عطاء رحمہ اللہ، طاؤس رحمہ اللہ اور مجاہد رحمہ اللہ نے فرمایا: قرآن (یا فرمایا: مصحف) کو صرف وہی ہاتھ لگائے جو طاہر ہو۔ [سنن سعید بن منصور/كتاب التفسير/حدیث: 101]

مسلم اعور رحمہ اللہ بیان کرتے ہیں کہ ایک شخص جس کا نام عبدالرحمن تھا، اس نے مجاہد رحمہ اللہ کے لیے مصحف لکھا، تو اس نے اسے پانچ سو درہم دیے۔ [سنن سعید بن منصور/كتاب التفسير/حدیث: 102]

عبداللہ بن معقل رحمہ اللہ بیان کرتے ہیں کہ عبیداللہ بن زیاد نے کسی کو ان کے پاس بھیجا کہ وہ رمضان المبارک میں لوگوں کو نماز پڑھائیں، تو انہوں نے امامت کی۔ عبیداللہ بن زیاد نے انہیں ایک حلہ اور پانچ سو درہم بھیجے، تو انہوں نے کہا: میں قرآن پر کوئی اجر نہیں لوں گا۔ [سنن سعید بن منصور/كتاب التفسير/حدیث: 103]

عبداللہ بن شقیق رحمہ اللہ بیان کرتے ہیں کہ رسول اللہ صلی اللہ علیہ وسلم کے صحابہ قرآن کے نسخے بیچنے اور بچوں کو اجرت پر تعلیم دینے کو ناپسند کرتے تھے اور اسے بڑا معاملہ سمجھتے تھے۔ [سنن سعید بن منصور/كتاب التفسير/حدیث: 104]

مغیرہ رحمہ اللہ کہتے ہیں کہ ابراہیم رحمہ اللہ نے اجرت پر پڑھانے والے معلم کے شرط لگانے کو ناپسند کیا۔ (یعنی کہ پڑھانے والا کوئی اپنی شرط عائد کرے) [سنن سعید بن منصور/كتاب التفسير/حدیث: 105]

عطاء رحمہ اللہ یا خالد نے ابو قلابہ رحمہ اللہ سے روایت کیا کہ وہ دونوں اجرت لینے میں کوئی حرج نہیں سمجھتے تھے۔ [سنن سعید بن منصور/كتاب التفسير/حدیث: 106]

حسن بصری رحمہ اللہ نے فرمایا: جب معلم (استاد) مقررہ اجرت طے کرے اور انصاف نہ کرے تو وہ ظالموں میں لکھا جاتا ہے۔ [سنن سعید بن منصور/كتاب التفسير/حدیث: 107]

عمیر بن ہانی رحمہ اللہ سے روایت ہے کہ ایک شخص دوسرے کو قرآن پڑھا رہا تھا، پھر وہ شخص حج پر گیا اور جس نے اسے پڑھایا تھا اسے کمان ہدیہ میں دی۔ وہ سیدنا عوف بن مالک رضی اللہ عنہ کے پاس آیا اور انہیں بتایا تو انہوں نے کہا: اسے واپس کر دو۔ اس نے کہا: میں اس کے ذریعے جہاد کرنا چاہتا ہوں۔ سیدنا عوف رضی اللہ عنہ نے کہا: اسے واپس کر دو۔ اس نے کہا: میں اس کے ذریعے جہاد کرنا چاہتا ہوں۔ سیدنا عوف رضی اللہ عنہ نے فرمایا: کیا تم جہنم کی کمان کو اپنے ساتھ لٹکانا چاہتے ہو؟ چنانچہ اس شخص نے وہ کمان اس کے مالک کو واپس کر دی۔ [سنن سعید بن منصور/كتاب التفسير/حدیث: 108]

سیدنا طفیل بن عمرو رضی اللہ عنہ نے فرمایا: مجھے سیدنا ابی بن کعب رضی اللہ عنہ نے قرآن پڑھایا، تو میں نے انہیں ایک کمان ہدیہ دی، پھر وہ صبح کے وقت سیدنا رسول اللہ صلی اللہ علیہ وسلم کے پاس آئے جبکہ وہ اس کمان کو پہنے ہوئے تھے، رسول اللہ صلی اللہ علیہ وسلم نے پوچھا: ”یہ ہتھیار تمہیں کس نے دیا؟“ سیدنا ابی بن کعب رضی اللہ عنہ نے عرض کیا: ”طفیل بن عمرو رضی اللہ عنہ نے، میں نے انہیں قرآن پڑھایا تھا۔“ اس پر رسول اللہ صلی اللہ علیہ وسلم نے فرمایا: ”تم نے جہنم کی آگ کا ایک ٹکڑا اپنے گلے میں لٹکا لیا ہے۔“ صحابہ رضی اللہ عنہم نے عرض کیا: ”یا رسول اللہ صلی اللہ علیہ وسلم ! ہم ان کا کھانا بھی تو کھاتے ہیں؟“ آپ صلی اللہ علیہ وسلم نے فرمایا: ”اگر کوئی کھانا دوسروں کے لیے تیار کیا گیا اور تم وہاں موجود ہو تو اسے کھانے میں کوئی حرج نہیں، لیکن اگر وہ خاص تمہارے لیے بنایا گیا ہے تو تم اسے صرف اپنے عمل (اجر) کے بدلے کھا رہے ہو۔“ [سنن سعید بن منصور/كتاب التفسير/حدیث: 109]

ابو الضحی رحمہ اللہ نے فرمایا: میں نے تین افراد سے پوچھا (سیدنا عبداللہ بن یزید رضی اللہ عنہ، مسروق رحمہ اللہ اور شریح رحمہ اللہ) مصاحف کی خرید و فروخت کے بارے میں، تو انہوں نے کہا: ”اللہ عزوجل کی کتاب کے بدلے کوئی قیمت نہ لو۔“ [سنن سعید بن منصور/كتاب التفسير/حدیث: 110]