سیدہ عائشہ رضی اللہ عنہا سے روایت ہے کہ جب سورہ البقرہ کے آخر میں سود کے بارے میں آیات نازل ہوئیں تو رسول اللہ صلی اللہ علیہ وسلم باہر تشریف لائے اور شراب کی تجارت سے منع فرما دیا۔ [سنن سعید بن منصور/كتاب التفسير/حدیث: 451]

ربیع بن خثیم رحمہ اللہ کا کسی شخص پر قرض تھا، تو وہ کہا کرتے: ”فلاں شخص گناہگار ہے، اگر تو صاحبِ استطاعت ہے تو قرض ادا کر، اور اگر تنگدست ہے تو آسانی کے وقت تک مؤخر کر۔“ میں نے یہ بات ابراہیم رحمہ اللہ سے کہی تو انہوں نے فرمایا: ”یہ مہلت دینا سود کے بارے میں ہے۔“ [سنن سعید بن منصور/كتاب التفسير/حدیث: 452]

ابن سیرین رحمہ اللہ سے روایت ہے کہ دو آدمی ایک معاملے میں شریح قاضی رحمہ اللہ کے پاس مقدمہ لے کر گئے، ان میں سے ایک کا دوسرے پر حق تھا۔ شریح نے فیصلہ اس کے حق میں دے دیا اور دوسرے شخص کو قید کرنے کا حکم دیا۔ وہاں موجود ایک شخص نے کہا: ”یہ تو تنگدست ہے، اور اللہ عزوجل اپنی کتاب میں فرماتے ہیں: ﴿وَإِنْ كَانَ ذُو عُسْرَةٍ فَنَظِرَةٌ إِلَىٰ مَيْسَرَةٍ﴾ ’اور اگر مقروض تنگدست ہو تو اسے مہلت دو یہاں تک کہ آسانی حاصل ہو‘۔“ شریح رحمہ اللہ نے جواب دیا: ”یہ آیت سود کے معاملے میں ہے، اور اللہ عزوجل فرماتے ہیں: ﴿إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَىٰ أَهْلِهَا﴾ ’بےشک اللہ تمہیں حکم دیتا ہے کہ امانتیں ان کے اہل کے حوالے کرو‘۔“ [سنن سعید بن منصور/كتاب التفسير/حدیث: 453]

سیدنا عبداللہ بن عباس رضی اللہ عنہما سے روایت ہے کہ اللہ عزوجل کے فرمان ﴿وَإِنْ كَانَ ذُو عُسْرَةٍ فَنَظِرَةٌ إِلَىٰ مَيْسَرَةٍ﴾ ”اور اگر مقروض تنگدست ہو تو اسے مہلت دو یہاں تک کہ آسانی حاصل ہو“ کے بارے میں فرمایا: ”یہ آیت سود کے معاملے میں نازل ہوئی ہے۔“ [سنن سعید بن منصور/كتاب التفسير/حدیث: 454]

ابن ابی ملیکہ رحمہ اللہ روایت کرتے ہیں کہ میں نے سیدنا عبداللہ بن عباس رضی اللہ عنہما کو لکھا اور بچوں کی گواہی کے بارے میں سوال کیا۔ تو انہوں نے مجھے جواب میں لکھا: ”اللہ عزوجل کا فرمان ہے: ﴿مِمَّنْ تَرْضَوْنَ مِنَ الشُّهَدَاءِ﴾ یعنی ’ان میں سے جن کی گواہی تم پسند کرو‘، بچے ان میں سے نہیں جن کی گواہی کو ہم معتبر سمجھیں، اس لیے ان کی گواہی جائز نہیں۔“ [سنن سعید بن منصور/كتاب التفسير/حدیث: 455]

مجاہد رحمہ اللہ اس آیت ﴿وَاسْتَشْهِدُوا شَهِيدَيْنِ مِنْ رِجَالِكُمْ﴾ کے بارے میں فرماتے ہیں: ”اس سے مراد آزاد مرد ہیں۔“ [سنن سعید بن منصور/كتاب التفسير/حدیث: 456]

مجاہد رحمہ اللہ سے سوال کیا گیا کہ اگر کوئی شخص اپنی لونڈی سے ظہار کرے تو کیا حکم ہوگا؟ انہوں نے فرمایا: ”یہ ظہار کچھ بھی نہیں۔“ پوچھا گیا: ”کیا اللہ عزوجل نے نہیں فرمایا: ﴿وَالَّذِينَ يُظَاهِرُونَ مِنْ نِسَائِهِمْ﴾ ’اور جو اپنی بیویوں سے ظہار کرتے ہیں‘، تو کیا وہ لونڈیاں عورتوں میں شامل نہیں؟“ اس پر مجاہد رحمہ اللہ نے فرمایا: ”اللہ عزوجل نے یہ بھی فرمایا: ﴿وَاسْتَشْهِدُوا شَهِيدَيْنِ مِنْ رِجَالِكُمْ﴾ ’اور اپنے لوگوں میں سے دو مرد گواہ بنا لو‘، تو کیا غلاموں کی گواہی جائز ہے؟“ یعنی جیسے گواہی کے معاملے میں مردوں کی قید لگائی گئی اور غلام اس میں شامل نہیں، اسی طرح ”بیویوں“ کے حکم میں بھی آزاد عورتیں مراد ہیں، لونڈیاں نہیں۔ [سنن سعید بن منصور/كتاب التفسير/حدیث: 457]

محمد بن ثابت العبدی رحمہ اللہ روایت کرتے ہیں کہ ایک شخص نے عطاء بن ابی رباح رحمہ اللہ سے سوال کیا، اور میں وہاں موجود تھا۔ اس نے دریافت کیا: اللہ عزوجل کے فرمان ﴿وَلَا يَأْبَ الشُّهَدَاءُ إِذَا مَا دُعُوا﴾ ”اور گواہ انکار نہ کریں جب بلائے جائیں“ کا مطلب کیا ہے؟ کیا یہ اس سے پہلے کا حکم ہے کہ انہیں گواہی کے لیے بلایا جائے، یا جب وہ پہلے ہی گواہی دے چکے ہوں؟ عطاء رحمہ اللہ نے جواب دیا: ”نہیں، بلکہ جب وہ گواہی دے چکے ہوں، اس کے بعد انکار نہیں کرنا چاہیے۔“ [سنن سعید بن منصور/كتاب التفسير/حدیث: 458]

عطاء بن ابی رباح رحمہ اللہ اقامتِ شہادت کے بارے میں فرماتے ہیں: جب گواہ گواہی دے چکے ہوں، تو اس کے بعد انہیں انکار نہیں کرنا چاہیے۔ [سنن سعید بن منصور/كتاب التفسير/حدیث: 459]

عکرمہ رحمہ اللہ اقامتِ شہادت کے بارے میں فرماتے ہیں: جب گواہ گواہی دے چکے ہوں، تو اس کے بعد انہیں انکار نہیں کرنا چاہیے۔ [سنن سعید بن منصور/كتاب التفسير/حدیث: 460]