ابو نضرہ رحمہ اللہ بیان کرتے ہیں کہ ہم حضرت جابر بن عبداللہ رضی اللہ عنہ کی خدمت میں حاضر تھے، چنانچہ انہوں نے فرمایا: قریب ہے کہ اہل عراق کے پاس نہ «قَفِيز» ”قفیز“ لایا جائے اور نہ کوئی درہم۔ ہم نے پوچھا: یہ کس بنا پر ہوگا اور کن کی طرف سے ہوگا؟ کہنے لگے: عجمیوں کی طرف سے، وہ ان چیزوں کو روک لیں گے۔ پھر کہنے لگے: ہو سکتا ہے اہل شام کے پاس «دِينَار» ”دینار“ اور «مُدْي» ”مدی“ نہ لایا جائے۔ ہم نے کہا: یہ کیوں ہوگا؟ کہنے لگے: رومیوں کی طرف سے۔ پھر وہ تھوڑی دیر چپ رہے، پھر کہنے لگے کہ رسول اللہ صلی اللہ علیہ وسلم نے فرمایا: ”میری امت کے آخری لوگوں میں ایک خلیفہ ہوگا جو لپ بھر بھر کر مال دے گا، اس کو گنے یا شمار نہیں کرے گا۔“ راوی کہتے ہیں: میں نے ابو نضرہ اور ابو العلاء رحمہما اللہ سے پوچھا: کیا تمہاری رائے میں یہ حضرت عمر بن عبدالعزیز رحمہ اللہ ہیں؟ انہوں نے کہا: نہیں۔ [صحيح مسلم/كتاب الفتن وأشراط الساعة/حدیث: 7315]

امام صاحب رحمہ اللہ ایک اور استاد سے اس کے ہم معنی روایت کرتے ہیں۔ [صحيح مسلم/كتاب الفتن وأشراط الساعة/حدیث: 7316]

حضرت ابو سعید رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تمہارے خلیفوں میں ایک خلیفہ ہوگا جو مال خوب لپ بھر بھر کر دے گا، اسے بالکل شمار نہیں کرے گا۔“ ابن حجر کی روایت میں «يَحْثُو» کی بجائے «يَحْثِي» کے الفاظ ہیں (دونوں کا معنی ایک ہے)۔ [صحيح مسلم/كتاب الفتن وأشراط الساعة/حدیث: 7317]

حضرت ابو سعید اور حضرت جابر بن عبداللہ رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”آخری زمانہ میں ایک خلیفہ مال تقسیم کرے گا اور اسے شمار نہیں کرے گا۔“ [صحيح مسلم/كتاب الفتن وأشراط الساعة/حدیث: 7318]

امام صاحب ایک اور استاد سے حضرت ابو سعید رضی اللہ عنہ کی مذکورہ بالا روایت بیان کرتے ہیں۔ [صحيح مسلم/كتاب الفتن وأشراط الساعة/حدیث: 7319]

حضرت ابو سعید خدری رضی اللہ عنہ بیان کرتے ہیں کہ مجھے مجھ سے بہتر شخص نے بتایا کہ رسول اللہ صلی اللہ علیہ وسلم نے حضرت عمار رضی اللہ عنہ سے، جب وہ خندق کھود رہے تھے، فرمایا اور آپ صلی اللہ علیہ وسلم ان کے سر پر ہاتھ پھیرتے ہوئے فرما رہے تھے: ”ہائے سمیہ کے بیٹے کی مصیبت، تجھے باغی جماعت قتل کرے گی۔“ [صحيح مسلم/كتاب الفتن وأشراط الساعة/حدیث: 7320]

امام صاحب اپنے مختلف اساتذہ کی دو سندوں سے بیان کرتے ہیں، نضر کی حدیث میں ہے: ”مجھے مجھ سے بہتر شخص حضرت ابو قتادہ رضی اللہ عنہ نے بتایا۔“ اور خالد بن حارث کی حدیث میں ہے، حضرت ابو سعید رضی اللہ عنہ نے کہا: میرا خیال ہے وہ حضرت ابو قتادہ رضی اللہ عنہ ہیں، اور خالد کی حدیث میں یہ بھی ہے کہ نبی کریم صلی اللہ علیہ وسلم فرما رہے تھے: «وَيْسَ» یا «وَيْسَ ابْنَ سُمَيَّةَ» ”اے حسرت و افسوس ابنِ سمیہ پر“، یعنی اے حسرت و افسوس، یہ لفظ «صَرِيح» کی جگہ آتا ہے۔ [صحيح مسلم/كتاب الفتن وأشراط الساعة/حدیث: 7321]

امام صاحب اپنے مختلف اساتذہ سے حضرت ام سلمہ رضی اللہ عنہا کی روایت بیان کرتے ہیں کہ رسول اللہ صلی اللہ علیہ وسلم نے عمار رضی اللہ عنہ سے فرمایا: ”تمہیں باغی جماعت قتل کرے گی۔“ [صحيح مسلم/كتاب الفتن وأشراط الساعة/حدیث: 7322]

امام صاحب ایک اور استاد سے مذکورہ بالا روایت بیان کرتے ہیں۔ [صحيح مسلم/كتاب الفتن وأشراط الساعة/حدیث: 7323]

حضرت اُم سلمہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”عمار رضی اللہ عنہ کو ایک باغی جماعت قتل کرے گی۔“ [صحيح مسلم/كتاب الفتن وأشراط الساعة/حدیث: 7324]