عکرمہ رحمہ اللہ نے فرمایا: اللہ عزوجل کے اس فرمان ﴿يَا أَيُّهَا الَّذِينَ آمَنُوا إِنَّمَا الْمُشْرِكُونَ نَجَسٌ فَلَا يَقْرَبُوا الْمَسْجِدَ الْحَرَامَ بَعْدَ عَامِهِمْ هَٰذَا وَإِنْ خِفْتُمْ عَيْلَةً فَسَوْفَ يُغْنِيكُمُ اللَّهُ مِنْ فَضْلِهِ إِنْ شَاءَ﴾ کے بارے میں کہا: مشرکین بیت اللہ میں آتے تھے اور اپنے ساتھ کھانے پینے کا سامان بھی لاتے تھے، تو اللہ عزوجل نے یہ آیت نازل فرمائی کہ «وَإِنْ خِفْتُمْ عَيْلَةً فَسَوْفَ يُغْنِيكُمُ اللَّهُ مِنْ فَضْلِهِ إِنْ شَاءَ»، پھر اللہ عزوجل نے ان پر بارش نازل کی، جس سے ان کا مال و دولت بڑھ گیا یہاں تک کہ مشرکین ان سے بےنیاز ہو کر چلے گئے۔ [سنن سعید بن منصور/كتاب التفسير/حدیث: 1011]

سیدنا حذیفہ رضی اللہ عنہ نے فرمایا: کیا تم نے اللہ عزوجل کے اس فرمان ﴿اتَّخَذُوا أَحْبَارَهُمْ وَرُهْبَانَهُمْ أَرْبَابًا مِنْ دُونِ اللَّهِ﴾ کو دیکھا ہے؟ پھر سیدنا حذیفہ رضی اللہ عنہ نے فرمایا: انہوں نے اپنے علماء اور درویشوں کے لیے سجدہ نہیں کیا تھا، لیکن وہ جو چیز ان کے لیے حلال کر دیتے اسے وہ حلال کر لیتے اور جس چیز کو ان پر حرام کرتے اسے وہ حرام مان لیتے، بس یہی ان کی ربوبیت تھی۔ [سنن سعید بن منصور/كتاب التفسير/حدیث: 1012]

سیدنا جابر بن عبد اللہ رضی اللہ عنہما نے اللہ عزوجل کے اس فرمان ﴿لِيُظْهِرَهُ عَلَى الدِّينِ كُلِّهِ﴾ کے بارے میں فرمایا: اس سے مراد سیدنا عیسیٰ بن مریم علیہما السلام کا خروج ہے۔ [سنن سعید بن منصور/كتاب التفسير/حدیث: 1013]

سیدنا ابن عباس رضی اللہ عنہما نے اللہ عزوجل کے اس فرمان ﴿مِنْهَا أَرْبَعَةٌ حُرُمٌ﴾ کے بارے میں فرمایا: ان سے مراد محرم، رجب، ذو القعدہ اور ذو الحجہ کے مہینے ہیں۔ [سنن سعید بن منصور/كتاب التفسير/حدیث: 1014]

ابو وائل رحمہ اللہ نے اللہ عزوجل کے اس فرمان ﴿إِنَّمَا النَّسِيءُ زِيَادَةٌ فِي الْكُفْرِ﴾ کے بارے میں فرمایا: ناسی قبیلہ کنانہ کا ایک شخص تھا، جو اپنی قوم میں بہت رائے رکھنے والا تھا، وہ ایک سال محرم کو صفر قرار دے کر اس میں جنگ کرتا اور مال غنیمت حاصل کرتا، اور دوسرے سال محرم کو حرمت والا مہینہ قرار دیتا اور اس میں جنگ نہ کرتا، اور یہی اللہ عزوجل کا فرمان ہے «يُحِلُّونَهُ عَامًا وَيُحَرِّمُونَهُ عَامًا» ۔ [سنن سعید بن منصور/كتاب التفسير/حدیث: 1015]

ابو مالک رحمہ اللہ نے فرمایا: سب سے پہلا حصہ جو سورہ توبہ سے نازل ہوا وہ یہ آیت ہے «انْفِرُوا خِفَافًا وَثِقَالًا» یہاں تک کہ فرمایا «إِنْ كُنْتُمْ تَعْلَمُونَ» ۔ [سنن سعید بن منصور/كتاب التفسير/حدیث: 1016]

عمرو بن میمون الاودی رحمہ اللہ نے کہا: دو چیزیں ایسی ہیں جو رسول اللہ صلی اللہ علیہ وسلم نے کیں حالانکہ ان کا حکم نہیں ہوا تھا؛ منافقین کو اجازت دینا اور قیدیوں کو لینا، یہاں تک کہ اللہ عزوجل نے یہ آیت نازل فرمائی: ﴿عَفَا اللَّهُ عَنْكَ لِمَ أَذِنْتَ لَهُمْ﴾، اور ﴿مَا كَانَ لِنَبِيٍّ أَنْ يَكُونَ لَهُ أَسْرَىٰ﴾ ۔ [سنن سعید بن منصور/كتاب التفسير/حدیث: 1017]

عون رحمہ اللہ نے کہا: اللہ عزوجل نے رسول اللہ صلی اللہ علیہ وسلم کو معاف کر دیا قبل اس کے کہ ان کو گناہ سے آگاہ کرتا۔ [سنن سعید بن منصور/كتاب التفسير/حدیث: 1018]

حمید رحمہ اللہ «أَسْرَى» پڑھتے تھے۔ [سنن سعید بن منصور/كتاب التفسير/حدیث: 1019]

مجاہد رحمہ اللہ نے «وَفِيكُمْ سَمَّاعُونَ لَهُمْ» کی تفسیر میں کہا: یہ ایسے لوگ تھے جو ان کے لیے جاسوسی کرتے تھے لیکن خود منافق نہ تھے، ان میں عبد اللہ بن ابی رفاعہ اور ابن تابوت شامل تھے۔ [سنن سعید بن منصور/كتاب التفسير/حدیث: 1020]