ابو مالک رحمہ اللہ نے اللہ عزوجل کے اس فرمان ﴿وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ﴾ کے بارے میں فرمایا کہ یہ آیت مسلمانوں کے بارے میں ہے، اور اللہ عزوجل کے فرمان ﴿وَمَا لَهُمْ أَلَّا يُعَذِّبَهُمُ اللَّهُ﴾ کے بارے میں فرمایا کہ یہ آیت مشرکین کے بارے میں ہے۔ [سنن سعید بن منصور/كتاب التفسير/حدیث: 991]

سیدنا عبد الرحمن بن یزید رحمہ اللہ نے فرمایا: ہمیں سیدنا عبد اللہ بن مسعود رضی اللہ عنہ نے عشاء کی آخری نماز میں امامت کروائی، پس انہوں نے سورہ الانفال سے تلاوت شروع کی اور جب «نِعْمَ الْمَوْلَىٰ وَنِعْمَ النَّصِيرُ» پر پہنچے تو رکوع کیا، پھر دوسری رکعت میں کھڑے ہو کر ایک اور سورہ پڑھی۔ [سنن سعید بن منصور/كتاب التفسير/حدیث: 992]

ابراہیم رحمہ اللہ نے فرمایا: اللہ عزوجل کے اس فرمان ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ وَلِلرَّسُولِ﴾ کے بارے میں کہا کہ خمس کو پانچ حصوں میں تقسیم کیا جاتا ہے، پس اللہ عزوجل اور رسول صلی اللہ علیہ وسلم کا حصہ ایک ہے، اور باقی دوسرے مستحقین میں تقسیم ہوتا ہے۔ [سنن سعید بن منصور/كتاب التفسير/حدیث: 993]

موسیٰ بن ابی عائشہ رحمہ اللہ نے کہا: میں نے یحییٰ بن الجزار رحمہ اللہ سے رسول اللہ صلی اللہ علیہ وسلم کے خمس میں سے حصے کے بارے میں پوچھا، تو انہوں نے کہا: خمس کا پانچواں حصہ۔ [سنن سعید بن منصور/كتاب التفسير/حدیث: 994]

سیدنا عبد اللہ بن مسعود رضی اللہ عنہ نے فرمایا: اللہ عزوجل کے اس فرمان ﴿يَوْمَ الْفُرْقَانِ يَوْمَ الْتَقَى الْجَمْعَانِ﴾ کے بارے میں کہا کہ بدر کی رات رمضان کے مہینے کی سترہویں رات تھی۔ [سنن سعید بن منصور/كتاب التفسير/حدیث: 995]

سیدنا عبد اللہ بن مسعود رضی اللہ عنہ نے فرمایا: شبِ قدر کو رمضان کی سترہویں رات میں تلاش کرو، جو بدر کے دن یعنی ﴿يَوْمَ الْفُرْقَانِ يَوْمَ الْتَقَى الْجَمْعَانِ﴾ کی صبح تھی، اور اکیسویں رات میں، اور تئیسویں رات میں، کیونکہ شبِ قدر صرف طاق راتوں میں ہوتی ہے۔ [سنن سعید بن منصور/كتاب التفسير/حدیث: 996]

مجاہد رحمہ اللہ نے مجھ سے کہا: کیا تم جانتے ہو اللہ عزوجل کا یہ فرمان ﴿يَضْرِبُونَ وُجُوهَهُمْ وَأَدْبَارَهُمْ﴾ کس بارے میں ہے؟ میں نے کہا: نہیں، تو انہوں نے فرمایا: اس سے مراد ان کے چہرے اور ان کے پیچھے کا حصہ یعنی ان کی شرمگاہیں ہیں، لیکن اللہ عزوجل صاحبِ کرم ہے، اس نے اسے کنایہ کے انداز میں بیان فرمایا۔ [سنن سعید بن منصور/كتاب التفسير/حدیث: 997]

سعید بن جبیر رحمہ اللہ نے اللہ عزوجل کے اس فرمان ﴿إِنَّ شَرَّ الدَّوَابِّ عِنْدَ اللَّهِ الَّذِينَ كَفَرُوا فَهُمْ لَا يُؤْمِنُونَ﴾ کے بارے میں فرمایا: اس سے مراد یہود کے چھ آدمی ہیں، ایوب رحمہ اللہ نے کہا: انہوں نے ان کے نام بھی لیے، ان میں سے ایک ابن تابوت تھا۔ [سنن سعید بن منصور/كتاب التفسير/حدیث: 998]

سیدنا عقبہ بن عامر رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: «وَأَعِدُّوا لَهُمْ مَا اسْتَطَعْتُمْ مِنْ قُوَّةٍ»، سنو! قوت تیر اندازی ہے، سنو! قوت تیر اندازی ہے، سنو! قوت تیر اندازی ہے، آپ صلی اللہ علیہ وسلم نے تین مرتبہ فرمایا۔ [سنن سعید بن منصور/كتاب التفسير/حدیث: 999]

سیدنا ابن عباس رضی اللہ عنہما نے فرمایا: اللہ عزوجل نے فرمایا ﴿يَا أَيُّهَا النَّبِيُّ حَرِّضِ الْمُؤْمِنِينَ عَلَى الْقِتَالِ إِنْ يَكُنْ مِنْكُمْ عِشْرُونَ صَابِرُونَ يَغْلِبُوا مِائَتَيْنِ﴾، اس میں یہ حکم لکھ دیا گیا تھا کہ بیس مسلمان دو سو سے پیٹھ نہ پھیرنے پائیں، پھر اللہ عزوجل نے تخفیف فرما دی اور فرمایا: ﴿الْآنَ خَفَّفَ اللَّهُ عَنْكُمْ وَعَلِمَ أَنَّ فِيكُمْ ضَعْفًا﴾، اب ایک سو مسلمانوں کے لیے یہ مناسب نہیں کہ وہ دو سو سے بھاگیں۔ [سنن سعید بن منصور/كتاب التفسير/حدیث: 1000]