتح الربانی/كتاب الطهارة/حدیث: 428]

(تیسری سند) سیدنا عبداللہ بن عکیم جہنی رضی اللہ عنہ کہتے ہیں: ہمارے پاس جہینہ کی سرزمین میں رسول اللہ صلی اللہ علیہ وسلم کا ایک خط آیا، جبکہ میں اس وقت نوجوان لڑکا تھا، یہ آپ صلی اللہ علیہ وسلم کی وفات سے ایک یا دو ماہ پہلے کی بات تھی، اس میں لکھا تھا: ”تم مردار کے چمڑے اور پٹھے سے فائدہ حاصل نہ کرو۔“ [الفتح الربانی/كتاب الطهارة/حدیث: 429]

سیدنا عبداللہ بن عکیم جہنی رضی اللہ عنہ کہتے ہیں: رسول اللہ صلی اللہ علیہ وسلم نے ہماری طرف یہ خط لکھا کہ ”تم مردار کے چمڑے سے استفادہ نہ کرو اور نہ اس کے پٹھے سے۔“ [الفتح الربانی/كتاب الطهارة/حدیث: 430]

سیدنا عبداللہ بن عکیم جہنی رضی اللہ عنہ کہتے ہیں: ہم پر رسول اللہ صلی اللہ علیہ وسلم کا یہ خط پڑھا گیا کہ ”تم مردار کے چمڑے اور پٹھے سے فائدہ نہ اٹھاؤ۔“ [الفتح الربانی/كتاب الطهارة/حدیث: 431]

سیدنا ابو ثعلبہ رضی اللہ عنہ سے مروی ہے، وہ کہتے ہیں: میں نے کہا: ”اے اللہ کے رسول! ہم سفر کرنے والے لوگ ہیں اور یہودیوں، عیسائیوں اور مجوسیوں کے پاس سے ہمارا گزر ہوتا رہتا ہے اور ہمیں صرف ان کے ہی برتن مل سکتے ہیں؟“ آپ صلی اللہ علیہ وسلم نے فرمایا: ”پس اگر تمہیں دوسرے برتن نہ مل سکیں تو ان کو پانی کے ساتھ دھو کر ان میں کھا پی لیا کرو۔“ [الفتح الربانی/كتاب الطهارة/حدیث: 432]