حسن رحمہ اللہ کہتے ہیں کہ آدمی جس طرف بھی رخ ہو، ایک رکعت ادا کرے اور اشارے سے رکوع و سجدہ کرے۔ [سنن سعید بن منصور/كتاب التفسير/حدیث: 411]

ضحاک رحمہ اللہ کہتے ہیں کہ اگر جنگ کی حالت ہو، یا دشمن کا تعاقب کر رہا ہو، یا درندہ اس کا پیچھا کر رہا ہو، تو جہاں بھی رخ ہو، ایک ایک رکعت ادا کرے اور اشارے سے رکوع و سجدہ کرے، اور اگر یہ بھی ممکن نہ ہو تو ایک یا دو تکبیریں کہہ لے۔ [سنن سعید بن منصور/كتاب التفسير/حدیث: 412]

شعیب بن دینار رحمہ اللہ کہتے ہیں کہ میں نے عبدالوہاب بن بخت المکی رحمہ اللہ کو یہ کہتے سنا: جب جنگ کی شدت ہو، تو اگر ممکن ہو تو کھڑے ہو کر نماز پڑھیں، ورنہ سوار ہو کر، اور اگر یہ بھی ممکن نہ ہو تو تکبیر کہہ لیں، اور اگر یہ بھی نہ کر سکیں تو کم از کم اپنے دل میں نماز کا ذکر کرتے رہیں۔ [سنن سعید بن منصور/كتاب التفسير/حدیث: 413]

اوزاعی رحمہ اللہ کہتے ہیں کہ مجھے سابق بربری رحمہ اللہ نے بتایا کہ مکحول رحمہ اللہ نے حسن بصری رحمہ اللہ کو دابق میں ہمارے پاس ایک خط لکھا، جس میں ایسے لوگوں کے بارے میں پوچھا گیا جو دشمن کے تعاقب میں ہوں، تو ان کا جواب آیا: اگر وہ تعاقب میں نہ ہوں تو زمین پر نماز پڑھیں، اور اگر وہ تعاقب میں ہوں تو اپنی سواریوں پر نماز پڑھیں۔ [سنن سعید بن منصور/كتاب التفسير/حدیث: 414]

ضحاک رحمہ اللہ فرماتے ہیں کہ پہلے جب کوئی شخص وفات پا جاتا تو اس کی بیوی پر ایک سال تک خرچ کیا جاتا، پھر ورثاء اپنا ترکہ تقسیم کرتے، پھر یہ آیت نازل ہوئی: ﴿وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجًا وَصِيَّةً لِأَزْوَاجِهِمْ مَتَاعًا إِلَى الْحَوْلِ غَيْرَ إِخْرَاجٍ﴾، پھر یہ حکم منسوخ کر دیا گیا اور یہ آیت نازل ہوئی: ﴿وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجًا يَتَرَبَّصْنَ بِأَنْفُسِهِنَّ أَرْبَعَةَ أَشْهُرٍ وَعَشْرًا﴾، پھر اس چار مہینے دس دن کے حکم میں یہ آیت نازل ہوئی: ﴿وَأُولَاتُ الْأَحْمَالِ أَجَلُهُنَّ أَنْ يَضَعْنَ حَمْلَهُنَّ﴾، یعنی اگر وہ اس سے پہلے بچہ جن لیں تو ان کی عدت مکمل ہو جائے گی۔ [سنن سعید بن منصور/كتاب التفسير/حدیث: 415]

سیدنا عبداللہ بن عباس رضی اللہ عنہما نے یہ آیت تلاوت کی: ﴿وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجًا وَصِيَّةً لِأَزْوَاجِهِمْ مَتَاعًا إِلَى الْحَوْلِ﴾، پھر فرمایا: یہ حکم منسوخ ہو چکا ہے۔ [سنن سعید بن منصور/كتاب التفسير/حدیث: 416]

سیدنا عبداللہ بن مسعود رضی اللہ عنہ نے فرمایا: جب یہ آیت نازل ہوئی ﴿مَنْ ذَا الَّذِي يُقْرِضُ اللَّهَ قَرْضًا حَسَنًا﴾، تو سیدنا ابو الدحداح رضی اللہ عنہ نے عرض کیا: یا رسول اللہ صلی اللہ علیہ وسلم ! کیا اللہ ہم سے قرض چاہتا ہے؟ آپ صلی اللہ علیہ وسلم نے فرمایا: ہاں، اے ابو الدحداح! تو انہوں نے کہا: مجھے اپنا ہاتھ دکھائیں، پھر انہوں نے آپ صلی اللہ علیہ وسلم کا ہاتھ تھام لیا اور کہا: میں نے اپنا باغ اپنے رب کو قرض دے دیا— اور اس باغ میں چھ سو کھجور کے درخت تھے— پھر وہ اپنے باغ کی طرف آئے اور آواز دی: اے ام الدحداح! (اور وہ باغ میں موجود تھیں)، تو وہ بولیں: جی حاضر، تو انہوں نے کہا: باہر آجاؤ، میں نے اسے اپنے رب عزوجل کے لیے قرض دے دیا ہے۔ [سنن سعید بن منصور/كتاب التفسير/حدیث: 417]

سیدنا عثمان بن عفان رضی اللہ عنہ نے مہاجرین و انصار کے نوجوانوں کو حکم دیا کہ وہ مصاحف لکھیں، اور فرمایا: جس چیز میں اختلاف ہو، اسے قریش کی زبان میں لکھنا۔ پس مہاجرین نے کہا: التابوت اور انصار نے کہا: التابوہ، تو سیدنا عثمان رضی اللہ عنہ نے فرمایا: اسے مہاجرین کی زبان میں لکھو: التابوت۔ [سنن سعید بن منصور/كتاب التفسير/حدیث: 418]

سیدنا عمر بن خطاب رضی اللہ عنہ نے فرمایا: ہمارے مصاحف کو صرف قریش اور ثقیف کے نوجوان ہی لکھیں۔ [سنن سعید بن منصور/كتاب التفسير/حدیث: 419]

السدی رحمہ اللہ نے فرمایا: ﴿سَكِينَةٌ مِنْ رَبِّكُمْ﴾ یعنی سونے کا طشت جس میں انبیاء کے دل دھوئے جاتے تھے۔ [سنن سعید بن منصور/كتاب التفسير/حدیث: 420]