سیدنا علی رضی اللہ عنہ نے فرمایا: ”جس نے ماں شریک بھائیوں کو دیت میں سے ان کا حصہ نہ دیا اس نے ظلم کیا۔“ [سنن سعید بن منصور/كتاب ولاية العصبة/حدیث: 1481]

الشعبی رحمہ اللہ سے مروی ہے کہ سیدنا علی رضی اللہ عنہ ماں شریک بھائیوں کو دیت میں سے کچھ نہیں دیتے تھے۔ [سنن سعید بن منصور/كتاب ولاية العصبة/حدیث: 1482]

حسن بصری رحمہ اللہ نے سیدنا علی رضی اللہ عنہ سے روایت کیا کہ وہ فرماتے تھے: ”ماں شریک بھائی، شوہر اور عورت دیت میں سے کچھ نہیں لیتے۔“ [سنن سعید بن منصور/كتاب ولاية العصبة/حدیث: 1483]

حسن بصری رحمہ اللہ نے فرمایا: ”ہر وارث دیت میں سے وارث ہوتا ہے سوائے شوہر اور عورت کے۔“ [سنن سعید بن منصور/كتاب ولاية العصبة/حدیث: 1484]

سیدنا علی رضی اللہ عنہ نے فرمایا: ”دیت اس طرح تقسیم ہو گی جس طرح میراث تقسیم ہوتی ہے۔“ [سنن سعید بن منصور/كتاب ولاية العصبة/حدیث: 1485]

سعید بن مسیب رحمہ اللہ سے پوچھا گیا کہ مرتد عورت کی عدت کیا ہے؟ فرمایا: ”تین حیض۔“ پوچھا گیا اگر قتل ہو جائے تو؟ فرمایا: ”چار ماہ اور دس دن۔“ پوچھا گیا کہ اس کی میراث کا کیا حکم ہے؟ فرمایا: ”ہم ان کی میراث لیتے ہیں اور وہ ہماری میراث نہیں لیتے۔“ [سنن سعید بن منصور/كتاب ولاية العصبة/حدیث: 1486]

حسن بصری رحمہ اللہ نے فرمایا: ”مرتد کی میراث اس کے وارثین کے لئے ہے۔“ [سنن سعید بن منصور/كتاب ولاية العصبة/حدیث: 1487]

سیدنا علی رضی اللہ عنہ کے پاس مستورد عجلی کو لایا گیا جو اسلام سے مرتد ہو گیا تھا، آپ نے اسے اسلام کی دعوت دی، اس نے انکار کیا، تو آپ نے اس کی گردن ماری اور اس کی میراث کو اس کے مسلمان وارثین میں تقسیم کیا۔ [سنن سعید بن منصور/كتاب ولاية العصبة/حدیث: 1488]

کسی جزیرہ کے رہنے والے شخص نے سیدنا عمر بن عبدالعزیز رضی اللہ عنہ کو خط لکھا کہ ایک قیدی زمین روم میں عیسائی ہو گیا ہے، تو آپ نے جواب دیا: ”اگر اس کا ثبوت مل جائے تو اس کا مال اس کے وارثوں میں تقسیم کر دو۔“ [سنن سعید بن منصور/كتاب ولاية العصبة/حدیث: 1489]

سیدنا عمر بن عبدالعزیز رحمہ اللہ نے فرمایا: ”جو شخص زمین روم میں عیسائی ہو جائے تو اس کی بیوی کی عدت تین حیض ہو گی۔“ [سنن سعید بن منصور/كتاب ولاية العصبة/حدیث: 1490]